A CIG-Ensino amosou este venres 11 de outubro o seu apoio ao profesorado e ao alumnado das Escolas de Conservación e Restauración e de Arte Dramático que fixeron unha Marcha a pé desde Pontevedra para solicitar a súa adscrición á Universidade e recoñecemento das titulacións superiores que imparten como grados. Na manifestación en Santiago participou o secretario nacional da CIG-Ensino, Anxo Louzao.

A Plataforma Galega pola Integración das Ensinanzas Artísticas Superiores na Universidade pretende que os centros integrados na mesma e as titulacións que ofrecen se adscriban á universidade. O obxectivo urxente é a consecución da titulación de Grao para os alumnos que se matricularon nel e que lles foi negado por unha senteza do Tribunal Supremo. Para darlle solución a ese problema, propoñen a adscrición e posterior integración das ensinanzas artísticas superiores na universidade galega. Máis alá, pretenden a posta en valor e pleno desenvolvemento destas ensinanzas, que veñen reclamando dita integración hai moito tempo. A Plataforma entende que a súa petición é razoable e factible, e por iso confía en que a Consellería de Cultura, Educación e Ordenación Universitaria, dea os pasos necesarios para dar resposta as súas demandas.