Dúbidas frecuentes sobre o Concurso excepcional de estabilización
Aquí atoparás resposta ás dúbidas máis habituais sobre o Concurso de méritos
As preguntas novas ou actualizadas aparecen precedidas dun ♦.
Aclaracións previas
- Estamos diante dun proceso de estabilización de persoas ou de prazas?
O proceso consolida prazas ocupadas temporalmente e non as persoas que as ocupan. Non por ser algo sabido por todo o mundo debe deixarse de lado. Os procesos restrinxidos (aqueles aos que só se pode presentar, por exemplo, quen xa traballou nunha administración), están vetados pola xurisprudencia constitucional. Como CIG-Ensino nunca nos mostramos contrarios aos procesos restrinxidos e defendemos en todos os procesos de negociación antepoñer a realidade da longa temporalidade das compañeiras e compañeiros do ensino público galego ás limitacións legais. Mais nunca confundimos con mentiras ao profesorado, diferenciamos totalmente os nosos obxectivos e demandas das propostas que tiñan encaixe legal dentro das marxes da negociación. O contrario sería mentir e estafar ao profesorado interino e entrar no xogo perverso de provocar un enorme malestar e frustración no profesorado a quen se pretende consolidar.
- Era posíbel unha convocatoria á que só se puidese presentar profesorado que traballe en Galiza?
En absoluto. Primeiro porque sería un acceso restrinxido e segundo porque os corpos docentes, moi ao noso pesar, son de carácter estatal; o que fai que unha persoa que aprobe unha oposición ten mobilidade por todo o estado a través de concurso de traslados. Por esta condición dos corpos docente nos vemos obrigados a depender unha normativa estatal para o ingreso na función pública (RD 276/2007 con todas as súas modificacións) ao contrario doutro funcionariado, como por exemplo o da administración xeral da Xunta.
- Só se podería presentar profesorado interino?
Non, pola imposibilidade de fixar o carácter restrinxido pode presentarse xente que nunca foi interina ou mesmo funcionariado de carreira (neste caso só para prazas dun corpo diferente ao seu; é dicir unha mestra de primaria, funcionaria de carreira, non se pode presentar a ningunha outra especialidade de mestres mais si a prazas de secundaria, se ten a titulación).
- Podería haber tantas prazas no concurso como persoal interino traballou desde antes de 2016 con outros criterios diferentes aos aplicados pola Xunta?
Non. Por varios motivos. Primeiro polo límite temporal que fixa a Lei (2016 para prazas a concurso). Segundo, porque hai un número importante de prazas con reserva de posto de traballo, é dicir, que teñen titular, que non se poden ofertar. Terceiro, porque a Lei impide, polo acordo sindical estatal ao que a CIG-Ensino se opuxo, que dos procesos extraordinarios se supere o gasto en persoal nin o seu número previo ás convocatorias.
- Poderían aumentar as prazas ofertadas?
Claramente si. Se se tivesen aceptado as propostas da CIG-Ensino estariamos nunha cifra superior. Con todo, polas limitación legais de efectivos o incremento sería limitado.
- Poderían diminuír as prazas ofertadas?
A resposta tamén é afirmativa. E iso é pola inexistencia dunha RPT e polo carácter anual e moi cambiante dos nosos destinos provisionais. Todo isto permite unha interpretación moi ampla do que se considera como “estrutural e vacante”. A maiores, se a Consellaría non tivese aceptado algunha das nosas propostas e descontase a redución de todos os cargos directivos ou desbotase, como ocorreu noutras CC.AA. prazas con afíns, a oferta podería ser moi inferior ás prazas convocadas.
- Cales eran as cifras de profesorado e cal a relación coas prazas ofertadas?
Tal e como fixemos público logo dun estudo pormenorizado do sindicato había, dentro do total de 3918 docentes interinos en setembro de 2021, data de referencia para o cómputo, 1904 que cumprían os requisitos de antigüidade anterior ao 2016 (prazas para concurso) ou ao 2018 (prazas para oposición). Destes, 1263 tiñan unha antigüidade anterior a xaneiro de 2016. O total de prazas ofertadas para concurso máis para a oposición extraordinaria chegou finalmente a 1281 (1156 de concurso e 125 de oposición). Estas cifras son indicativas da marxe de prazas a ofertar na que nos movemos, tendo sempre presente o requisito de que non só tiñan que ser estruturais senón tamén vacantes (sen titulares con reserva de praza) en todos os cursos.
- Por que hai tanta disparidade de prazas ofertadas entre as comunidade autónomas?
