O 28 de xullo de 2025, após o compromiso da CIG-Ensino de iniciar os trámites para que o Consello Galego de Relacións Laborais (CGRL) abrise  o marco galego de negociacións no sector da discapacidade convocando as partes social e patronal, produciuse a primeira xuntanza dos sindicatos CIG, CCOO e UGT e as patronais AEDIGAL e INRED que rematou, despois dun amplo debate, coa simple sinatura dun manifesto reivindicativo dirixido á Xunta, no que se lle recrimina a actitude pasiva e a non aplicación dos incrementos salariais recollidos no XVI convenio estatal. Ademais, no documento solicítase que se constitúa unha mesa tripartita (Consellaría, patronais e sindicatos maioritarios do sector) coa finalidade de dignificar salarios coa creación dun Complemento Salarial Autonómico, así  como a negociación colectiva no ámbito autonómico doutras melloras laborais. As patronais puxeron como condición obter compromisos da Consellaría para comezar a negociar nesta mesa no CGRL.

Para a CIG-Ensino, sindicato maioritario na Galiza do sector da discapacidade, esta actitude é unha simple declaración de intencións e non de feitos para avanzar, como esiximos en solitario. “Propuxemos ser valentes e constituír o Marco Galego de Relacións Laborais no sector co fin de dignificar as condicións laborais e salariais acadando un “convenio galego no sector”, única vía real e posible que dea resposta ás reivindicacións do persoal traballador galego, e que non dá o convenio estatal negociación tras negociación”, apunta Henrique García, responsábel de Ensino Privado. Contar con este convenio galego obrigaría a administración a cumprilo (ao igual que acontece co convenio estatal actual), dando máis seguridade xurídica que calquera outro acordo, máis ao regular agora o E.T. a prevalencia dun convenio autonómico sobre o estatal.

Deste xeito o compromiso acadado en abril coas patronais AEDIGAL e INRED, de constituír a futura mesa de negociación na Galiza “por un convenio galego”a través do CGRL, non foi ratificado polas mesmas neste primeiro contacto no CGRL, amosándose agora distantes (apoiadas por CCOO e UGT) e máis preocupadas coas reivindicacións do manifesto, que consideran prioritarias e adiando o “convenio galego” para “máis adiante”.

Debate e medidas de presión

A CIG-Ensino trasladará estes feitos aos centros de traballo e debaterá coa súa representación sindical maioritaria no sector (conta co 43% dos delegados/as cun total de 90 de preto duns 200 electos), no mes de setembro, as medidas a adoptar se a administración se mantén na súa pasividade e incumprimento e as patronais non acceden a negociar, non descartando tomar medidas de presión reivindicativas.