Presentouse en Santiago a edición 2010 do Correlingua, unha actividade que se celebra de xeito regular desde o curso 2000-2001, consistente en diferentes carreiras que se celebran en 14 vilas de Galiza, e na que se prevé unha participación de 45.000 rapaces e rapazas procedentes de centros educativos de todo o País.

 45.000 rapaces participarán na edición 2010 do correlingua

As carreiras pola lingua comezarán o día 3 de maio en Compostela e rematarán en Vigo o 14, 
percorrendo 14 comarcas galegas baixo o lema “Galego: a forza do noso amor”

45.000 rapaces participarán na edición 2010 do correlingua from cig-ensino on Vimeo.

Presentouse en Santiago a edición 2010 do Correlingua, unha actividade que se celebra de xeito regular desde o curso 2000-2001, consistente en diferentes carreiras que se celebran en 14 vilas de Galiza, e na que se prevé unha participación de 45.000 rapaces e rapazas procedentes de centros educativos de todo o País.

O Correlingua está organizado pola Asociación Socio-Pedagóxica Galega (AS-PG), a Confederación Intersindical Galega – Ensino (CIG-Ensino), a Mesa pola Normalización Lingüística, e os Concellos de Lugo, Pontevedra, Santiago e Vigo, e conta tamén coa colaboración das Deputacións de Lugo, A Coruña e Ourense, así como os distintos concellos en que ten lugar a actividade, representados no acto de presentación polos Concellos da Coruña e Ourense. As entidades organizadoras veñen realizando esta actividade escolar como proposta de carácter lúdico-educativo que pretende convidar á mocidade e aos centros de ensino a participar nun acto público de reivindicación do dereito a medrar en galego e tamén a exercer de maneira efectiva como galegos e galegas a través do uso do noso idioma, única forma de garantir o seu futuro. Trátase de darlle protagonismo social e voz ao sector fundamental no proceso de normalización da lingua galega e que debe ter un papel activo no mesmo.

Para este ano acordouse que o lema das carreiras fose “Galego: a forza do noso amor”, nunha clara referencia ao autor homenaxeado este ano, Uxío Novoneyra, un poeta comprometido coa súa lingua e a súa cultura, que nos deixou un legado extraordinario a través da súa obra e do seu exemplo de compromiso co idioma.

No acto de entrega de premios, o Secretario Xeral da CIG-Ensino e co-organizadora do Correlingua, Anxo Louzao, agradeceu o profesorado a dedicación e o esforzo na colaboración co Correlingua, e tamén lle agradceu ás institucións colaboradoras que continúan apoiando o proxecto.

Ermitas Valencia, concelleira de normalización lingüística da Coruña, destacou a importancia da implicación dos organizadores e dos participantes facendo visíbel nas rúas estes traballo e a reivindicación de vivirmos en galego.

O presidente da Mesa pola Normalización Lingüística, Carlos Callón felicitou os mozos e mozas presentes pola súa defensa activa da lingua animándoos a continuar e sinalando que esta actividade de normalización xa non conta coa colaboración dalgunhas das institucións ás que lles corresponde a promoción do idioma.

Na presentación de hoxe, entregáronse tamén os premios dos concursos de Manifesto do Correlingua 2010 e de Banda deseñada que recaeron IES Porta da Auga de Ribadeo e CPI Bergantiños de Carballo, respectivamente, resultando finalistas IES Xoán Montes de Lugo e CPI de Pontecesures. Os gañadores e os finalistas recibiron como premio a participación no Proxecto Terra organizado polo Colexio de Arquitectos e os movementos de renovacións pedagóxica, como a AS-PG e que consistirá nunha viaxe de dous dias a Allariz e ás Fragas do Eume.

O manifesto gañador, comeza dicindo que as e os participantes na carreira son o grande equipo do Correlingua e que asumen a máxima de Manuel Antonio: “A nosa fala é nosa, pospola a calquera outra é unha forma de suicidio”. No manifesto o alumnado declara o seu desacordo coa proposta de Decreto que limita o uso do noso idioma e declaran: “falar queremos galego, como os noso antepasados”. Neste manifesto poético non faltan as referencias a Uxío Novoneyra ou Rosalía Castro para rematar cunha exclamación final: Queremos galego na escola!

