A CIG-Ensino lamenta que as demais OO.SS cedesen unha vez máis, plegándose á patronal cun preacordo asinado o 19 de novembro, que evitará seguirmos na negociación e que logremos o convenio digno e xusto que o colectivo se merece.

O 21 de marzo deste ano, a CIG-Ensino e os seus delegados/as comezamos coas mobilizacións en Galicia para loitar por un convenio xusto e digno, presionando ás patronais para que abandonasen o inmobilismo e o involucionismo logo de 5 mesas de negociación estériles e sen un mínimo avance. Ademais, pretendiamos que as OO.SS estatais se unisen a estas mobilizacións como única saída posible para cambiar as dinámicas negativas de perda de dereitos. Lográmolo por partida dobre, pois o 10 de abril saímos á rúa xunto con CCOO e UGT en Galiza e tamén houbo mobilizacións no resto do Estado español que acabaron dando resultados positivos ao conseguirmos que a patronal fixese propostas en positivo, avanzando minimamente na recuperación de dereitos, logo dos moitos perdidos no XIV convenio. Ademais lograbamos crear unha plataforma conxunta con CCOO e UGT, na que recollíamos estes obxectivos:

- Táboas salariais dignas, con recuperación do 5,2% de perda de poder adquisitivo neste XIV convenio e cláusula de revisión salarial nas futuras táboas garantindo o IPC. Ademais, maiores subas para os salarios máis precarios (os de menos de 1.000€). Aplicaríanse a todos/as, agás aos/ás traballadores/as en pago delegado.
- Redución das xornadas. Hai que camiñar cara as 37,5h/semanais e axustar as anuais que están moi por riba do que corresponde. Nos centros educativos aplicar as do convenio da concertada.
- En licenzas e permisos. Recuperar os 6 días de asuntos propios e un novo permiso con dereito a visitas médicas xustificadas por un mesmo e por acompañamento a fillos/as menores e/ou maiores a cargo que non poidan valerse por eles. Pasar os días naturais a laborais no resto de permisos tal e como ditan as sentenzas do supremo
- Nas IT, baixas médicas por enfermidade común ou accidente non laboral, recuperar durante o 1º mes, ao igual que no XIII convenio, o 100% do salario.
- Eliminar o CDP e voltar aos trienios, ou sacar a avaliación como mínimo.
- Recuperar melloras sociais do XIII convenio como o 7% de salario despois de 12 anos na empresa, ter dereito ás revisións médicas anuais, renovación anual de roupa de traballo ou pago dunha cantidade… e outras que se deben reivindicar como cadro de enfermidades profesionais, redución xornada maiores de 55 anos, melloras nas condicións das excedencias, pluses de perigosidade, penosidade e toxicidade, horas extras, turnicidade, nocturnidade, flexibilización da xornada…

Xa ante a primeira proposta da patronal, que non acadaba nin un só dos obxectivos marcados na plataforma e que era totalmente insuficiente, fixo que desde o primeiro momento tanto CCOO como UGT se esquecesen da plataforma conxunta e se aliasen de novo coa patronal máis representativa, entrándolle no xogo da negociación a mínimos e pregándose ás súas propostas de clasificación profesional e salarial (como a de eliminar o CDP e a avaliación) xunto cuns pequenos ‘caramelos’ en permisos, IT e xornada, así como adaptar todo o convenio restante á normativa actual, sen máis. Desde a CIG-Ensino entendemos que de manter a firmeza nas reivindicacións e a unidade sindical poderíamos lograr melloras moito máis significativas e dignificar o convenio.

Este preacordo, con trampa, asinado o luns 19 de novembro, consiste no seguinte:

Esta “boa” proposta de suba en 2019 supón a conxelación dos anos 2017 e 2018 e manterase conxelada en 2020 e 2021, é dicir, supón unha suba media do 2% anual, que non garante o IPC nin ten cláusula de revisión salarial. Ademais, consolídase o 5,2% de perda de poder adquisitivo acumulada no XIV convenio, coas conxelacións sufridas de 2012 a 2014 e as subas do 1% en 2016 e 2017. É discriminatoria.

