O sindicato maioritario no ensino público en Galiza insta ao MEFP e á Consellaría de Educación a convocar de inmediato tanto Mesas Sectoriais como os Consellos de FP para abordar todos os borradores de RD que modifican os actuais títulos de FP básica, Ciclos Medios, Superiores e Cursos de especialización nos que se aborda, entre outras cuestións, a desaparición dos módulos de FOL, EIE e FCT, se inclúen os módulos de nova creación e se incrementa o tempo de permanencia na empresa xa desde primeiro curso, así como tamén todos os proxectos de RD polos que se estabelecen os graos A, B e C de todas as familias profesionais. Para a elaboración de toda esta normativa, de enorme transcendencia e sobre a que este mes de febreiro terá que traballar unha comisión de profesorado en Galiza, non se contou coa opinión docente nin coa da súa representación legal. Así mesmo, critica a Xunta por anunciar que estivo en exposición pública o Decreto polo que se regula a regulación e a ordenación da FP en Galiza desde o pasado 16 de xaneiro, cando non é certo, e por non prever con antelación licenzas por formación e outras medidas que lle permitan ao profesorado preparar contidos e materiais dos novos módulos e graos que se van implantar a partir do vindeiro curso.

O curso 24/25 será outro exemplo de experimentación absoluta coa FP, como xa aconteceu noutras ocasións coa implantación do sistema de calidade e coas sucesivas reformas normativas, pero esta vez de forma totalmente abrupta e todo apunta a que tamén caótica. Mais o principal problema, alén unha vez máis da improvisación das dúas administracións educativas responsábeis e de non ter contado nin coa opinión do profesorado nin coa da súa representación sindical, será que a implantación da nova LOFP, tendo algunha cousa positiva, suporá en xeral un empeoramento na calidade da oferta formativa cando menos na oferta dos graos D e E. 

Ante a pasividade e falta de información oficial por parte da Xunta e do Ministerio, a CIG-Ensino intenta resumir cales son os principais cambios que, segundo o RD 278/2023, do 11 de abril, polo que se estabelece o calendario de implantación do Sistema de Formación Profesional establecido pola Lei Orgánica de FP terían que entrar en vigor en setembro deste ano, aínda que algunhas cuestións xa levan certo retraso. É dicir, tan só quedan 5 meses lectivos antes da súa aplicación e o profesorado, unha vez máis, comezará o vindeiro curso improvisando sobre a marcha sen coñecer con antelación nin poder preparar o que vai impartir. Para aclarar todo isto o sindicato tamén organiza un curso online de 30 horas homologado que se desenvolverá do 5 de marzo ao 4 abril para o que xa está aberta a matrícula na seguinte ligazón.

Galimatías de lexislación

Nestes momentos, polo que lle traslada o profesorado á CIG-Ensino, existe un absoluto descoñecemento nos centros sobre como se van implantar todos estes cambios normativos o vindeiro curso. Nalgunhas familias profesionais hai xa designada unha comisión docente para actualizar os contidos e reaxustar a distribución horaria dos módulos de cada ciclo pero resulta totalmente insólito que, a día de hoxe, a base lexislativa sobre a que teñan que traballar sexan tres borradores de RD (que modifican os RD polos que se estabelecían os títulos formativos de grao básico, medio e superior) que non pasaron aínda pola Mesa Sectorial do Estado. 

Tanto esta normativa como toda a que regula os aspectos específicos dos graos A, B e C das distintas familias profesionais que, lembremos, segundo o calendario de implantación da FP xa tiñan que están ofertándose a comezos deste curso e que seguen en fase de borrador, pode consultarse na seguinte ligazón da páxina do MEFP.

A CIG-Ensino amósase moi crítica con que tampouco se tivera en conta a opinión nin do profesorado nin da súa representación sindical para a elaboración destas normas. De feito, xa ten recibido queixas sobre a ponderación da carga horaria dos módulos de varios certificados profesionais no sentido de que existe un desaxuste absoluto entre as necesidades formativas en cada área. Hai que ter en conta que no RD de ordenación e regulación da FP, en vigor desde o ano pasado, se determina que o profesorado de FP poderá completar horario impartindo formación dos graos A, B e C nos centros públicos con oferta integrada, unha medida coa que a CIG-Ensino se amosou de acordo sempre que isto non supoña unha prolongación da xornada laboral. 

Así mesmo, tal e como se mencionou, existe outro Proxecto de RD polo que se modifica o RD 659/2023 de regulación e ordenación do sistema da formación profesional que vén de rematar o seu trámite de exposición pública e que pode consultarse nesta ligazón.