En primeiro lugar polas diferenzas enormes de taxa de interinidade, sendo Galiza unhas das máis baixas do Estado (téñase en conta que hai comunidades co 40 ou 50% de persoal docente interino). En segundo lugar polos criterios aplicados para o cómputo das prazas de estabilización. Como xa se explicou en Galiza, grazas á presión da CIG-Ensino conseguiuse computar non só as prazas vacantes ocupadas por persoal interino antes do 1 de xaneiro de 2016 senón sumarlle o número de persoas interinas que, estando en activo no momento do cómputo, levaba traballando desde antes desa data. Isto non foi interpretado de igual xeito no resto de territorios, polo que en moitas comunidades, malia ter unha porcentaxe infinitamente superior de interinidade que aquí, saen poucas prazas a concurso ou a distribución entre o concurso e o concurso oposición extraordinario é totalmente diferente a aquí.
- Por que é tan determinante a primacía da puntuación por especialidade?
Polo propio carácter estatal dos corpos docentes que vai provocar un efecto chamada e que moito profesorado participe simultaneamente en diferentes corpos e especialidades e tamén porque na propia convocatoria galega ese efecto de non primar a especialidade levaría a que unha docente interina que traballou sempre pola lista de Tecnoloxía puidese ter a mesma puntuación en Matemáticas, ou que unha mestra de AL acadase a mesma puntuación por esta especialidade que por PT. Cando a CIG-Ensino formulou esta proposta (que por outro lado foi coincidente coa proposta do MEFP) tiña claro que era a única saída para non converter este concurso nunha lotaría. Somos conscientes de que esta medida prexudica a algunhas persoas que están en varias listaxes de substitución e que traballaron indistintamente pola que obteñen antes unha interinidade ou pola que escollen nun
momento dado polo motivo que sexa, pero a CIG-Ensino fixo unha avaliación en conxunto sobre as consecuencias que tería non primar a antigüidade na especialidade. Isto levaría a casos de múltiples empates, a persoas que obteñan prazas en especialidades nas que nunca traballaron ou en varias á vez distorsionando o obxectivo fundamental para o que se supón se deseñou este proceso.
- Está obrigado o persoal interino a presentarse?
O último apaño do “acordo de persoal interino” di que non existe obriga de se presentar aos procesos selectivos convocados no ano 2022, mais só aos efectos da permanencia nas listas de interinidades e substitucións. O acordo sindical estatal que deu lugar á modificación do EBEP (que fixa un máximo de 3 anos de contrato nunha interinidade e que está pendente de aplicar no ámbito docente) inclúe como requisito presentarse ás convocatorias de estabilización para poder ter dereito a unha compensación económica no caso de perder o posto de traballo como consecuencia do resultado deses procesos. Isto quere dicir que quen non se presente a este concurso excepcional e, de ser o caso, á oposición extraordinaria do verán de 2023, non tería dereito a esa compensación por cese, polo que é fundamental que todo o profesorado interino se presente.
Cuestións xerais
- Cantas prazas se convocan?
Neste documento podes ver as prazas por especialidade ofertadas para este concurso.
- Particípase para prazas en centros concretos?
Non. Os criterios empregados para determinar as prazas permiten identificar cales son as que saen ao concurso, mais iso non quere dicir que se oferten prazas concretas. É por isto que o persoal que supere o procedemento selectivo deberá participar nos concursos ordinarios de traslados que se convoquen para opter a súa praza.
- Cal é a puntuación máxima que se pode acadar no baremo?
15 puntos
7 por experiencia docente, 3 por formación académica e 5 por outros méritos.
- Podo concursar por varios corpos e por varias especialidades do mesmo corpo?
Si, sempre que presentes unha solicitude para cada corpo e especialidade pola que queiras participar.
- Quedarei en listas de substitución se me presento?
Non, o concurso de méritos non xera dereitos con respecto ás listas de substitución.
- Se houbese un empate a puntos, como se resolve?
Maior puntuación en cada un dos apartados, epígrafes e subepígrafes pola orde que estes aparecen no baremo. Se o empate continúa, desempataríase polo maior tempo de servizos prestados na especialidade á que se opte.
- Hai fase de prácticas?
O persoal que supere o procedemento selectivo non terá fase de prácticas e, polo tanto, participará no primeiro concurso de traslados posterior ao seu nomeamento como funcionariado de carreira coa puntuación que lle corresponda, incluídos os servizos prestados como persoal interino actualmente recoñecidos no CXT.
- Publicarase conxuntamente a convocatoria para o corpo de PTFP e para os restantes corpos?
