Estando xa suficientemente clara a posición da CIG-Ensino ao respecto de como se debería ter lexislado a integración do corpo de PTFP no corpo de PES, o sindicato centrou as súas intervencións na Mesa Docente estatal na formulación  dunha serie de propostas conducentes a dar plenas garantías e celeridade ao proceso de integración para todo aquel profesorado que cumpra cos requisitos de titulación para se integrar no corpo de PES, en propoñer alternativas para quen queda fóra e para o profesorado interino, así como para que non haxa ningunha dúbida de que todos os efectos (retributivos e non só administrativos) se recoñezan no texto.

Melloras relacionadas co profesorado que reúne os requisitos para integrarse no corpo de PES

• Modificar o artigo 3.3, permitindo que poida solicitar a integración todo o profesorado, con independencia da súa situación administrativa, incluído quen estea en excedencia por interese particular. A integración efectiva neste caso sería desde a data na que decidise solicitar o reingreso. Isto implicaría eliminar o artigo 12 e trasladar o seu apartado 2 como apartado 4 do artigo 3.
• Modificar o artigo 4.1, indicando que o prazo no que as administracións educativas deben publicar as convocatorias será nos 20 días hábiles posteriores á publicación do real decreto no BOE. Un maior retraso na publicación pode impedir que algún profesorado se integre se ten pensado xubilarse a finais de ano.
• Modificar o artigo 7.1, indicando expresamente que os efectos son retributivos e administrativos desde o 19 de xaneiro de 2021. Estes efectos tamén se lle deben aplicar a quen desde esa data cambiaron de corpo e accederon ao de PES por promoción interna.
• Tamén recollemos a proposta de que se teña en conta que o profesorado destinado provisionalmente noutra CC.AA. (comisións de saúde, por exemplo) teña que participar na comunidade de orixe, que é a que ten o seu expediente e na que se debe integrar formalmente.

Melloras relacionadas co profesorado interino e recentemente incorporado ao corpo de PTFP

A xurisprudencia do TXUE é clara ao respecto de que non se pode dar un trato diferente ao persoal temporal ao respecto do fixo. Foi unha demanda da CIG-Ensino a que levou a unha sentenza do alto tribunal europeo na que se recoñecía o efecto retroactivo do pago dos trienios ao profesorado interino no ano 2007.

O proceso de integración debe ser, con todos os efectos, tanto a quen é funcionariado de carreira ou en prácticas como a quen é interino. Facelo doutro xeito, tamén con referencia a data dos efectos de integración, sería unha ilegalidade. Neste sentido, a CIG-Ensino considera que o RD debe incorporar referencias claras para a aplicación de todos os dereitos e recoñecemento ao persoal interino. 

Tamén entendemos que se comete unha inxustiza co profesorado que aprobou as oposicións no ano 2021.

Por tanto, propomos:

Incorporar no artigo 7 un novo apartado 3 no que se regule que:

• O profesorado que tivese ingresado no corpo a extinguir de PTFP con posterioridade ao 19 de xaneiro de 2021 (nas oposicións de 2021 ou nestas de 2022 noutras CC.AA.) e que estivese traballando como profesorado interino nesa altura, se teña como data de efectos da integración a de xaneiro de 2021 e non, como figura no texto, a do nomeamento no corpo.

• O profesorado en idéntica situación á anterior sen servizos previos como interino, teña como data de efectos a da toma de posesión do seu destino como funcionariado en prácticas.

Incluír unha nova Disposición Adicional 1ª no RD na que se regule que:

• O profesorado interino das especialidades que se integran no corpo de PES verán recoñecidos os mesmos dereitos e coa mesma data de efectos que o que lle corresponder ao funcionariado de carreira: desde xaneiro de 2021 se traballaba naquela data ou desde que se incorporou a traballar, se foi nun momento posterior.

