A política lingüicida da Xunta de Galiza cara ao noso idioma deixa datos demoledores tanto pola situación de emerxencia na que se atopa como pola rapidez coa que se están a producir os cambios nos hábitos da poboación galega con respecto. O Instituto Galego de Estatística, após 5 anos do último estudo, publicou hoxe que o 30% das persoas enquisadas declararan expresarse só en castelán fronte ao 24% que o fai só en galego. Na franxa de idade que practicamente coincide co ensino obrigatorio, entre 5 e 14 anos, case 71.000 rapaces e rapazas declaran descoñecer absolutamente o galego, unha realidade que se constata día a día nos centros educativos e que é froito, principalmente, da aplicación do Decreto de Plurilingüismo. A CIG-Ensino urxe a derrogalo canto antes e a negociar un Plan que reverta esta situación e volva ao consenso do Plan Xeral de Normalización Lingüística do que se cumpren 20 anos da súa aprobación.

A CIG-Ensino non deixou de criticar e combater o Decreto de Plurilingüismo aprobado pola Xunta do Partido Popular en 2010 tras a chegada de Feijóo ao poder, por minimizar e desprestixiar o uso da nosa lingua no ensino tanto nas etapas obrigatorias como nas non obrigatorias. Como ten denunciado en reiteradas ocasións, o feito de que o galego non sexa lingua vehicular nas etapas de infantil e primaria, a prohibición de impartir as materias científicas no noso idioma, a falta de materiais didácticos sobre todo dixitais, fundamentalmente nos cursos nos que se emprega Edixgal, a desgaleguización de ensinanzas como a Formación Profesional, as de réxime especial e a Universidade arroxa unhas cifras demoledoras e un devalo rapidísimo no uso e no coñecemento do galego por parte da poboación máis nova.

En concreto, nos últimos 15 anos a porcentaxe de residentes en Galiza que afirma que só emprega o español subiu desde 19,6% en 2008 ao 29,3% en 2023. Nas franxas de idades máis novas estas porcentaxes son moi superiores, chegando ao 53,6% na poboación entre 5 e 14 anos e ao 43% na faixa entre 15 e 29 anos, un 24 e un 17,6% puntos máis que en 2008. Pola contra, afirman expresarse só en galego o 7% da poboación entre 5 e 14 anos e o 11,9% a mocidade entre 15 e 29 anos.

Para a CIG-Ensino esta radiografía da situación do uso do galego non é ningunha novidade porque, como sindicato maioritario no ensino público, xa vén advertindo que o desprezo e desconsideración ao que somete a Xunta o noso idioma neste ámbito traería estas consecuencias. En concreto, a cifra de que preto de 71.000 mozos e mozas que residen en Galiza declaren descoñecer absolutamente o galego é insólita, e supón un incremento de máis de 16 puntos con respecto a 2008.

Nin pacto pola lingua nin máis mentiras: derrogación do Decreto de Plurilingüismo e negociación dunhas Bases para a normalización efectiva do galego no ensino

A CIG-Ensino presentou hai máis de 4 anos unha proposta de Bases para a normalización lingüística en Galiza consensuada con outras organizacións sindicais, así como con Anpas Galegas, A Mesa pola Normalización Lingüística e Movementos de Renovación Pedagóxica como a Asociación Socio-Pedagóxica Galega e Nova Escola Galega. Para o sindicato non hai outra saída a este novo século escuro para o galego que quere consolidar a Xunta do PP que sentar a negociar sobre un verdadeiro plan que reverta o uso da nosa lingua nas diferentes etapas educativas. A continuación resúmese a proposta feita pública en xuño do ano 2020 e que amosa que o sindicato xa ten o traballo feito fronte á propaganda e as mentiras das distintas Consellarías da Xunta ofrecendo pactos pola lingua cando a súa política foi de acoso e derribo contra o galego nos últimos 15 anos.