* Se SMI = 900€, o técnico auxiliar iría SB=900€ + 30€ de complemento. O operario ED iría a 800€ + 40€ de complemento

REVISIÓNS SALARIAIS FUTURAS A BAIXA - As revisións salariais faranse cada 3 anos, por acordo da mesa negociadora, en base ao IPC acumulado do período dos 3 anos anteriores, garantizándose un mínimo do 3,75% de suba no SB. De non chegar a acordo a mesa de negociación en 3 meses, aplicarase o 50% do IPC acumulado nos 3 anos, ao salario (SB) e o outro 50% aos Niveis Desenvolvemento profesional (N1-N2). Ou sexa non hai clausula de revisión salarial, para garantizar o IPC. A patronal con negarse e alongar as negociacións 3 meses, xa garante unha suba ridícula. 

OS NOVOS NIVEIS DE DESENVOLVEMENTO PROFESIONAL (N1 e N2) propostos  obrigan a facer horas formativas (75h. nos 3 anos, laborábeis), e o que é peor e preocupante, cumpridos estes 2 niveis desaparecerá a antigüidade (trienios). 

2º - XORNADA LABORAL. Insultante recorte da anual e desregulación da semanal

Hai unha regresión e involución moi graves, pois o recorte da xornada anual é insignificante, pasando nos centros de atención especializada de 1729h. a 1720h., e nos centros especiais de emprego de 1758h. a 1720h., pero o que é peor a xornada semanal pasa de ser “máximo de 38h. e 30min.” a desregularizarse dIcindo “referencia semanal de 38h. e 30min.”. Esta mesma xornada aplicaráselle tamén ao persoal de administración e servizos dos centros educativos.

Os docentes dos centros educativos pasarán na xornada anual de 1300h. a 1250h., manténdose a xornada máxima semanal en 32h tal e como estaba no XIV. O persoal complementario titulado e auxiliar pasará de 1600h. a 1550h. en 2019 e 2020; no 2021 pasará a 1525h. anuais. A xornada semanal pasará de “35h máximo” a “35h. de referencia”, é dicir, desregularizarase e quedará a gusto da patronal.

Na CIG-Ensino mantivémonos nas reivindicacións da plataforma, pois nin se acadou axustar o desfase anual de horas en relación ás semanais(as anuais deben ser máx.1700h)

3º - PERMISOS RETRIBUÍDOS. Lógranse avances sen recuperar os do XIII convenio

As demais OO.SS limitáronse a pedir un novo permiso para visitas médicas e titorías escolares“cunha bolsa de 16h laborais anuais”. Desde a CIG-Ensino entendíamos que non debía estar limitado e a maiores debía recollerse outro para xestións administrativas (DNI, catástrofes, divorcios,…). Ademais había que recuperar os 6 días de asuntos propios.

Logo por dereito por sentenza do supremo todos os días pasan de naturais a laborais. Tamén se logra unha maior flexibilización no goce dos permisos.

4º -  I.T. (INCAPACIDADE TEMPORAL). Mínimos avances os acadados

Cobrarase o 100% do salario durante toda a baixa para enfermidades graves recollidas no Real Decreto 1148/2011(canceríxenas). Ademais cobrarase tamén o 100% na primeira baixa do ano por enfermidade común e para o  resto segundo o convenio actual. Dende a CIG-Ensino entendíamos que debería recollerse o 100% durante o 1º mes de calquera baixa por enfermidade común, tal e como se tiña en dereito no XIII convenio.

5º - OUTROS ACORDOS 

Obriga de fixar o calendario laboral antes do 15 de xaneiro de cada ano.     

O crédito horario dos delegados/as de prevención será independente do asignado ao da representación legal dos traballadores/as.

Facer as adaptacións legais a todo o articulado do XIV convenio e introducir acordos acadados na Comisión Paritaria (como poder acumular a lactancia en 20 días naturais).

As CONCLUSIÓNS deste preacordo só poden ser NEGATIVAS ante os obxectivos marcados e o preacordo asinado, pois non se acada nin un só dos obxectivos acordados e mesmo resulta regresivo e involucionista na xornada, antigüidade e salarios. Desde a CIG-Ensino logo da asamblea de delegados/as do sector decidiuse non asinalo. Reivindicamos outros temas a negociar da plataforma como o complemento do 7% do salario por cada 12 anos na empresa, redución de xornada para maiores de 55 anos, melloras nas excedencias, vacacións, horas extras, nocturnas e festivas, turnicidade, xornada irregular, bolsa de horas flexibles, enfermedades profesionais, voluntarismo, complementos penosidade,perigosidade e toxicidade…