A Xunta, agora co PSdG como cómplice, continúa coa súa estratexia de que a lingua sexa, unha vez máis, obxecto de confrontación nos centros de ensino en lugar de potenciala, prestixiala e presentala como un activo atractivo para toda a comunidade educativa. Como alternativa a estes pactos contra o galego, a CIG presentará unha Iniciativa Lexislativa Popular para que se tomen medidas que realmente permitan sacalo da situación de emerxencia actual.

Para o sindicato este acordo non só limita a presenza do galego nas aulas senón que, ademais, deixa en mans das direccións de cada centro, e dos claustros, a decisión de que materias se imparten en galego e cales non. Desde o sindicato denunciamos que estas medidas non son só totalmente ineficaces para paliar a falta de competencia, uso e normalización do galego entre a poboación escolar senón que ademais contribuirán a un aumento da burocracia e provocarán friccións entre o profesorado.

É por iso que esta mañá se sumou á concentración convocada pola Mesa pola Normalización Lingüística diante do Parlamento de Galiza para pedir aos grupos parlamentarios que se poñan de acordo e levanten o veto ao galego dentro e fóra das aulas porque a nosa lingua é válida para todos os ámbitos e espazos.

A iniciativa Lexislativa Popular como alternativa aos Pactos contra o Galego

Desde a CIG-Ensino lémbrase a toda a comunidade educativa que se vén de rexistrar no Parlamento galego, xunto con outras entidades, unha Iniciativa Lexislativa Popular co obxectivo de revivir a nosa lingua e avanzar cara a súa completa normalización. No texto da mesma recóllese unha referencia ao ámbito do ensino, que o sindicato subscribe na súa totalidade e de aí que anime a profesorado, familias e alumnado a implicarse na recollida de sinaturas para que os grupos parlamentarios que pactaron en contra do galego, propoñan a inmediata derrogación do Decreto de Plurilingüismo e se implementen este mesmo curso as principais medidas necesarias para revivir a nosa lingua antes de que sexa demasiado tarde: 

1. O galego é a lingua vehicular e de aprendizaxe do sistema educativo obrigatorio e non obrigatorio e a de uso normal de acollida do alumnado de recente incorporación. A Xunta da Galiza asegura a docencia en galego en todos os cursos, niveis, materias, módulos e modalidades educativas sen que poida ser restrinxida no desenvolvemento normativo. As materias lingüísticas impartiranse, con carácter xeral, na lingua obxecto de aprendizaxe.
2. Adoptaranse as medidas de reforzo necesarias para recuperar e ampliar o uso do galego entre o alumnado contando coas Equipas de Normalización e Dinamización Lingüística.
3. A administración educativa garantirá a plena formación do conxunto do profesorado que asegure a súa competencia plena para impartir todas as materias e niveis educativos en galego.
4. A administración educativa ofertará os materiais e recursos didácticos necesarios en todos os cursos, niveis e materias, módulos e modalidades para o ensino en galego. Así mesmo, informará a nais e pais e responsábeis legais do proceso de normalización no ensino.
5. Así mesmo, estabelecerá un programa específico para promover o galego na formación profesional en coordinación coas empresas e elaborará planos de normalización nas Universidades galegas para aumentar o ensino e a investigación en galego.