Tras un seguimento feito polo sindicato ao longo das últimas horas da tarde de onte e nas primeiras desta mañá detectamos unha actuación da inspección educativa totalmente contraditoria á hora de autorizar as peticións por parte dos centros de profesorado de ESO, Bacharelato e Ciclos Formativos para a realización de desdobres.

Por un lado, existen moi poucos casos nos que lles foi comunicado formalmente a través da inspección que se aceptaban todas as peticións feitas para os desdobres de aulas, seguindo os criterios do protocolo publicado o 31 de agosto que, como demandamos no seu momento, fala de garantir o metro e medio de distancia entre o centro das cadeiras do alumnado ou senón de autorizar a división do grupo.

Porén, na maioría dos centros están recibindo respostas negativas ás peticións feitas, total ou parcialmente, con restrición do número de docentes pedidos e coa obriga de optar pola semipresencialidade ou polo uso de anteparos, nalgúns casos cando o centro non o tiña solicitado especificamente e conta con espazos para poder garantir a presencialidade. De momento a información coa que contamos é que a semipresencialidade se levaría a cabo en bacharelato e ciclos de FP.

Así mesmo, nalgúns centros comunícanos que o anteparo ou mampara é un recurso ao que se verían obrigados por orde de inspección cando esta medida supón unha falsa seguridade e que implica graves problemas de xestión polo aumento de superficies a limpar en espazos normalmente mal ventilados e xa de por si coa mobilidade moi reducida entre mesas e cadeiras.

Reiteramos a denuncia do trato discriminatorio entre centros e entre etapas educativas e esiximos unha corrección inmediata das instrucións que se están dando desde a Consellaría para garantir un mesmo criterio para todos os centros, no que prime a presencialidade e o metro e medio de distanciamento físico como mínimo e que se apliquen estas medidas tamén en infantil, primaria, educación especial e ensinanzas de réxime especial.