A inspección de traballo da Provincia de A Coruña vén de recoñecer, a razón dunha denuncia da CIG-Ensino, a relación laboral por conta allea existente entre a Consellaría de Educación e o profesorado que imparte os cursos preparatorios do CELGA. Esta actuación da inspección implica a alta na Seguridade Social destes traballadores/as nos períodos nos que traballaron e evidencia a actuación fraudulenta da Consellaría de Educación.

 A Tesourería Xeral da Seguridade Social da provincia da Coruña xa deu de alta con efectos retroactivos a todos os/as traballadores/as nos períodos nos que impartiron cursos nos últimos catro anos e a propia inspección impón unha multa de máis de 200.000 euros. 

A CIG-Ensino xa interpuxo denuncia tamén na inspección de traballo de Ourense, Lugo e Pontevedra. Para a CIG-Ensino á Consellaría de Educación  non lle  queda outra solución que facer extensíbel para toda Galiza a resolución  da inspección de traballo da Coruña  de que  hai unha relación laboral por conta allea e que só cabe contrato laboral e alta na Seguridade Social.

Así llo trasladou a CIG-Ensino á  Consellaría de Educación, nunha reunión o 5 de decembro, na que lle amosou, máis unha vez, o seu total rexeitamento ao proceder da secretaria xeral con este colectivo e as seguintes propostas:

- A secretaría xeral debe dar de alta de oficio na Seguridade Social como traballadoras e traballadores por conta allea a  todo o profesorado “colaborador” que impartira cursos con efectos retroactivos de catro anos (o máximo estabelecido na normativa actual.)

- Compromiso de que todos os novos chamamentos implicarán obrigatoriamente  un contrato laboral. Coa correspondente alta na seguridade social.

- Xestión pública, con control sindical, e publicación das listaxes do profesorado, coas  súas  correspondentes puntuacións por apartados. Elaboración dunha nova orde, previa negociación, onde se dea resposta ás reivindicacións do colectivo e ao control das listaxes e se contemple todo o relacionado cos cursos que imparte a Secretaría Xeral.

O secretario xeral deuse un prazo de 15 para trasladarnos unha decisión definitiva.Para a CIG-Ensino, é totalmente inaceptábel que a Consellaría siga obstinada en eximirse das súas responsabilidades e non procure unha solución definitiva. A CIG-Ensino estará atenta a próximas actuacións da consellaría, e de non aceptar as nosas propostas, levaremos a cabo mobilizacións e as actuacións xurídicas correspondentes.