Con carácter xeral concédeselle ás mulleres que teñan dereito a unha prestación contributiva, que recibirán unha contía anual por cada fillo ou filla que tiveran até o límite de catro. Os homes poderán recibilo só nalgunhas circunstancias e no caso da xubilación anticipada só é compatíbel coa do réxime xeral, non co de clases pasivas.

Desde o pasado 4 de febreiro vén aplicándose nas xubilacións un novo complemento destinado a reducir a diferenza na contía das pensións por razóns de xénero. Nestes momentos esta diferenza ascende ao 30% de media e, segundo establece a normativa que o regula, estará en vigor até que a diferenza entre a pensión media das mulleres con respecto aos homes se reduza até o 5%. O goberno central aprobou este complemento que substitúe o anterior complemento de maternidade, vixente desde o ano 2016, e que se diferencia deste en varias cuestións:

• En primeiro lugar  este complemento recoñécese, de entrada, a todas as mulleres que tiveran un ou máis fillos ou fillas e que cobren unha pensión contributiva (xubilación, incapacidade permanente e viuvez), sen esixirse ningún outro requisito. No anterior era a partir do segundo fillo ou filla.

• O complemento consiste nunha contía fixa por cada fillo ou filla (378€ anuais en 14 pagas co valor de 2021) e que se revalorizará anualmente ao igual que as pensió O tope sitúase en catro fillos ou fillas (1.512€ anuais). O importe non se terá en conta para a aplicación do límite máximo das pensións.

• É un complementodestinado ás mulleres debido á incidencia xeral que ten a fenda de xénero no importe das pensións contributivas. Os homes poden acceder a este complemento só en casos limitados (viuvez con fillos ou fillas en común con dereito a pensión de orfandade ou ter interrompido ou reducida a súa carreira profesional polo nacemento ou adopción, e sempre cunha serie de condicións adicionais).   

• É un complemento que se concede ao proxenitor que máis prexudicada teña a súa carreira laboral. No suposto de que ningún sufrise un prexuízo nas súas cotizacións para a xubilación, o complemento recoñeceráselle á nai ou, caso de ser unha parella do mesmo xénero, a aquela persoa con menor pensió 

• O complemento substitúe o anterior de maternidade, que se fixaba en porcentaxes sobre a pensión persoal (5% con 2 fillos/as; 10%con 3 e  15% a partir de 4). Quen tivese recoñecido este complemento poderá optar por mantelo ou cambiar para o novo, segundo lle sexa máis beneficioso. 

Docentes de Clases Pasivas con xubilación anticipada, excluídas.

Unha das novidades deste novo complemento é que, ao respecto do anterior, si inclúe a xubilación anticipada, mais restrinxida a quen pertenzan ao réxime xeral da Seguridade Social (RXSS), e  non se incorpora este dereito á xubilación anticipada de clases pasivas (CC.PP.)

Tendo en conta as reducións económicas que implica adiantar a xubilación no RXSS e que a totalidade das xubilacións anticipadas no profesorado galego son actualmente de CC.PP., a consecuencia será que ningunha docente que se acolla á xubilación anticipada poderá incorporar este novo complemento de redución de fenda de xénero. Isto implica unha discriminación das mestras e profesoras e outras categorías funcionarias de Clases Pasivas.

O sindicato trasladou unha consulta ao Ministerio e a resposta obtida só pode ser considerada de insatisfactoria e incoherente.

Desde o sindicato consideramos que moitas mulleres ensinantes viron reducida a súa traxectoria profesional ou cotización debido a renuncias, reducións de xornada ou incorporacións tardías á docencia por coidado de fillos e fillas  e que iso debería ser considerado tamén como fenda de xénero. Por outro lado hai que ter en conta que o propio Goberno do Estado non vincula este complemento a ningún tope de pensión e que en Clases Pasivas non  só hai grupos superiores (A1 e A2 únicos na docencia) senón tamén outros grupos con pensións inferiores. Por último no esquezamos que o menor tempo de cotización e vida laboral que afrontan algunhas mulleres pola súa maternidade tamén as leva, en ocasións, a acollerse á xubilación anticipada sen chegar ao tope da pensión do seu grupo. O sindicato promoverá iniciativas para que o Goberno rectifique e estenda este complemento a todas as mulleres por igual.