1.101 prazas a concurso excepcional e 115 prazas de concurso oposición  que se sumarán coas xubilacións deste ano 2022 para o concurso oposición a celebrar no verán do 2023 (seguramente ao redor dunhas 1.000 prazas). Esta é magnitude da rectificación da Consellaría de Educación, que pasou de falar dunhas 500 prazas a concurso e un número moi inferior a concurso oposición a duplicar as prazas do concurso.

Na Mesa a Consellaría deu resposta ás alegacións da CIG-Ensino.

Como xa dixemos, os criterios xerais da Consellaría coinciden en liñas xerais cos propostos pola CIG-Ensino mais existen discrepancias nas que insistiu o sindicato.

• A Consellaría aceptou parcialmente a nosa solicitude de que non se tivesen en conta as reducións de cargos directivos. Só terán en conta os centros clasificados como tipo A exceptuando os centros de infantil e primaria. Afirman que nestes centros os integrantes da dirección teñen redución total ou, cando menos, de 14 horas. A CIG-Ensino considera como positivo o cambio, xa que permite ofertar máis prazas, mais insiste en que esa redución non afecta por igual en todas as especialidades. De aí que o sindicato propuxese que esa posíbel redución se revisase por especialidades, sen aplicar os desconto de prazas xeral. A Consellaría alegou que ten que incorporar unha norma que sexa “coherente e igual” e que se aplique con carácter xeral “por seguridade xurídica”.

• Transparencia nos datos. A Consellaría vai proporcionar os datos que lle solicitou a CIG-Ensino: se xa no documento entregado na Mesa aparecen diferenciadas as prazas totais por especialidade pola súa procedencia (DA6, DA8 e Artigo 2), tamén se comprometeron a remitirnos a relación completa, praza a praza, centro a centro, para poder revisalas e presentar alegacións se consideramos que hai máis prazas que deben saír. A CIG-Ensino solicitou que, a maiores, na relación de prazas ocupadas por profesorado definitivo con reserva de posto se indique o motivo (permisos sindicais, comisións de servizo etc).

• O carácter estrutural das prazas e o cálculo das praza temporais. A CIG-Ensino insistiu en que as prazas derivadas da DA6 poderían partir do cómputo de todas as prazas adxudicadas no CADP e non só do persoal interino. De feito, o texto da Lei, como xa lle fixemos ver á Consellaría, non indica na DA6 que o persoal que as ocupe teña que ser “de natureza temporal”. Non podemos garantir que así se obtivesen máis prazas xa que tamén aumentaría moito o número de prazas a descontar polo profesorado con reserva de posto de traballo, mais consideramos que é un criterio menos arbitrario. Tamén hai discrepancia na revisión do carácter estrutural curso a curso e a Consellaría mantén este criterio. 

• A data de referencia para o cálculo das prazas. A Consellaría non acepta mudar o reconto de prazas a 30/09/2021. A CIG-Ensino considera que a data debe ser a que se fixa como referencia na lei (decembro de 2020). Que diferenza hai? Na data que nós propoñemos (decembro de 2020) había un maior número de prazas ocupadas por persoal interino, o que elevaría a oferta de prazas para ambas OPE (concurso e oposición). Por que non a acepta a Consellaría? Por dous motivos:

• O argumento legal está claro e é unha escusa perfecta: o acordo sindical do Goberno estatal con CCOO, UGT e CSIF, que se traspón literalmente na Lei, di expresamente que “da resolución dos procesos de estabilización non poderá derivarse, en ningún caso, incremento de custo nin de efectivos”. De se computar na data proposta pola CIG-Ensino, a Consellaría afirma que se ampliarían os cadros docentes e se ofertarían máis prazas que profesorado interino hai no cómputo global. Isto é o resultado de non eliminar a taxa de reposición e de aceptar o “mantra” (xa por terceiro acordo consecutivo) de que o límite actual de persoal no sector público, tamén do profesorado, non se toca.
• Con todo, temos claro que a Consellaría non tiña nin a menor intención de incrementar docentes aínda que puidese. Temos hoxe menos profesorado que cando Feijóo chegou ao poder.

• Situación do profesorado que imparte docencia en especialidades que non poden ser convocadas. A Consellaría afirma que non poden ser ofertadas e que non teñen outra alternativa. As especialidades máis afectadas son Orientación no corpo de mestres e Prácticas e actividades no extinto corpo de PTFP, aínda que tamén hai máis especialidades cunha incidencia reducida. 

• Profesorado especialista. A CIG-Ensino solicitara maior concreción. Na listaxe entregada aparecen en vermello as especialidades ocupadas con profesorado interino con nomeamento como profesorado especialista. Nestas non convocarán oposición nin concurso.