Ao respecto do profesorado interino das 19 especialidades que se integran no corpo de PES e poden carecer de titulación, propoñemos que se regule un período transitorio para que poidan acceder, como se fixo hai anos co RD 777/1998. En todo caso, e de non se aceptar esta proposta, defenderemos no ámbito galego, que é o que ten competencias para a xestión das listas de interinidades, que se poida manter nestas listas nas condicións nas que están na actualidade. Cónstanos que no caso galego a incidencia é escasa mais non así noutras CC.AA., de aí que trouxeramos esta proposta á Mesa.

Melloras relacionadas co profesorado a extinguir que non poida integrarse no corpo de PES

Incorporar, dentro da Disposición Final 3ª, unha nova Disposición Transitoria 4ª no RD 1364/2010 de concurso de traslados que recolla:

• que o profesorado declarado a extinguir no corpo de PTFP que non se integre no corpo de PES poderá continuar nos seus postos definitivos indefinidamente.

• que este mesmo profesorado poderá exercer a mobilidade nos concursos de traslados a prazas da especialidade correspondente nos corpos docentes nos que esa especialidade se integrou.

• esta mesma garantía de mobilidade para o profesorado a extinguir tamén se debe recoñecer no caso de supresión ou desprazamento por falta de horario.

Incorporar, dentro da Disposición Final 3ª, unha nova Disposición Transitoria 5ª no RD 1364/2010 na que se regule que poderán solicitar prazas das dez especialidades do corpo de Profesorado Especialista de Sectores Singulares da Formación Profesional (PESSFP):

• o profesorado deste novo corpo
• o que quede a extinguir no corpo de PTFP
• o que, con carácter individual, segundo se recolle na Disposición transitorias 5ª do borrador, se integren no corpo de PES.

Propoñemos unha nova redacción do artigo 10^[1]. A proposta polo Ministerio (sobre profesorado do corpo de PTFP que teña máis de unha especialidade) aclara que a garantía do atribución docente será para quen se integre no corpo de PES naquelas especialidades que posúa. Cremos que a nova redacción non mellora a anterior, máis ampla, xa que tal e como estaba redactada mantiña a atribución docente en xeral e, por tanto, tanto para quen se integre no corpo de PES como quen quede a extinguir. De se manter esta redacción solicitamos que se incorpore o seguinte:

“O profesorado que quede a extinguir no corpo de PTFP manterá, a todos os efectos, a atribución docente que teña recoñecida”.

Defendemos un proceso de integración aberto e que abra as portas máis alá de xaneiro de 2026

En coherencia coa nosa posición sindical desde o comezo da tramitación do que hoxe se presenta neste RD, consideramos que o MEFP debe abrir vías para que quen non poida integrarse nin neste período ordinario nin no prazo aberto até xaneiro de 2026, poida facelo con posterioridade.

Así, propoñemos:

• Modificar o RD 276/2007 para incorporar a vía do cambio de corpo para aquel profesorado declarado a extinguir pola modalidade de concurso de méritos, como acontece actualmente co acceso ao corpo de cátedras, limitado á mesma especialidade correspondente á declarada a extinguir. Esta posición da CIG, que nos gustaría facer extensiva a outros corpos nunha futura negociación do RD de concurso de traslados, é de urxencia neste momento, xa que demostraría que o Ministerio opta por estender, máis alá do marco temporal do 2026, a posíbel integración de quen acade a titulación exixida máis adiante. 

Unha vez pechada a normativa de integración, manteremos a nosa táboa reivindicativa

As propostas da CIG-Ensino en todo este tempo e que non teñen acollida neste RD mais que servirían para buscar a equiparación de dereitos de todo o profesorado que imparte en FP, seguirán plenamente vixentes logo do proceso de integración e demandamos do MEFP empatía e consideración para quen quede fóra da integración.

Ben sexa a nivel estatal ou autonómico, segundo corresponda competencialmente, defendemos e defenderemos que se adopten medidas conducentes a que o profesorado que así o desexe poida ter facilidades para acadar unha titulación universitaria e para que a igual traballo se corresponda o mesmo salario. Reproducimos nesta Mesa as propostas que xa presentamos na última:

• Licenzas por estudo: as administracións educativas deben promover a concesión de licenzas por ampliación de estudos para o profesorado de FP que careza da titulación universitaria que permitiría a súa integración no corpo de PES.

