Suso Bermello, secretario nacional da CIG-Ensino, Marta Ferreiro, en representación da AS-PG, Anxo Terán, presidente de Correlingua, Demetrio Gómez Xunqueira, concelleiro de Normalización Lingüística do Concello de Pontevedra e Celia Armas García, coordinadora comarcal do Correlingua da Coruña participaron esta mañá na presentación desta 25ª edición marcada pola emerxencia lingüística que sofre a nosa lingua.

O Correlingua volverá encher as rúas galegas o vindeiro mes de maio con carreiras, festas e outras actividades que reclaman, un ano máis, poder vivir na nosa lingua, dentro e fóra do ámbito educativo. Todas estas actividades foron presentadas no Concello de Pontevedra coa participación de Suso Bermello, secretario nacional da CIG-Ensino, Anxo Terán, presidente do Correlingua, Celia Armas García, coordinadora comarcal do Correlingua da Coruña, Demetrio Gómez Xunqueira, concelleiro de Normalización Lingüística do Concello de Pontevedra, e Marta Ferreiro, en representación da AS-PG. Entre as entidades colaboradoras figuran as deputacións da Coruña, Lugo e Pontevedra, e os concellos da Coruña, Lugo, Santiago, Pontevedra, Vigo e Ferrol, a Academia Nós Oposicións, Eroski e a Fundación Xistral.

Na presentación da nova edición do Correlingua, o presidente da asociación organizadora, Anxo Terán, sinalou que "contra vento e marea cumplimos 25 anos coa axuda dos centros de ensino e o alumnado''. Explicou tamén a escolla do lema A mocidade activa por unha lingua viva, moi acaída porque a mocidade é quen ''vai apostar polo noso idioma para que este teña futuro''. Resaltou que, na práctica, o ''Correlingua é unha das poucas actividades normalizadoras da nosa lingua que se realizan no ámbito educativo ao longo de todo o territorio galego".

Para Suso Bermello, secretario nacional da CIG-Ensino, ''nestes 25 anos de existencia, con participación moi notable de centros docentes, a Xunta nunca patrocinou, nin subvencionou, nin colaborou na principal actividade de dinamización da lingua que vertebra a todos os centros de ensino''. Bermello reivindicou o papel de docentes e escolares no traballo de recuperación da lingua, ''sen alumnado e profesorado que participe non é posíbel o Correlingua ao igual que sen o compromiso da comunidade educativa non se garante o futuro do galego''. Fronte ao desprezo das Consellarías de Educación e de Cultura, o Correlingua recibe apoio institucional doutras administracións ''por iso se presenta cada ano nun concello colaborador, que nunca coincide cos gobernados polo PP''. Insistiu en que o Correlingua é unha das máis grandes demostracións da normalización lingüística, en canto a cantidade de persoas que participan nel, e que está apoiada por docentes que traballan durante todo o ano nas diferentes actividades que contén.

Celia Armas, secretaria da Mesa pola Normalización Lingüística e coordinadora comarcal do Correlingua da Coruña, valorou os 25 anos de existencia e fixo un repaso das actividades que se desenvolverán ao longo deste ano 2025 con parada en 11 localidades no mes das nosas letras. "Cómpre máis ca nunca facer visible o compromiso educativo coa lingua'', á vez que subliñou que o aniversario desta iniciativa fai ''que teñamos esperanzas no futuro da nosa lingua''.

O concelleiro de Normalización Lingüística do Concello de Pontevedra, Demetrio Gómez Xunqueira, reafirmou o apoio do seu concello á celebración do Correlingua e aos profesionais docentes, especialmente nestas circunstancias, para ''converter o ensino nun lugar para o cambio'', subliñando que é ''imprescindible cambiar o rumbo da lingua galega e que a mocidade ten que sentir a necesidade de usar a lingua propia do país''.

Dossier de prensa Correlingua 2025. Descarga aquí.