• Prazas da quenda de discapacidade no concurso. No caso improbábel de que quedasen libres  pasarían á quenda libre, como no concurso oposición ordinario.

Cadro resumo das prazas.

Información entregada pola Consellaría ao comezo da reunión.

Cadro resumo.

Ligazón ao cadro resumo

Listados por especialidades, concurso excepcional e concurso oposición extraordinario.

Ligazón aos listados.

Todos os datos para revisar as prazas ofertadas pola Consellaría.

Documentos feitos a partir da información remitida pola Consellaría.

Ligazón á  nova

Varios da Mesa Sectorial.

Ligazón ao CIG Informa cos varios da mesa.

Cobertura das baixas.

Día tras día a Consellaría borra unha media de 20 baixas subidas polos centros educativos. En concreto, tal e como constata o sindicato no seguimento que fai diariamente desta problemática, como polas numerosas queixas que lle chegan de persoal substituto, elimina todas as baixas que non superen os 10 días, sen importarlle que sexan por positivo Covid ou non. Cómpre lembrarlle á Consellaría que se un equipo directivo sube unha vacante é porque a precisa, polo que está vulnerando o lexítimo dereito do alumnado e do centro educativo a recibir a atención que necesitan.

Desde a CIG-Ensino esixímoslle á administración unha rectificación urxente nesta política de cobertura das baixas e que sigan realizando os chamamentos todos os días. Así mesmo, animamos os centros educativos a que sigan subindo todas as vacantes que precisen, sexa cal sexa a súa duración e causa, incluso que as volvan subir despois de que llas borren, como xa detectamos que están a facer nalgún colexio ou instituto.

Din que xa estamos nunha situación postcovid, e que así van actuar salvo en casos excepcionais.

Modificación do perfil das prazas nos centros durante o curso escolar.

Levamos un tempo en que a inspeccións modifica os perfís de certas páxinas a súa vontade, nomeadamente as prazas de orientación.

 Non é de recibo que nunha praza sen itinerancia se presione á docente para que acepte que durante este curso se varíe o perfil e se converta en itinerante, sen darlle sequera a posibilidade de participar como suprimida no CXT, algo que por dereito lle pertence, esperemos que esta situación non se repita e, sobre todo, que ao finalizar o curso se lle dea a posibilidade de suprimirse.

Último exemplo: A praza de Orientación do CPI dos Dices (Rois) foi adxudicada no CXT como unha praza sen compartir. A día de hoxe a titular da praza fai parte do seu horario noutro centro, no CEIP Plurilingüe de Pumar-Urdilde como centro adscrito, sen que conste en ningún lugar esta situación.  Esta situación causa grave prexuízo ás necesidades que o CPI dos Dices presenta, e tampouco son suficientes as horas que se lle adican ao CEIP Plurilingüe de Pumar Urdilde, causando prexuízo a ambos centros. 

Segundo o subdirector de centros e recursos humanos de modificarse o perfil, pasar a ser itinerante, o profesorado definitivo ten dereito ser suprimido, tal cal nós esixíamos.

Redución de oferta no Val do Asma (Chantada) e no Gregorio Fernández (Sarria).

Na mesa do 9 de marzo se nos comunica que o IES Val do Asma non pasará a ser un CIFP, pero que van agrupar ensinanzas de FP nel, o cal para a CIG-Ensino é poñerlle data de caducidade a este centro.

Tamén vemos como se modificou, xa neste curso a oferta de Formación Profesional no IES Gregorio Fernández, pasando de ordinaria a modular, o cal, adianta a desaparición destas ensinanzas no citado IES.

Tema da Secretaria Xeral, o director xeral di que a día de hoxe non ten constancia de cambio algún.

Inclusión da Prevención do risco suicida no Plan de Alerta Escolar.

Entendemos o paso dado como positivo xa que é un primeiro paso para recoller a nosa demanda sobre a necesidade de concretar actuacións para salvagardar a saúde mental de profesorado e alumnado, pero iso, é un paso insuficiente que se ten que vir acompañado de persoal con formación específica nos centros educativos, así como atención e formación específica para o profesorado e non cun novo protocolo como adoita facer a Consellaría.

Prazas de atención preferente.

A idea da administración é convocar este ano prazas de atención preferente, a orde virá á mesa posteriormente á publicación das resolucións definitivas do CXT, que está prevista para a vindeira semana.

Normativa Oposicións.

A currículo de aplicación para as oposicións é o currículo en vigor no momento da publicación da convocatoria, é dicir, o vello.