En resposta a un escrito presentado pola CIG-Ensino esixindo a retirada ou aclaración dunhas instrucións enviadas por email, a Consellaría dá marcha atrás na súa intención de non baremar titulacións se non se achegaban nun tempo record que non se correspondía con ningún prazo oficial.

A CIG-Ensino fíxose eco nestes dous últimos días das numerosas queixas trasladadas por un numero importante de docentes por mor dun email enviado desde a Subdirección Xeral de Recursos Humanos a unha parte do profesorado sinalando un prazo que remataba o 15 de novembro para presentar certificacións de diferentes títulos (bacharel, técnico superior, segundas titulacións) e indicando que, de non facelo, se entendería que non sería baremábel para o próximo concurso de traslados.

Un novo envío de email que xa tiña precedentes

Precisamente o estabelecemento dese prazo “record” era o que diferenciaba este email doutros previamente enviados desde a Consellaría no último trimestre do curso 2009/10 e no mes pasado a diferentes colectivos de profesorado. Naquelas ocasións solicitábase do profesorado que incluíra nos seus datos persoais, e para os efectos do agora inminente concurso de traslados, todos aqueles méritos que considerasen oportunos mais non se obrigaba a facelo nin se presupoñía que de non ser así, estarían a renunciar a eses méritos. Xa naquel momento a CIG-Ensino demandara da Consellaría unha aclaración das instrucións e criticara o alarmismo innecesario que se estaba a provocar entre os docentes. A CIG-Ensino tamén denunciara na Mesa Sectorial do 6 de maio o feito de que moitos dos datos que se lle pedía ao profesorado debían ser cargados de oficio por parte da Administración.

A actuación da CIG-Ensino fai dar marcha atrás á Consellaría

Postos en contacto coa Consellaría desde o mesmo día 10 de novembro, no que se enviaron os email, mostramos o noso malestar polo correo enviado e instamos os responsábeis da Consellaría a rectificar. O venres 12 presentouse por rexistro o escrito que se pode consultar nesta mesma páxina para deixar constancia desa preocupación do profesorado e da nosa esixencia dunha urxente rectificación.

A resposta da Consellaría chegou poucas horas despois, dando marcha atrás na súa pretensión e indicando textualmente o seguinte, nun correo enviado ao profesorado que previamente recibira os correos arriba mencionados:

Modificados os criterios de baremación das titulacións para o concurso de traslados na orde marco que se publicou no BOE do 5 de novembro do 2010, particípolle que se anulan os correos electrónicos que lle enviei o día 10 de novembro do 2010.

Disculpe as molestias ocasionadas e aproveito a ocasión para saudalo/la.

Desde a CIG-Ensino felicitámonos por esta rectificación e instamos á Consellaría a que actúe con máis cautela no envío de información aos docentes do ensino público e con arranxo aos prazos legalmente estabelecidos na normativa de concurso de traslados.