Logo de case un ano de vixencia do miserento anterior acordo de xubilación parcial a Consellaría de Educación, aproveitando unha nova reforma involutiva das xubilacións acordada polo goberno estatal e os sindicatos maioritarios estatais, pretende xustificar un novo recorte de dereitos con esta nova proposta de borrador mandada a todos os sindicatos e patronais a semana pasada.

Coa mesma solicitaron emendas ao texto, a presentar ate o mércores 4 de xuño, para logo convocar a Tripartita e impor este novo texto ou como moito acercarse ao anterior e que foi asinado por todas as patronais e os catro sindicatos estatais, deixando a moito persoal fóra do dereito a xubilarse anticipadamente e nunhas condicións moi por debaixo das que regula a norma da Seguridade Social (SS). Norma que involucionou coas últimas reformas das pensións e xubilacións, aprobadas por distintos gobernos estatais coa complicidade de CCOO e UGT, e fortemente rexeitadas pola CIG, que segue a pelexar e reivindicar a xubilación anticipada aos 61anos eco máximo de redución do 85%.

A CIG-Ensino só ve posible unha rectificación da Consellaría con medidas de presión contundentes e unitarias, comprometéndose o sindicato a apoialas sempre que se rexeite o acordo anterior imposto pola Consellaría e o fin sexa acadar como mínimo as condicións legais recollidas na norma que regula este tipo de xubilación na S.S. e no Estatuto dos traballadores e traballadoras.

Emendas da CIG-Ensino ao texto do borrador proposto sobre a Xubilación Parcial Anticipada para docentes de pago delegado na Concertada 

Que este tipo de xubilación parcial sexa estendido a tódolos ensinantes en pago delegado, cos únicos requirimentos da idade e os anos de cotización e non que teña que ter a xornada completa, tantas veces infrecuente no sector, sobre todo en especialistas e en centros pequenos, así como os das cooperativas; porque estariamos condenando dobremente á esa persoa traballadora.  Marcar un límite de xornada parcial, que pode ser do 75%.

Que poida computar para xornada completa o traballado no ensino concertado que non estea en pago delegado (facéndose cargo as patronais como obriga que deberían asumir, ao igual que estas se deberían comprometer o resto do seu persoal que non ten pago delegado: docentes sen pago delegado, Pas,..).

Que os 6 anos de antigüidade non teñan que ser na “mesma empresa”, pois excluiría recolocacións de persoal, posibles subrogacións noutras empresas e mesmo cambios de nomes nas empresas (casos que pasan a Fundacións).

Que a redución da xornada da persoa a prexubilar poida ser acumulada e rematar antes a súa vida laboral, ademais de ser pedagoxicamente o máis correcto. Que decida a persoa traballadora o seu tempo de ligazón ó Centro.

Que a redución da xornada da persoa a prexubilar sexa o tempo máximo e a máxima permitida pola Lei na actualidade: o 1º dos 3 anos ao 33% e os outros dous ao 75%. Xa se ten recoñecido por esta administración en acordos anteriores ate o 85% e dende os 61 anos, modelo defendido e reivindicado pola CIG, rexeitando as últimas reformas involutivas nas xubilacións anticipadas (así como as ordinarias e as pensións) acordadas polos gobernos estatais e OO,SS estatais maioritarias.

Que as patronais teñan a obriga de acudir á lista de recolocación para contratar ao remudista.

Que non se limite o ámbito temporal ao 31/08/2029, nin a outra data, simplemente sexa un dereito e que só un cambio normativo na Lei da SS, leve á súa posible modificación por obriga.

Que a data de inicio da xubilación parcial se corresponda coa resolución favorable da solicitude persoal (establecendo un prazo máximo dun mes; por exemplo para a súa resolución,para non demorarse no tempo) e non de prazos como está no novo borrador.

Que unha vez recoñecido o dereito, este remate coa xubilación ordinaria da persoa traballadora (como estaba anteriormente) e non cando remate o acordo.

Que se recoñeza o dereito, se cumpre os requisitos, aínda que este xurda o día de remate do acordo.