Finalmente, haberá unha convocatoria única para todos os corpos.
- Se introduzo na aplicación novos méritos e olvido algún, como teño que proceder?
Se unha persoa presenta unha instancia na que non xustificou un mérito e quere facelo posteriormente -sempre no prazo fixado na orde- terá que volver incorporar de novo toda a documentación, xa que unha nova instancia dunha mesma especialidade anula a anterior.
Requisitos
- Son funcionaria de carreira ou en prácticas, pódome presentar?
Si, sempre que sexa noutro corpo distinto do que prestas servizos.
- Haberá proba de galego para que non poida acreditar o coñecemento da nosa lingua?
Si. Como é habitual, as persoas que teñen CELGA-4 están exentas do exame ao ter acreditado o requisito lingüístico.
- Hai prazas para a quenda de discapacidade?
Si, o 7% do total das prazas da oferta de emprego, que inclúe a convocatoria do concurso excepcional e da oposición concurso extraordinario que se celebrará no 2023.
Prazos
- ♦ Cal é o prazo de participación no concurso?
Do 31 de outubro ao 21 de novembro
- En que data se deben cumprir os requisitos?
O día en que peche o prazo de presentación de solicitudes. Deben manterse ata o nomeamento como funcionariado de carreira.
- Cando me nomearán funcionaria de carreira se supero o procedemento selectivo?
1 de setembro de 2023.
- En que data deben estar perfeccionados os méritos?
Na do día que se publique a convocatoria no DOG, que previsiblemente será a finais de outubro ou comezos de novembro.
Experiencia docente
- Puntúa máis ter traballado en Galiza que noutras administracións?
Non. Os corpos docentes son estatais e polo tanto a experiencia non pode puntuarse de distinta maneira nunha comunidade ou noutra.
- Canta puntuación outorgan por cada ano de servizos prestados?
0,7/ano na especialidade á que te presentas na pública.
0.35/ano en especialidades do mesmo corpo na pública.
0.125/ano en especialidades de distinto corpo na pública.
0.1/ano en especialidades do mesmo nivel ou etapa, noutros corpos.
- Hai límite de anos na baremación da experiencia docente?
O límite é de 10 anos, que non teñen por que ser os últimos 10. Serán os 10 máis favorábeis.
- Se non completo un ano de experiencia docente, podo puntuar por meses?
Si. A convocatoria establece a seguinte puntuación por mes:
Na epígrafe 1.1: 0,0583 puntos.
Na epígrafe 1.2: 0,0291 puntos.
Na epígrafe 1.3: 0,0104 puntos.
Na epígrafe 1.4: 0,0083 puntos. - ♦ Como se puntúan os servizos prestados nas especialidades de orientación de Primaria ou Prácticas e Actividades do extinto corpo de PTFP?
En Orientación vai baremar a antigüidade na especialidade pola que se accedeu á lista. No caso de Prácticas e Actividades puntuaránlle como tempo traballado en Servizos á Comunidade ao profesorado que accedeu desde esta lista.
- Canto puntúan os servizos prestados a media xornada?
O mesmo que se fosen a xornada completa.
- Onde podo descargar a folla de servizos?
Na páxina web de Datos persoais, en galego e castelán para poder presentala noutras comunidades autónomas.
- Puntúa a experiencia docente na Universidade?
Non.
- Barema a experiencia docente en escolas infantís?
Se foi como mestra ou mestre no primeiro ciclo de educación infantil, si, nas epígrafes 1.3 ou 1.4 segundo corresponda.
Formación académica
- Canto puntúa a nota media do expediente?
De 6 puntos (ou 1,5 créditos) a 7,5 puntos (ou 2,25 créditos) - 1 punto
De 7,51 puntos (ou 2,26 créditos) a 10 puntos (ou 4 créditos) - 1,5 puntos
- ♦ Conforme a que Decreto debe estar calculada a nota media do expediente para que puntúe?
A nota media, deberá estar calculada de xeito xeral conforme ao RD 1125/2003 (excepto no caso de que a titulación que alegues corresponda a ensinanzas artísticas superiores, que deberá estar calculada conforme ao artigo 5.3 do RD 1614/2009; excepto no caso de que as titulacións alegadas sexan os títulos de profesor ou de profesor superior ou de cantante de ópera, que deberá estar calculada conforme a Resolución do 15 de setembro de 2011, DOG 188 do 30 de setembro; e excepto no caso de que a titulación alegada sexa equivalente a efectos de docencia e non fose unha titulación universitaria, que deberás achegar expediente académico ou título no que conste numericamente a nota media; e excepto no caso de que o título estea expedido ao abeiro da Lei 14/1970 e non conste a nota media ou de que o título fose obtido no estranxeiro, que deberás solicitar a certificación académica segundo as indicacións da disposición complementaria terceira da convocatoria do concurso).
