Consúmase o entreguismo do trío UGT, FSIE e USO ao aceptar as propostas salariais das patronais, con dúas mínimas modificacións, que para a CIG-Ensino son inasumíbeis e inadmisíbeis como xa viñemos manifestando coherentemente nas anteriores mesas. Non só rexeitaron, unha vez máis, a nosa proposta de mobilizacións conxuntas e loitarmos por un convenio digno, senón que incluso “agradeceron o esforzo” das patronais.

Nesta 15ª mesa de negociación evidenciouse unha vez máis o modelo sindical pactista e entreguista do resto de OO.SS ao aceptar as propostas salariais das patronais con dúas mínimas concesións ridículas e insultantes, pero que a UGT, FSIE e USO lles valeron para vender os dereitos dos traballadores/as que “representan” e pregarse á patronal nunha actitude totalmente servil. Estas dúas concesións foron: aumentar a proposta de 925€ a 930€ comezando a pagalos dende o mes seguinte á data de sinatura do convenio, que será o 1 de xuño, e unha cláusula para que se convoque a mesa negociadora se hai modificacións no SMI para adaptar as táboas salariais ao mesmo.

A continuación expoñemos as propostas salariais acordadas e o resto do convenio quedaría tal cal está, só con adaptacións legais ao texto (novas Leis, novos R.D., cambios E.T… xa de obrigado cumprimento) que se redactarían en mesas técnicas o 6, 13, 21 e 22 de maio, data esta última na que xa se asinaría o XII convenio:

Para os anos 2016, 2017 e 2018 mantemento dos salarios, é dicir, conxelación. 

A partir de setembro de 2021, o grupo de mestras/es igualarán salarios cos novos pregos dende 1/01/2019.

CLÁUSULAS DE GARANTÍA:

• Ao/á traballador/a que teña un salario total (salario máis complementos) con absorción e compensación do complemento específico, no seu caso, superior ao establecido anteriormente respectaráselle dito salario.
• Establécese un período transitorio ata setembro de 2021 para os/as traballadores/as dos centros con contratos ou subvencións en vigor anteriores ao 1/01/2019 (inclúense posibles prórrogas), para que se vaian incorporando aos salarios dos novos pregos licitados a partir de dita data. Con efectos de 1-9-2021 aplicarase con carácter xeral e obrigatorio a incorporación de todos/as os/as traballadores/as a ditos salarios.
• No caso de novos SMI en 2020 e 2021 reunirase a mesa de negociación para “adaptar as táboas salariais”.

Xa na propia mesa de negociación a CIG-Ensino, por enésima vez, propuxemos mobilizar o sector para presionar as patronais polo seu involucionismo e inmobilismo, na busca dun CONVENIO DIGNO E XUSTO, con melloras reais laborais e salariais. A resposta foi non, unha vez máis, polos sindicatos que decidiron entregarse ás patronais e antepoñer os seus intereses aos dos/as traballadores/as que din representar.

Agora as OO.SS que non o asinamos temos que denuncialo e mobilizarnos para frear a sinatura do mesmo e intentarmos cambiar as dinámicas pactistas e entreguistas que dende fai moito tempo levan traizoando aos/ás traballadores/as, rematando coa precariedade laboral e salarial e coa mesma dinámica mobilizadora intentarmos camiñar cara un CONVENIO GALEGO. Esta é a única vía que sempre defendemos dende a CIG-Ensino para achegar as negociacións aos/ás traballadores/as, para que o persoal poida decidir e conquerir, como existe noutras CC.AA do estado, un convenio autonómico digno e xusto.