• Convalidación de experiencia profesional. Lexislar a convalidación de créditos universitarios, tanto pola titulación superior de FP ou o certificado oficial de formación pedagóxica como pola impartición de docencia no sector público da Formación Profesional. 

• Complemento compensador: todo o profesorado de FP debe ter dereito a percibir as mesmas retribucións. Quen quede fóra do corpo de PES debe ter dereito ao cobro dun complemento compensador, tanto o profesorado das para 10 especialidades de PESSFP como o profesorado declarado a extinguir no corpo de PTFP.

• Profesorado interino. O profesorado interino debe ver preservados os seus dereitos á continuidade nas mesmas condicións que na actualidade. Para a CIG-Ensino non hai dúbida ao respecto da transformación directa das listas das especialidades de PTFP nas correspondentes de PES e PESSFP mais debe garantirse tamén para quen careza de titulación. 

Puntuación nos concursos de traslados do tempo traballado como persoal interino

Solicitamos a modificación do baremo do Real Decreto de concurso de traslados para adaptalo á normativa europea.

A CIG-Ensino leva desde o ano 2014 instando ao Ministerio a adaptar o baremo do RD 1364/2010 de concurso de traslados para adaptalo á normativa europea pola cal se debe dar un mesmo trato ao persoal temporal que ao fixo.

En Galiza existe este recoñecemento desde o ese ano, cunha sentenza do TSXG. O Ministerio non tivo en conta a nosa demanda en todos estes anos, o que máis alá da ilegalidade na que consideramos se está a incorrer, crea no ámbito galego un problema co profesorado que entra ou sae vía concurso de traslados.

Por iso consideramos que, xa que agora se vai modificar o RD, é o momento oportuno para facer eses cambios, que se concretan en:

Anexo I. Baremo dos corpos docentes: eliminar “de carreira” nos apartados 1.1.1, 1.1.3, 1.2.1 e 1.2.3

Anexo II. Baremo da Inspección: eliminar “de carreira” nos apartados 1.1, 1.3.1, e 1.3.2

Non o facer agora vai implicar unha fonte de conflitos e de reclamacións por parte do profesorado interino do conxunto do estado (non así quen aprobe ou concurse no futuro para Galiza) cando participe nos concursos de traslados.

Tarde e arrastro, tamén mal?

En resumo, para a CIG-Ensino, un proceso que chega tarde e arrastro podería mellorar moito se se aplicasen as nosas propostas. A nivel galego, se o Ministerio non fai nada, promoveremos que a Consellaría teña en conta as mesmas propostas naquilo que ten competencias:

• Publicar a convocatoria de integración no menor prazo posíbel unha vez publicado no BOE o RD.
• Que non exista obriga de presentar documentación coa titulación se esta figura en “datos persoais”.
• Que se garanta a todos os efectos a integración e con pago no primeiro mes posterior á resolución definitiva.
• Que se lle recoñezan os mesmos dereitos ao profesorado en prácticas e interino.
• Que o profesorado que poida carecer de titulación se manteña en listas transitoriamente.
• Que, de existir marxe legal, se permita que quen estea en excedencia por interese particular poida, sen necesidade de chegar a incorporarse, a integración, sen efectos até que decida incorporarse.
• Que se oferten licenzas de estudos para completar estudos universitarios ao profesorado que careza delas, co obxectivo de conseguir a integración antes de 2026.

^[1] Nova redacción do artigo 10 no 2º borrador do RD remitido polo MEFP para a Mesa do 26 de maio de 2022.

Artículo 10. Profesorado con más de una especialidad.

El profesorado del cuerpo a extinguir de profesores técnicos de formación profesional que posea más de una especialidad en ese cuerpo, y pase a estar integrado en el cuerpo de profesores de enseñanza secundaria, mantendrá la atribución docente como profesor de enseñanza secundaria en aquellas especialidades del cuerpo a extinguir de profesores técnicos de las que sea titular a fecha de su integración.