Desde que se celebraron as eleccións sindicais, veñen producíndose diferentes intentos de subverter e deslexitimar a vontade do profesorado que confirmou a CIG-Ensino como forza maioritaria cun 40% de representación. Para nós, o feito de que se minusvalorice a avaliación que o profesorado fai do modelo e do traballo sindical é moi grave xa que a representación que se estabelece non ten en conta a opinión dos representados. Todo isto leva a un divorcio entre os sindicatos e os traballadores.

Neste caso, atopámonos de novo con outra sabotaxe á vontade do profesorado ao nomear, como representante das organizacións sindicais na permanente do Observatorio Galego de Convivencia, a un membro dunha forza minoritaria, aproveitando que no Pleno do Consello teñen dereito a estar presentes  (cun/cunha representante por cada unha) todas as organizacións sindicais con presenza na Mesa Sectorial docente non universitaria, independentemente do apoio electoral que teñan detrás[1]. A isto temos que engadir que poderían unirse dous sindicatos en función de componendas estrañas e saír elixido aquel que consiga dous votos. Así ocorreu cando se designou o representante para a Permanente do Observatorio Galego de Convivencia, ao ser elixida UGT co apoio de CCOO, dous sindicatos que sumando os seus votos non acadan nin os sufraxios nin os/as delegados/as obtidos pola CIG-Ensino (Ver cadro dos resultados de 2006). Esta estafa ademais vulnera un acordo acadado previamente entre todos os sindicatos no sentido de que fose rotatoria a designación, en función da representación de cada un.