- Puntúa a nota media dunha titulación declarada equivalente a efectos de docencia alegada para o ingreso no corpo?
Si, pero só se computará cando a persoa aspirante non posúa a titulación exixida con carácter xeral.
- Cantos mestrados oficiais, títulos de doutoramento e premios extraordinarios de doutoramento puntúan?
Só 1 mestrado, 1 título de doutoramente e 1 premio extraordinario de doutoramento.
- Puntúa o Mestrado do profesorado?
Só naqueles corpos que non o exixan: o de Mestres, o de Catedráticos e Profesores de Música e Artes Escénicas, o de Profesores de Artes Plásticas e Deseño e o de Mestres de Taller e de Artes Plásticas e Deseño.
- Puntúa o Diploma de Estudos Avanzados?
Si, 1 punto.
- ♦ Que niveis de idiomas puntúan?
C1(excepto de galego*) e C2 de EOI ademais de certificacións deses mesmos niveis tipo Trinity, Cambridge, Camoes etc.
*A Consellaría non aceptou a nosa reclamación sobre a puntuación do nivel C1 de EOI de galego para aquel profesorado que acredite a validación do CELGA-4 doutro xeito.
- ♦ Podo puntuar por ter varios niveis do mesmo idioma?
Si, podes obter puntuación polo nivel C1 e C2 do mesmo idioma, tanto no apartado 2.4 coma no 2.5 (tendo en conta que distintos certificados do mesmo nivel non puntúan).
- Barema ter distintos certificados de idioma do mesmo nivel?
Non. Valorarase un só certificado por cada nivel de idioma que se acredite.
Outros méritos
- Puntúa ter superada unha fase de oposición?
Si, 2,5 puntos (ata un máximo de dúas convocatorias) se foi a partir de 2012 (incluído).
- Que se entende por fase de oposición aprobada?
Ter superadas, desde 2012 incluído, a primeira e mais a segunda parte da fase de oposición (práctico, tema, programación e unidade), é dicir, aprobar sen praza.
- Onde podo descargar o certificado de fases de oposicións superadas?
Na páxina web de Datos persoais, en galego e castelán para poder presentalo noutras comunidades autónomas.
- Cantos puntos se poden obter por formación permanente (cursos)?
Un máximo de dous puntos.
- Cales deben de ser os contidos da formación para que puntúe?
Só puntúa formación relacionada coa especialidade, a organización escolar, as novas tecnoloxías aplicadas á educación, a didáctica, a psicopedagoxía ou a socioloxía da educación. Hai que ter en conta que toda a formación de contidos transversais será puntuada.
- Que tipo de formación puntúa?
Cursos, seminarios, grupos de traballo, proxectos de formación en centros e congresos. Tamén os títulos propios expedidos conforme ao artigo 36 do Real Decreto 822/2021.
- ♦ Podo obter puntuación polos certificados de iniciación e perfeccionamento de galego?
Non.*
*A Consellaría non aceptou a nosa reclamación sobre a puntuación dos cursos de iniciación e perfeccionamento de galego no apartado 3.2. - Quen tivo que convocar a formación para que puntúe?
Administracións públicas con competencias educativas (Consellarías de Educación, Ministerio de Educación, …), universidades, entidades colaboradoras coas administracións educativas, actividades recoñecidas por administracións educativas (como as actividades de formación organizadas pola CIG Ensino) ou, exclusivamente para a especialidade de Música de secundaria e en todas as especialidades do corpo de catedráticos e profesores de música e artes escénicas, os cursos organizados por conservatorios.
- Como puntúa a formación?
0,2 puntos por cursos de 3 ou máis créditos (30 horas ou máis).
0,5 puntos por cursos de 10 ou máis créditos (100 horas ou máis).Os cursos de 2 ou máis créditos e menores de 3 (de entre 20 e 29 horas) puntuaranse, cada dous, con 0,2 puntos.
Os cursos de menos de 2 créditos (20 horas), non puntúan.
- Puntúa a formación impartida?
Non, só a recibida.
- Os certificados dos cursos organizados por universidades teñen que ter algunha particularidade para que puntúen?
Si, estar asinados pola reitoría ou vicerreitoría.
- Se presento un certificado con créditos ECTS, a cantas horas equivale cada crédito?
Cada crédito, 25 horas.