A nova secretaria nacional, Laura Arroxo, compareceu esta mañá para anunciar que o sindicato maioritario no ensino público vai subir o ton da súa oposición ás políticas educativas do PP. Se en 2022 o sindicato maioritario emprendeu a campaña “Profesorado farto” con protestas desde os centros e cunha concentración en San Caetano e en 2023 respondeu contundentemente con dúas xornadas de folga e a recollida de máis de 16.000 sinaturas contra o Acordo de renuncias baixo o lema “O profesorado non se vende”, agora eleva a intensidade da súa acción sindical coa consigna “Profesorado en loita”.

RECTIFICAR, RECUPERAR, RECOÑECER. Este é a mensaxe sobre a que pivota a nova campaña da CIG-Ensino e que vai dirixida por un lado á Xunta de Galiza e por outro á minoría sindical que pactou un pésimo acordo en plena precampaña electoral co daquela candidato Alfonso Rueda. Segundo explicou a recén elixida secretaria nacional da organización maioritaria no ensino público, Laura Arroxo, “esta combinación de palabras ten un significado moi claro. Primeiro de todo a Consellaría debe rectificar e reabrir unha nova negociación na que se respecte o sentir maioritario da representación docente e na que se incorporen melloras reais para todas as etapas e niveis educativos. En segundo lugar, o profesorado galego merece recuperar todos e cada un dos dereitos roubados tras os sucesivos recortes desde 2009, nomeadamente o horario lectivo, até este mesmo mes, no que Rueda segue aplicando a tesoira. E, por último, a Consellaría debe recoñecer a función docente favorecendo as tarefas propiamente didácticas, freando a burocracia, reducindo as ratios e garantindo medios para atender á diversidade, todas elas demandas unánimes dun sector profesional cada vez máis queimado e menos recoñecido pola administración educativa”. 

Pero tal e como a responsábel da CIG-Ensino lembrou, esta rectificación non só lle compete á Consellaría senón tamén aos sindicatos que traizoaron a vontade do persoal docente asinando un acordo que se amosou como “nefasto” e que, nun principio, hipoteca a varios anos vista calquera posibilidade de nova negociación. Por iso instou ás tres organizacións minoritarias a que “recapaciten e se descolguen do asinado”, a única forma de recuperar a unidade de acción fronte ás políticas da Xunta. Neste sentido fixo un breve repaso por como está a situación un ano e medio despois da súa publicación no DOG para evidenciar que “este acordo non lle vale a ninguén”:

Pero non só o balance do acordo deixa un panorama desolador. Arroxo incidiu en que “o PP é insaciábel na súa política de recortes e ao longo deste curso non parou de demostralo sen respectar a elección democrática da representación do profesorado”.  Así, indicou, “algunhas medidas pasaron pola Mesa Sectorial e malia contar coa oposición neste caso de todas as organizacións sindicais continuaron adiante. O adianto do curso académico ao 8 de setembro vai facer inviábel que en tan só 5 días se poida preparar todo: organización de grupos, horarios, programacións xerais de centros, programacións didácticas de profesorado, preparación de clases de novas materias e módulos... A negativa a convocar as prazas de atención preferente para alumnado que precisa de especialistas en Pedagoxía Terapéutica ou Audición e Linguaxe a tempo completo. A eliminación das licenzas por formación retribuídas. O incumprimento da normativa a respecto da aprobación do Plan de igualdade que un ano despois do inicio da súa negociación aínda non ten avanzado un diagnóstico das desigualdades de xénero existentes dentro da administración educativa nin iniciada a redacción do protocolo contra o acoso sexual.  A desvalorización da profesión docente diante do conxunto da sociedade. E, por último, o intento de control e censura ideolóxica nas actividades complementarias  nun borrador de instrucións que lle foi presentado a todo o mundo, onte mesmo á FEGAMP, agás ás organizacións sindicais”.

Arroxo engadiu que “estamos pois ante un goberno do PP, liderado por Rueda máis reaccionario aínda que o de Feijóo, algo que considerabamos imposíbel, e que está continuamente lanzando a mensaxe de que nos pode apertar até que nos afogue. É por iso que o profesorado ten que dicir NON e polo que consideramos fundamental a asistencia á concentración que terá lugar diante da Xunta o vindeiro 25 de xuño ás 12 horas”. Á vez avanzou que “unha resposta que reflicta este profundo malestar serviría de detonante para levar a cabo mobilizacións máis contundentes que nestes intres non descartamos de cara ao vindeiros curso”. “Xogan co noso cansazo, con que chegamos coa lingua fóra a fin de curso e sen forzas pero son moitos os motivos polos que cómpre reaxir para que como di esta campaña rectifique dunha vez para poder recuperar e avanzar en dereitos e se nos recoñeza o valor social da nosa profesión”, sentenciou.