Tamén nesta edición contamos coa colaboración do colectivo Komunicando co que se puxo en marcha o Cantalingua, un concurso musical no que participan máis de 40 grupos, entre eles grupos xa coñecidos no panorama musical galego ou un centro escolar (IES Escolas Proval) que compuxeron unha peza para a ocasión. O concurso consiste en que o alumnado pode votar directamente ao grupo que lle gustaría que actuase nas festas finais do Corrlingua. E ese será precisamente o premio, actuar nas festas finais.

As festas finais contarán tamén cos espectáculos festivos e teatrais de Fantoche Baj e Chévere.

 

 

CALENDARIO CORRELINGUA:

 

03/05/2010 Santiago de Compostela

04/05/2010 Ourense

05/05/2010 Ribadeo

05/05/2010 Monforte de Lemas

06/05/2010 A Estrada

06/05/2010 Tomiño

07/05/2010 Ferrol

10/05/2010 Vilagarcía

10/05/2010 Rianxo

11/05/2010 Verín

11/05/2010 Pontevedra

12/05/2010 Lugo.

13/05/2010 A Coruña

14/05/2010 Vigo

 

 

TEXTO DO MANIFESTO GAÑADOR

AUTORES: GRUPO 2º DA ESO. IES PORTA DA AUGA DE RIBADEO.

 

Somos un grande equipo, o Equipo do Correlingua.

Os que desde A Coruña, Baixo Miño, Ferrol, Vigo, A Mariña, Pontevedra, Lugo, O Salnés, Ourense e Santiago xuntamos as nosas voces para berrar alto e forte:

 “ Galiza, a forza do noso amor non pode ser inútil”.

A nosa proposta é clara, díxonola Manuel Antonio:

“A nosa fala é nosa, pospola a calquera outra é unha forma de suicidio”

Libraremos a batalla se libres quixermos ser

facéndolle honor ao seu lema, evitando o xenocidio.

Feixoo co seu “Decretazo”

pretende facernos memos

vendéndonos trilingüismo

para evitar o galego

O xogo non será fácil, os adversarios son traidores,

pero temos xuventude,

somos moitos, somos fortes;

xogamos no noso campo e temos por adestradores

a Pondal, a Rosalía,  a Daniel e Airas Nunes.

Rompamos as barrreiras,

xa estamos fartos:

Falar queremos galego

como os nosos antepasados

  

Zoa no ar un tempo de represión.

Mais Galiza, non teñas medo, que te imos defender

“Nunca máis” permitiremos que eses verdugos crueis

amordacen a túa lingua, nos repriman por ser fieis.

Formamos un bo equipo disposto a te protexer.

A vitoria está cantada, o xogo témolo nós.

Xa toca a “Alba de Gloria” do noso querido Daniel

oxalá que co seu “Ollo de vidro” el nos estea a ver

e poidamos redimilo do seu destino tan cruel.

 Dabondo nos maltrataron

nos anos da Ditadura

á que pretenden regresarnos

vendéndonos inter-cultura.

O inglés, ninguén dubida,

lingua moi útil é,

que sen minguar a nosa propia,

ninguén rexeita aprender.

“Nunca aprenderás a hablar”.

 “Hable bien, sea patriota”

 “Eso no es un can, que es un perro,

 la laverca es una alondra”.

Con esas armas proclamaron a vitoria.

Minguando a nosa estima,

ensumindo  a nosa gloria.

O nó que sen atar nos una

é o nó que nós queremos,

o que nos trouxo hoxe aquí:

A defensa do galego

Somos unha xeración

 de galegos preparados,

a gramática coñecemos,

da nosa historia sabemos.

Por usar a nosa lingua

quen se atreve a insultarnos?

Se nos deixamos gañar,

non seríamos desleixados?.

O correlingua camiña contigo,

Uxío, do Courel a Compostela

polas terras liberadas,

esas que vós liberastes

coa arma das vosas palabras.

  

A nosa gran Rosalía xogou  no Olimpo moi soa

e por iso foi alcumada como “a pobriña da tola”.

Semente foi dunha estirpe de poetas emprendedoras

que coa súa lingua tecen a arma máis poderosa.  

Mal de linguas din algúns, os que non queren entender

que a multitude de linguas é en si un grande ben

do que goza a humanidade para chegar a comprender

a complexidade do mundo no que lle tocou nacer.

O dito ben dito queda. Xa é a hora da despedida.

Agardamos terche aclarado algunha das túas dúbidas

para que a partir de hoxe na casa, cos amigos e amigas

fales galego por sempre, que o galego tamén liga

Rematamos esta historia

Berrando ben alto e forte

Para que todos nos oian:

“Galiza, a forza do noso amor non pode ser inútil”

  

Queremos galego na escola!