A CIG-Ensino fai un chamamento a participar na manifestación convocada por Queremos Galego co lema “O galego que nos une” e que sairá as doce da Alameda de Santiago de Compostela. A CIG-Ensino esixe a derrogación do Decreto do Plurilingüismo unha vez que o Tribunal Superior de Xustiza de Galiza sentenciou que nos seus piares fundamentais é ilegal. Ao mesmo tempo, a CIG-Ensino esixe que cesen as actuacións en contra do galego que permanentemente está aplicando a Consellaría de Educación.

É imprescindible un novo decreto de normalización lingüística que comporte un novo modelo que incorpore o ensino en galego en todos os niveis educativos co obxectivo da plena normalización do noso idioma.

Queremos denunciar tamén a actitude do conselleiro de Educación de total complicidade e submisión ao Goberno central, que coa posta en marcha do anteproxecto da LOMCE pretende impornos unha lei reespañolizadora que uniformiza e centraliza o sistema educativo, afasta do ensino o estudo da nosa cultura, historia, xeografía, economía, etc. e establece un modelo lingüístico no cal se lle garante o descoñecemento do noso idioma ao alumando e se lle dá un tratamento secundario e de total submisión ao noso idioma. Un anteproxecto que, en definitiva, fai inviable calquera posibilidade de normalización lingüística e que o galego sexa a lingua vehicular do ensino.

Por outra banda temos que lembrar que o noso idioma está afastado a día de hoxe da maioría das materias e centros,  que a súa presenza é anecdótica, nomeadamente no ensino infantil, e que existe unha carencia absoluta de material en galego en moitas materias do actual sistema educativo.