O texto da convocatoria xa foi remitido ao DOG e será publicado nos próximos días. 

A administración anunciou en mesa sectorial que, tal e como solicitaba a CIG-Ensino, ao persoal que traballou en Orientación de Primaria  ou Prácticas e Actividades puntuaralle a experiencia como traballado na lista de procedencia.

Unha vez que se produciu o retraso pola publicación do RD de integración de PTFP e volvemos ter Mesa solicitamos información sobre a decisión da Consellaría ante determinadas propostas feitas pola CIG-Ensino na anterior reunión: 

• Puntuación pola experiencia en especialidades como Orientación de Primaria ou Prácticas e Actividades do extinto corpo de PTFP. A Consellaría informa que en Orientación vai baremar a antigüidade na especialidade pola que se accedeu á lista. No caso de Prácticas e Actividades puntuaránlle como tempo traballado en Servizos á Comunidade ao profesorado que accedeu desde esta lista.
• Acreditación e puntuación de galego. Puntuación do nivel C1 de galego en EOI e de cursos de iniciación e perfeccionamento de galego no apartado de formación cando se presente a validación do CELGA-4 por outra vía (ex: ter cursado Bacharelato). Finalmente a Consellaría non puntuará ningún deles ao entender que é un requisito da convocatoria, aínda que este se reúna por máis dunha vía.
• Idade forzosa de xubilación: cal vai ser a data a ter en conta para poder presentarse ao concurso excepcional: 65 anos como figura aínda na lei, 66 e 2 meses no 2022, no prazo de presentación de solicitudes, ou 66 e 4 meses a 1 de setembro de 2023, data para poder ser nomeado de funcionariado de carreira? A Consellaría indica que terán en conta a idade de xubilación para a seguridade social no prazo de presentación de instancias (66 anos e 2 meses para 2022) e que non podería ser nomeado funcionariado de carreira quen na data efectiva superase a idade máxima de xubilación (66 anos e 4 meses en setembro de 2023). 
• tempo de experiencia para acreditar a tutela investigadora en especialidades vinculadas ás ensinanzas artísticas superiores. A Consellaría confirma que o tempo será 2 cursos académicos completos ou 12 meses en períodos continuos ou descontinuos.
• Puntuación do tempo traballado nos CMUS superiores antes da apertura das listas de interinidades do corpo de cátedras. Confirman que o tempo traballado con nomeamento do corpo de profesorado, aínda que fose facendo as funcións de cátedras, non puntuarán como deste último corpo senón como do corpo que figura no nomeamento.