As universidades galegas presentaron unha proposta ás organizacións sindicais con representación na Comisión Paritaria do II Convenio Colectivo que, en resumo, se limitaba a adaptar á LOSU as figuras profesionais recollidas no convenio, ao tempo que incluía unha proposta para fixar a xubilación forzosa do PDI laboral nas mesmas condicións que ten o PDI funcionario.

A CIG amosou a súa discrepancia co feito de que a proposta non recollese a adaptación a outros cambios lexislativos que tamén se debe traspoñer no convenio (EBEP, Lei do Emprego Público de Galiza ou Lei da Ciencia) e que pola contra incorporase o tema da xubilación, que xa presentaron hai dous anos, advertindo a CIG naquel momento que non podía empregarse a vía da Comisión Paritaria para aprobar o cambio, sendo precisa unha modificación do Convenio Colectivo nese artigo, a través dunha Comisión Negociadora. Neste sentido, a CIG expresou a súa proposta de negociación dun novo convenio colectivo que dea resposta ás demandas do PDI Laboral.

As universidades alegaron dous motivos para non abrir as negociacións dese novo convenio: as incertezas do que poida dar de si un futuro Estatuto estatal do PDI e a posibilidade de que se aprobe unha nova lei galega de Universidades, podendo condicionar totalmente ambas normas o futuro novo convenio.

A CIG expuxo a necesidade de abrir de todas formas esas negociacións, sendo conscientes de que aspectos fundamentais como a carreira profesional ou cambios nos complementos retributivos van depender doutros protagonistas que non se sentan na mesa de negociación mais que condicionan todo, especialmente a Xunta de Galiza, que aínda ten pendente, entre outras, a reforma do actual Decreto 55/2004, no que se regulan os complementos autonómicos e que podería modificarse no ano 2025 segundo información recabada polo sindicato na Consellaría de Educación. Entendemos que se dan as condicións para comezar a negociar o convenio na súa integridade nun prazo breve e tendo presente eses condicionantes.

No debate, a CIG amosouse partidaria de avanzar con carácter inmediato na adaptación do actual convenio, cun acordo no seo da Paritaria, para adaptarse a todos os cambios lexislativos (e non só á LOSU) ao tempo que entende que se deben aclarar algunhas cuestións que a día de hoxe xeran discrepancias no propio texto polas diferentes prácticas de cada universidade. Sendo isto así, a CIG non podería pasar sen que se pactase a apertura de negociacións para un novo convenio.

Tras un receso para deliberar sobre a posición sindical, as universidades trasladaron estar dispostas a esa proposta e, polo tanto, prepararán un novo texto no que se incorporarán todas as adaptación lexislativas, aberto a unha revisión sindical nunha próxima reunión antes de final de ano e, nesa xuntanza proporán unha data para comezar a negociar un novo convenio colectivo.