Exixímoslle ao Conselleiro de Educación que cese na súa actitude ditatorial e destrutora co ensino público. Do contrario, o paro de media hora do día 20 de Setembro e as folgas para os días 21 e 27 non só serán inevitábeis senón que se verán acrecentadas con novas mobilizacións.

Delegados/as de persoal  da CIG-Ensino e de outras organizacións sindicais concentráronse hoxe, día 12 de setembro, diante do Colexio Público de  Maside, coincidindo coa inauguración do curso escolar que o Conselleiro de Educación fixo desde este centro para exixir o restabelecemento do horario lectivo do profesorado, da eliminación da obrigatoriedade de que o profesorado teña que custodiar o alumnado na espera polo transporte escolar e tamén para exixir a paralización dos recortes no ensino público.

Iníciase o curso escolar no que o profesorado ve empeoradas as súas condicións profesionais e laborais con ataques permanentes da Consellaría ao seu traballo e consideración. Hoxe, á parte de ver ampliado o seu horario lectivo, o profesorado galego é dos peores pagados do estado,  é o único colectivo que segue sen ter dereito a unha revisión  médica anual ( malia a ser obrigatoria, segundo  a lei de saúde laboral) é dos poucos do Estado que non ten  redución  horaria cando chega aos 55 anos (aínda que está recollido na LOE). Segue sen ter estabelecida a xornada reducida de xuño e setembro, fica sen  licenzas por estudo para ampliar formación académica e pedagóxica do profesorado e van ser os únicos docentes de todo Estado que  teñan que custodiar o alumnado nas esperas polo transporte escolar.

Este curso tamén nos trae unha lei chamada de convivencia que, porén, vai  comportar mais conflitividade e máis problemas nos centros. Unha lei cuxa motivación real non é outra que de dar cobertura legal a novas consultas ás familias para disfrazar o verdadeiro obxectivo que é reducir á mínima expresión o ensino en galego que, neste momento, é inexistente na case totalidade  das aulas de Educación Infantil  dos centros das cidades e que non chega ao 20% no resto dos niveis educativos.

O Secretario Nacional da CIG-Ensino, Anxo Louzao, declarou que estamos ante o inicio de curso máis conflitivo acordado, motivado polos ataques permanentes deste Conselleiro á educación pública, pola súa actitude irresponsábel e descrédito cara ao profesorado. Estamos ante un goberno da Xunta que non repara en desmantelar o ensino público e reducir a súa calidade, ampliar en 9 as unidades concertadas, dedicar o 11% do orzamento da Consellaría ao ensino privado ao que hai que sumar a extra, por encima dos concertos, que lle veñen de conceder a estes centros de 220.000 euros para a atención á educación especial.

Hoxe, iníciase o curso en Infantil e Primaria con 77 unidades, 14 unitarias eliminadas e 800 profesores/as menos. Todo isto implicará a redución de profesorado especialista para atender o alumnado con necesidades educativas especiais, o incremento de profesorado que teña que impartir materias das que non é especialista, a masificación das aulas, a agrupación nunha mesma aula de alumnado de diferentes anos e niveis educativos e o impedimento de agrupamentos flexíbeis. Pero tamén se inicia un curso no que a Consellaría continúa a desentenderse da xestión da maioría dos comedores escolares e de actividades extraescolares e no que o transporte escolar segue condicionando a fixación de horarios, nalgúns casos totalmente irracionais e antieducativos. 

O acto levado a cabo pola CIG-Ensino e outras organizacións sindicais, diante do CPI de Maside, imposibilitou que o Conselleiro de Educación puidese inaugurar o curso neste centro. Porén, máis unha vez, o seu autoritarismo e a súa persecución para con o idioma comportou o impedimento de que profesorado do centro pendurase nas fiestras carteis en defensa do nosa lingua. O que non puido calar foi o profesorado concentrado diante do colexio de Maside que non cesou de repetir consignas como “Conselleiro mentireiro, Conselleiro dimisión”, “Negociación e non imposición”, “Con tanto desatino, folga no ensino”, etc

Exixímoslle ao  Conselleiro de Educación que cese na súa actitude ditatorial e destrutora  co ensino público. Do contrario, o paro de media hora do día 20 de Setembro e as folgas para os días 21 e 27  non só serán  inevitábeis senón que se verán acrecentadas con novas mobilizacións.