Representantes da Plataforma Galega en Defensa do Ensino Público presentaron este xoves 30 de maio un escrito dirixido ao conselleiro de Educación, Jesús Vázquez, no que se insta ao Goberno galego a solicitar a retirada da LOMCE, tal como están facendo os gobernos doutros territorios do Estado que igual que o galego vén atacadas e invadidas as súas competencias en materia educativa e perseguidos os seus idiomas propios.

Ante a gravidade do que suporía a aprobación desta lei para o ensino público galego, a Plataforma Galega en Defensa do Ensino Público advírtelle ao conselleiro que só caben dúas alternativas, “ou vostede se pon á fronte do clamor popular en contra da LOMCE, exixindo a súa retirada, tal e como lle corresponde, ou ben debe abandonar o seu cargo por actuar en nome do PP e non ao servizo do ensino público galego”. 

A Plataforma Galega en Defensa do Ensino Público lembra que a grande maioría da comunidade escolar vén manifestando o seu total rexeitamento a esta lei e solicitando a súa retirada. A proba máis irrefutábel foi o maioritario seguimento da folga do día 9 de maio de 2013, na que preto do 90% do profesorado e do alumnado galego secundou a xornada de folga en Galiza e decenas de miles de persoas se manifestaron polas rúas de diferentes localidades para amosar a desaprobación a unha contrarreforma educativa, baseada nun proxecto de lei reacccionario, españolizador, clasista e confesional que nos traslada á época franquista.

Despois de rexistrar o escrito, Anxo Louzao, en representación da Plataforma Galega en Defensa do Ensino Público, lembrou que o conselleiro, máximo responsábel de Educación de Galiza, actúa exclusivamente como militante do PP, no canto de erixirse en canalizador das demandas da sociedade galega que reclama a paralización desta lei nociva e perniciosa para o ensino público galego. O seu “sometemento e subordinación aos mandatos do goberno central”, dixo,  lévano á referendar un proxecto de lei “recentralizadora e españolizadora que lle facilita ao alumnado, se é necesario, a matriculación nun centro privado, pagado por todos e todas nós, para evitar a súa escolarización no noso idioma”.

A LOMCE, lembra a Plataforma Galego en Defensa do Ensino Público, procura o máximo control dos contidos a través do Goberno central, uniformiza, mediante as reválidas, e marxina aínda máis a nosa lingua. Impón  un modelo lingüístico que elimina o ensino en galego e invade as cativas competencias que temos, coa intención de afastar totalmente o ensino da nosa realidade social, histórica, cultural e lingüística.

Fernando Lacaci, presidente da Federación de ANPAS de Compostela, que atendeu tamén aos medios de comunicación en representación da Plataforma, manifestou que para a LOMCE non hai emenda posíbel, porque é unha “lei de parte, dun só partido que non vale. A sociedade o que demanda é que os cambios en educación sexan máis duradeiros no tempo e moi consensuados previamente. Hai que retirala”, dixo.

“Vostede –recolle o escrito dirixíndose ao conselleiro- está referendando unha lei que liquida a igualdade de oportunidades, ao impor un sistema de continuas barreiras selectivas para que só unha minoría do alumnado acceda á consecución da titulación. Unha lei elitista, clasista e segregadora, xa que estabelece reválidas para poder acceder á titulación correspondente en 4 de ESO e en Bacharelato. Impón un sistema máis selectivo  mediante itinerarios que  condenan, prematuramente, o alumnado a optar a titulacións diferentes no ensino obrigatorio, condicionando de maneira temperá  o seu futuro académico e laboral”. 

A Plataforma Galego en Defensa do Ensino Público lémbralle ao Goberno galego que a LOMCE reforza a confesionalidade e impide o ensino laico. Desautoriza  e desconfía do profesorado. É un proxecto de lei ao servizo da patronal do ensino privado concertado e da mercantilización da educación que confirma os actuais concertos educativos, legaliza os centros que segregan alumnado por razón de sexo, facilita a planificación escolar en función do ensino concertado, reproduce un sistema xerárquico e empresarial  para o funcionamento dos centros, impide o acceso das clases populares á educación e impón unha educación baseada na competitividade, na exclusión social e na desigualdade, e non nun ensino equitativo, inclusivo e integral, cuxo obxectivo principal debe ser a formación de persoas críticas e responsábeis.