Éxito rotundo da xornada de folga nos centros públicos de Galiza
Participa na FOLGA e MANIFESTACIÓN do día vindeiro martes 27
A folga e a multitudinaria manifestación polas rúas de Compostela constataron que o rexeitamento do profesorado á política educativa do Partido Popular é cada vez maior. “O profesorado galego viu dicir basta xa co desmantelamento do ensino público; ao recorte do profesorado nos centros educativos; ao desprestixio do seu traballo”, dixo Louzao, quen engadiu que “hoxe o profesorado clamou, de forma unánime, para que a consellaría de Educación retire a imposición da ampliación do horario lectivo e a obriga de custodiar o alumnado que usa o transporte escolar”.
Para Louzao é inadmisíbel que sobre o ensino público “se ceben as consecuencias da crise económica”. Por iso, asegurou que “urxe un cambio radical da política educativa da consellaría”, que pasa, segundo explicou, por facer da educación a súa prioridade absoluta; satisfacer as demandas dos centros e ampliar os seus cadros de persoal.
A CIG-Ensino considera que a folga de hoxe amosou que o profesorado está en disposición de continuar mobilizándose para evitar un deterioro na calidade do ensino, que só será posíbel con cadros de persoal amplos que permitan unha atención personalizada do alumnado; menos alumnos por aula e a posibilidade de facer grupos flexíbeis “para garantir un dos obxectivos fundamentais do ensino público, que é a igualdade de oportunidades e unha ensinanza inclusiva, que se concreta en reforzar e apoiar educativamente, sobre todo a aquel alumnado que máis o necesita”, sinalou Louzao.
O secretario nacional de CIG-Ensino considera que o profesorado galego manifestou nas rúas e coa súa participación na folga o seu rexeitamento absoluto á política educativa da consellaría, que non ten inconveniente en malgastar diñeiro para favorecer a privatización do ensino e atacar o noso idioma, mentres aplica unhas enormes tesoiras no ensino público. “Logo desta masiva mobilización, o Presidente da Xunta ten que obrigar ao conselleiro de Educación a rectificar ou ten que cesalo”, afirmou.
Tamén foi moi crítico coas recentes declaracións do conselleiro de Educación, quen asegurou que con estas mobilizacións as organizacións sindicais están facendo política. “Levar a cabo unha política educativa que ten unhas consecuencias moi negativas para o conxunto da poboación e pretender liquidar o ensino público, non é facer política, pero si o é oporse as súas medidas. Denota a súa ideoloxía franquista, porque durante o réxime tamén se dicía que aqueles que se opoñían á ditadura facían política”.
Reproducimos a nota de prensa que enviamos aos medios de comunicación as organizacións sindicais pidindo o cese do Conselleiro de Educación e do Director da CRTVG por mentir na información da folga
As organizacións convocantes da folga que se levou a cabo en todo o ensino non universitario de Galiza e da manifestación que percorreu as rúas de Compostela na mañá do día 21 de setembro esiximos a dimensión do Conselleiro de Educación por ser impropio dun cargo do goberno continuar instalado na mentira e ofrecer á opinión pública datos falsos do seguimento da folga no ensino na Galiza. Súmase este feito ao desprestixio permanente ao que somete ao profesorado e aos recortes constantes no ensino público que conduciron ao maioritario seguimento da folga no día de hoxe.
Ao mesmo tempo demandamos o inmediato cese do Director Xeral da Compañía de Radio Televisión de Galicia (CRTVG), Alfonso Sánchez Izquierdo, debido á burda manipulación -aínda máis esaxerada do que xa estamos habituados- no tratamento desta información no Telexornal das 14.30 horas. Á marxe de que se relegou a un posto secundario no sumario de entrada, a TVG fixo protagonista da noticia aos que non secundaron a folga e emitiron opinións contrarias a súa realización, cando supón unha minoría no ensino público. Consideramos inaceptábel que un medio público que pagamos todos os galegos e galegas en lugar de ofrecer unha información veraz e obxectiva realice un uso con fins partidarios, terxiversando a realidade dos feitos, falseando e ocultando a mesma, co obxectivo de que os galegos e galegas descoñezan as motivacións polas que o profesorado secundou a folga, a súa incidencia real e a verdadeira dimensión da manifestación.
