Un profesor titular da UVigo que obtivo un sexenio de transferencia na primeira quenda de resolucións, de decembro de 2019, vén de gañar un recurso contencioso-administrativo que obriga á Universidade a pagarlle o correspondente sexenio de transferencia con efectos de 1 de xaneiro de 2019, así como a que se lle teña en conta na asignación de carga lectiva para o curso 2020/21 e seguintes. A sentenza reflicte a inexistencia de diferenzas entre os sexenios de transferencia e os demais sexenios de investigación.

Agora ben, a sentenza non é firme, pois inda é recorríbel. E non é automaticamente transferíbel ao resto do PDI que se atope na mesma situación, pois o fallo se limita unha “situación xurídica individualizada”.

Desde a CIG PDI solicitamos ao goberno da Universidade de Vigo que non recorra a referida e sentenza e proceda a recoñecer o dereito non só ao profesor que vén de gañala senón a todo o profesorado da UVigo que conseguiu o sexenio de transferencia para poder cobrar o correspondente complemento salarial e a telo en conta na asignación de carga lectiva.

Discriminación do PDI da UVigo.

Resultaría incomprensíbel a Universidade de Vigo manteña unha actitude que nega o evidente, cando outras universidades están a pagalos e a recoñecelos na docencia, mesmo a quen o conseguiron nas quendas de 2020. Este é o caso da USC que xa está a pagar o sexenio de transferencia. No caso da UDC aínda non se efectuou o pago mais existe un compromiso por parte do vicerreitorado de profesorado de facelo inmediatamente sen necesidade de reclamar xudicialmente.

Demorar o recoñecemento na UVigo só pode rematar nunha morea de recursos contencioso-administrativos, xerando dano ao profesorado da universidade, a desafección do persoal coa propia institución e o descrédito da universidade. De aí que desde a CIG apelemos a unha rectificación por parte da UVigo e a extensión dos efectos desta sentenza a todo o PDI con sexenio de transferencia.

A CIG PDI dará apoio á reclamación a todos aqueles afiliados e afiliadas que conseguiron o sexenio de transferencia.