Na reunión para o estudo das vacantes a ofertar no presente concurso xeral de traslados celebrada hoxe entre a Xunta de Persoal Docente e a os responsábeis da Administración Educativa na provincia da Coruña, o Xefe Territorial comunicou ás organizacións sindicais que se retiraban da oferta todas as vacantes dos tres institutos do concello de Culleredo (IES Blanco Amor, IES Universidade Laboral e IES Culleredo). A medida afecta a 17 vacantes repartidas do seguinte xeito: 9 vacantes no IES Universidade Laboral (mantendo a de Orientación), 2 no IES Blanco Amor e 6 no IES Culleredo). A razón que dá a Consellaría é a falta de definición do mapa educativo no concello de Culleredo.

A CIG-Ensino xa denunciara nos meses previos á creación do novo IES Culleredo que o proceder tanto do Xefe Territorial como do Xefe de Inspección era improcedente pola falta de planificación. Naquela altura, o sindicato nacionalista indicou que era preciso ter ben claro como ía quedar o reparto da oferta educativa entres os tres institutos; é dicir, onde se impartiría a ESO, o Bacharelato e a Formación Profesional para, en función deses criterios, promover unha adscrición do profesorado dos centros afectados. Ao tempo, o deseño dunha oferta educativa vai máis alá dos propios intereses laborais do profesorado, afectando directamente o alumnado e as familias de todo o concello. 

A Xefatura Territorial fixo ouvidos xordos a todas as alertas que desde a CIG-Ensino se lle fixeron chegar previas á adscrición para o novo IES. No actual concurso de traslados adxudicou provisionalmente 17 postos de traballo nos tres institutos. Agora a Consellaría dá marcha atrás e retira todas esas vacantes, introducindo unha serie de cambios moi importantes na adxudicación final, xa que esta retirada afecta, ao tempo, a outros posíbeis destinos froito das resultas que xa non se producirán, afectando a un número elevado de docentes. 

De ter feito o traballo como a CIG-Ensino propuxo no seu momento, agora estarían claras as necesidades reais de profesorado de secundaria no concello de Culleredo, podendo ofertarse as vacantes que realmente se precisasen. A desidia, a incapacidade e a arbitrariedade á que nos teñen tan acostumados tanto o xefe de Inspección como o Xefe Territorial volve provocar de novo medidas que afectan negativamente o profesorado.