A Dirección Xeral de Centros e Recursos Humanos vén de enviarlle a todo o profesorado galego un email no que se modifica a comunicación dos partes de baixa por incapacidade temporal así como os de confirmación ou alta médica. A Consellaría alega que se pretende facilitar e axilizar a tramitación destes partes médicos, centralizando toda a xestión nos servizos centrais e cargando no propio profesorado toda a xestión burocrática.

Para a CIG-Ensino a decisión da Consellaría non ten sentido, non porque se habilite a posibilidade de poder facelo por esta vía, co que non estamos en desacordo, senón por imposibilitar que se poida facer pola vía ordinaria.

Así, nos casos en que un ou unha docente se atopen incapacitados para xestionar este trámite, o atraso e quebranto que se produce na súa formalización e na cobertura da vacante é total. Pensemos por exemplo en baixas médicas que imposibiliten ás docentes o seu acceso á aplicación informática de “datos persoais” como pode ser o caso dunha persoa infartada ou hospitalizada por calquera motivo, alguén que permaneza inmobilizada ou que non teña acceso no seu domicilio aos medios necesarios para cumprimentar o trámite (escaneo de documentación e acceso á aplicación). Nestes casos non se permite que se poidan achegar mediante outros medios esa documentación, xa que o acceso aos “datos persoais” é exclusivo de cada docente.

Nada máis ter coñecemento do email, a CIG-Ensino vén de se dirixir á Dirección Xeral para que se modifique, permitindo a posibilidade de que a documentación se poida remitir por outras vías, ben porque o docente non pode facelo dixitalmente ou porque se precisa doutra persoa para que faga entrega da documentación. De non ser así, provocaríase que se produciran baixas que non puidesen ser tramitadas e, por tanto, en vez de axilizar a substitución do docente en IT se provocaría unha demora inxustificada.

A Consellaría debe rectificar e ten que abrir os ollos á realidade, sendo consciente de que vai provocar un problema e un agravamento da situación actual. Lamentamos que, unha vez máis, se adopten medidas sen previa consulta á representación do profesorado e que cargue ao profesorado enfermo dun traballo que, en moitos casos, non vai estar en condicións de facer ou que lle vai supoñer unha carga innecesaria.