Conforme ao estabelecido no VI Convenio Colectivo e á lexislación vixente, e sen prexuízo da futura negociación, os criterios para o control e rexistro horario nos centros educativos será o seguinte:

1.- O rexistro horario diario aplícase á totalidade das persoas traballadoras, quedando excluídas do mesmo as persoas sen relación laboral (autónomos, relixiosos...), por carecer de horario de traballo na empresa, sen prexuízo de que acudan á mesma para o cumprimento dos servizos que teñen encomendados. Así mesmo, quedan excluídas as persoas con contrato de alta dirección.

2.- A empresa determinará ao comezo de curso escolar, previa consulta á representación legal do persoal traballador, o cadro horario de cada persoa traballadora, e no caso do persoal docente a distribución das horas non lectivas previstas, tendo en conta o calendario laboral e escolar de cada ano, en función do que estabelece o Convenio Colectivo e o Estatuto dos Traballadores nesta materia.

3.- O control horario diario inclúe a xomada total da persoa traballadora. En caso do persoal docente, incluirá tanto a xornada lectiva como non lectiva.

4.- Con carácter xeral estabelecerase unha hora de entrada e de saída que terá que cumprir a persoa traballadora segundo se determine conforme ao manifestado no punto segundo.

A presenza no centro de traballo fóra destas horas non se considera tempo de traballo, salvo que o empresario encomende ou autorice actividade laboral á persoa traballadora ou se produza unha incidencia que obrigue a realizar máis horas. Isto será debidamente comunicado á dirección ao día seguinte da súa realización para o seu rexistro e constancia.

5.- En caso daquelas persoas traballadoras que, por circunstancias de organización teñan estabelecida unha hora de entrada ou saída distinta á xeral, determinarase de forma individualizada.

6.- Durante o tempo do recreo a persoa traballadora estará a disposición do empresario para efectuar a vixilancia do alumnado, ou calquera outra actividade que lle sexa encomendada. No caso de que a empresa autorice, previa petición da persoa traballadora, a saída fóra do centro de traballo, este tempo non será considerado como xornada de traballo.

7.- Se, por motivos de organización, a persoa traballadora dispuxese de tempo libre entre clases estará a disposición do empresario. No entanto, a empresa poderá acordar coa persoa traballadora a ausencia do centro de traballo, en cada ocasión ou con carácter xeral, nese caso non será considerado como tempo de traballo.

8.- A pausa entre a xornada de mañá e a xornada de tarde non será considerada tempo de traballo, salvo que teña encomendada a realización de tarefas.

9.- Cando a persoa traballadora asista á formación organizada pola empresa ou aqueloutras que sen ser organizadas pola empresa sexan propostas polo persoal e autorizadas polo empresario, será considerado como tempo de traballo efectivo.

10.- Cando a empresa programe unha actividade fóra do centro dun día de duración que coincida co horario de entrada e saída da persoa traballadora no centro, contabilizarase como xornada (lectiva e non lectiva) a que tivese ese día no centro educativo.

No caso de que a actividade tivese unha duración inferior ao da xornada establecida para ese día no centro educativo, só se contabilizará a estes efectos as horas empregadas na saída, debendo cumprir o resto da xornada que tivese.

Se a saída implica que a persoa traballadora realiza unha xornada superior á que tivese ese día, contabilizaranse ademais como horas non lectivas as realizadas por encima da xornada que tivese ese día.

11.- As categorías funcionais directivas temporais que figuran neste convenio serán consideradas a estes efectos como mandos intermedios, cargos de confianza ou con exercicio de especiais responsabilidades. Como consecuencia o control horario deste persoal farase nos termos estabelecidos neste acordo, sen prexuízo da acreditación do seu tempo de traballo mediante o pacto de dispoñibilidade horaria inherentes ao cumprimento do seu cargo, tomando como referencia o establecido no artigo 28 do VI Convenio Colectivo.

12.- No suposto de subcontratación da actividade a empresa contratista, como empresa empregadora, será a obrigada a levar o control horario dos seus traballadores, sen que o centro docente teña ningunha responsabilidade respecto diso.

Non obstante, o centro docente, como empresa principal, poderá acordar coa empresa contratista levar a cabo o control horario deste persoal en lugar da empresa contratista, en todo caso, é obrigación da contratista conservar e manter a documentación dos rexistros diarios realizados.

13.- O sistema empregado para o control da xomada será establecido pola empresa libremente, previa consulta coa representación legal dos traballadores, debendo cumprir a normativa vixente en materia de protección de datos e informar dela á persoa traballadora. En caso de usar soporte en papel deberase facer unha folla por persoa traballadora.

14.- Os rexistros de xornada realizados permanecerán durante o tempo legalmente estabelecido a disposición das persoas traballadoras, dos seus comités de empresa ou delegadas de persoal e da Inspección de Traballo e da Seguridade Social.

15.- Nos casos excepcionais nos que a xomada anual de traballo efectivo por curso escolar supere a que lle corresponde á persoa traballadora conforme ao seu contrato de traballo, procederase á súa compensación conforme estabelece a lexislación vixente. En caso de ser compensada con descanso, este realizarase nos meses de setembro a novembro do seguinte curso escolar.

16.- Ás socias traballadoras de cooperativas non lles será de aplicación o control horario que se estabelece neste acordo.

17.- Cando á persoa traballadora se lle encomende a realización de xestións fóra do centro educativo, levará un control horario en documento separado, no que se reflectirá o tempo de traballo efectivo empregado na mesma.