O Tribunal Superior de Xustiza de Galiza vén de darlle, unha vez máis a razón á CIG-Ensino, e ordénalle á Educación a execución forzosa da sentenza do Tribunal Supremo que obriga á Consellaría a ofrecer ao persoal funcionario e laboral e docente os recoñecementos médicos anuais que regula o artigo 22 da Lei de Prevención de Riscos Laborais. O Tribunal dálle á Consellaría de Educación un mes de prazo para executar a sentenza.

O secretario nacional da CIG-Ensino, Anxo Louzao,  deu a coñecer este novo auto  nunha rolda de prensa na que denunciou a actitude “insubmisa, fraudulenta e de desprezo co profesorado” do conselleiro de Educación. É a segunda vez nunha semana que o Tribunal Superior de Xustiza de Galiza lle ordena á Consellaría de Educación a execución forzosa  dunha sentenza . O primeiro foi o auto que  obrigaba á administración educativa galega a cumprir a sentenza que declarou ilegal a realización dunha enquisa ás familias para fixar a lingua vehicular no ensino infantil.

Anxo Louzao insistiu na  “arrogancia, prepotencia e impunidade” coa que actúa o conselleiro de Educación que en lugar de aplicar as sentenzas e garantir un dereito que asiste aos e ás traballadores desde hai 18 anos “mira para outro lado e fai ouvidos xordos. Louzao pediu a súa destitución por ser o “campión do fraude e da mentira”  e por tratar de manipular a opinión pública malia os ditames da xustiza que lle deron a razón á CIG-Ensino. “Esta actitude persistente e reincidente –engadiu- debería implicar non so o seu cese inmediato senón tamén a súa inhabilitación para exercer cargos públicos”.

A CIG-Ensino esixiulle á Consellaría de Educación a cobertura deste dereito á saúde en repetidas ocasións. Diante da negativa de Educación, no ano 2008, o sindicato presentou no Valedor do Pobo unha queixa. A negativa da Consellaría de Educación a garantir este dereito obrigou á CIG-Ensino a presentar no ano 2012 demanda de conflito colectivo na Sala do Social do Tribunal Superior de Xustiza de Galiza que ditou sentenza favorable, unha sentenza que a administración recorreu, sen éxito, no Tribunal Supremo que, en abril de 2013, recoñeceu en sentenza firme este dereito ás e aos traballadores do ensino galego, impoñéndolle costas á Xunta.

A CIG-Ensino denunciou ademais que a Consellaría de Educación, malia ser coñecedora  da sentenza do Tribunal Supremo, no mes de marzo, sacou a concurso unicamente este servizo para o persoal non docente, cando desde 2012 xa llo tiña que ter garantido a todos/as docentes.