Mais se o proceder do Ministerio de Educación e Formación Profesional é moi cuestiónabel en canto ao retraso nos procedementos e falta de interlocución coa representación sindical cando menos os seus proxectos normativos están dispoñíbeis publicamente. Non acontece o mesmo co borrador de Decreto polo que se regula a ordenación e a regulación do sistema de FP en Galiza que a Consellaría de Educación anunciou que poñía en exposición pública o pasado 16 de xaneiro até o día 30 e que non pode consultarse no portal de transparencia da Xunta de Galiza. Tan só aparece unha descrición dos antecedentes e dos obxectivos que persegue unha norma que, dado que o RD estatal que ten que adaptar está publicado desde o pasado 12 de abril de 2023 no BOE, xa hai tempo que debera estar consensuada coa representación legal do profesorado galego e publicada no DOG. Neste caso o atraso na adaptación da norma básica do Estado é responsabilidade exclusivamente da Xunta de Galiza.

Demandas da CIG-Ensino 

É por isto que o sindicato maioritario en Galiza lles solicita urxentemente ás dúas administracións educativas a convocatoria de sendas Mesas Sectoriais para abordar como se pretende implantar, e con que incentivos de cara ao profesorado que ten que impartir os novos módulos, esta normativa cando restan só 5 meses para que remate este curso. Agardemos que non aconteza o mesmo que este ano que a Xunta decidiu incluír como obrigatorio o módulo de Inglés profesional en todos os ciclos da modalidade Dual e nestes intres no Banco de Recursos da Consellaría de Educación só existen dous cursos xenéricos deseñados para a FP a distancia con contidos que nada teñen que ver co inglés profesional aplicado aos diferentes sectores produtivos e que mesmo é sorprendente que teñan unha unidade didáctica denominada Gossip at the office. Non é serio que a administración galega pretenda que a súa gran aposta educativa quede de novo nas mans do voluntarismo e da profesionalidade do seu profesorado que, como non se produza unha rectificación inmediata, non coñecerá até o claustro do próximo inicio de curso os módulos que ten que impartir sen tempo nin recursos previos para preparalos. Desde a CIG-Ensino esiximos que este terceiro trimestre se abra unha convocatoria extraordinaria de licenzas por formación para que todo o profesorado de FP, priorizando aquel que teña interese en impartir estes novos módulos, poida preparar os materiais necesarios, alén de reservar un número importante de prazas na vindeira convocatoria do Piale tanto para o persoal docente de FP como o de Inglés de Secundaria co fin de que se actualicen e poidan tamén afondar no dominio deste idioma e, por último, se volvan abrir as estadías formativas en empresas no estranxeiro que desde a pandemia ficaron pechadas e se recupere a modalidade lingüística neste tipo de estadías, que agora si, e non no momento en que a administración as puxo en marcha, terían moita demanda.

Carreira pola dualización intensiva

A CIG-Ensino tamén denuncia a presión á que están sendo sometidas as persoas que ocupan os cargos da dinamización da FP dual para, nun curto espazo de tempo, ter que chegar a acordos con empresas con fin de implantar máis ciclos desta modalidade o vindeiro curso. Para o sindicato, ademais de estar en contra da extensión dunha tipoloxía de ensinanzas que lle outorga un peso preponderante ás empresas, que se está a comprobar que non favorece a inserción laboral do alumnado no mesmo centro de traballo onde cursa estes estudos e de que é un modelo dificilmente adaptábel á estrutura económica galega, esta fuxida cara adiante da Consellaría terá graves consecuencias no prestixio que acadaron estas ensinanzas nos últimos anos. 

O Centro Galego da Innovación da FP Eduardo Barreiros, propaganda e opacidade 

A CIG-Ensino tamén esixirá información sobre o persoal que nestes intres está a traballar neste centro ubicado en Ourense, e que mantén a súa polémica estrutura dependente en boa medida da Deputación, reiterando a petición de datos sobre cantas persoas foron seleccionadas directamente pola Consellaría e cantas accederon a prazas mediante concurso. Así mesmo, solicitará que se lle informe do estado dos distintos proxectos que se están a levar a cabo nel porque na maior parte dos centros de Galiza descoñecen en que se está traballando e con que finalidade, alén de verse obrigados a participar en proxectos como o InnovaTech e outros de transferencia tecnolóxica ás empresas nos que, lamentan, perden toda a propiedade intelectual e o control sobre o traballo realizado co seu alumnado.