Esta acción reivindicativa comezará a media tarde para facilitar a participación de familias e alumnado e son totalmente flexíbeis na hora de entrada e de saída. Está previsto que sirvan para analizar as demandas conxuntas de toda a comunidade educativa e acordar novas medidas de presión á Consellaría. As organizacións convocantes das mobilizacións no ensino público propoñen tamén que se visibilicen as demandas do profesorado a través dos martes en loita, unha iniciativa na que o profesorado asistirá a clase os martes vestido de negro e explicará a alumnado e familias por que este é máis que un conflito docente. Esta medida terá o seu punto forte o día 10 de febreiro con concentracións nos distintos centros educativos que hai en Galiza.

Descentralizar o conflito nos centros de ensino. Esta é a fase que propoñen até o Entroido as organizacións convocantes das mobilizacións este curso no ensino público galego. Unha delas dará comezo o vindeiro martes, 27 de xaneiro, e estenderase até o xoves, 5 de febreiro. Consistirá en realizar peches rotatarios en centros de ensino de 14 localidades galegas, a falta de concretar algún outro, para visibilizar en cada comarca as necesidades máis acuciantes en materia de atención á diversidade, redución de ratios, recuperación do horario lectivo, impartición de afíns, falta de desdobres, resultados nefastos da reforma da FP... Os encerros darán comezo a partir de media tarde para facilitar a participación de familias e alumnado e neles prevense realizar asembleas abertas, elaborar material reivindicativo para colgar nos centros, debater sobre futuras accións a levar a cabo... 

A hora de entrada e de saída é totalmente flexíbel aínda que a convocatoria aos medios de comunicación realizarase na hora prevista de comezo polo que é importante que nese momento se concentre o maior número de persoas posíbeis. En xeral, agás naqueles casos nos que se marca outro horario diferente, todos principiarán sobre as 18 horas. Este é o cronograma dos que xa están confirmados a día de hoxe: