A CIG-Ensino denuncia que a Consellaría de Educación pretende realizar o primeiro recorte dos cadros de persoal dos centros, o que consideramos a primeira consecuencia da modificación da xornada de traballo do profesorado. Ademais, a Consellaría, co obxectivo de reducir o número de postos de traballo, impón as rateos máximas de alumnado por aula e obrigan a realizar agrupamentos de alumnado de diferentes idades, dentro do mesmo ciclo até 20 alumnos por aula, e entre ciclos diferentes até 17 alumnos por aula, segundo as instrucións dadas pola inspección.

A Consellaría, a piques de rematar o mes de xullo, aproveita para presentar o primeiro recorte dos cadros de persoal dos centros de Educación Infantil e Primaria, como sempre aproveitando os períodos en que o profesorado non está nos centros para evitar a contestación ás regresións que está a aplicar ao ensino público. Cómpre considerar que este recorte afecta ao profesorado definitivo nos centros, a estes recortes sumaranse, posteriormente, os recortes na adxudicación de profesorado provisional, co que a cifra final de supresións de postos de traballo vaise incrementar aínda notabelmente. Por outro lado estamos a falar de centros de Infantil e Primaria, faltan aínda por confirmarse os recortes en Secundaria.

Como se pode comprobar no cadro anexo, estamos falando de que son 95 os centros de Educación Infantil e Primaria que van sufrir recortes de profesorado, deles 14 son escolas unitarias que desaparecen definitivamente. Os recortes propostos neste momento supoñen unha perda media do 15,43% do profesorado nos centros afectados sendo a maior incidencia na Provincia de Lugo que rexistra unha media de redución de profesorado por centro do 21,8%, seguida de Ourense cunha media do 15,9%, Pontevedra de 14,07% e A Coruña cunha media de 12,9 %. Os centros máis afectados son por exemplo: o CEIP San Ramón de Moeche, perde 3 dos 11 profesores que tiña (27,3%), o CEIP de Xermade que perde 3 de 10 (30%), O CPI Tomás Terrón de Carballeda de Valdeorras, o CPI Laureano Prieto na Gudiñae o CEIP Joaquina Gallego da Merca, que perden 3 dos 9 docentes de Primaria e Infantil cos que contaban, é dicir, un tercio. 

En canto ao número de unidades, comprobamos que se suprimimen 32 unidades de Educación Infantil e 77 de Primaria, polo que o número total de unidades suprimidas ascende a 109. Os centros afectados perden unha media do16,1% das unidades, superando esta porcentaxe os centors de Lugo que chegan perder unha media de case o 20% das unidades. Cabe salientar que 16 dos 95 centros perden o 25% das unidades. Isto significa que as aulas van estar máis masificadas e que non se poderán atender as necesidades educativas que teñen como criterio fundamental para a súa aplicación a redución do número de alumnos por aula para potenciar a atención individualizada. 

As reducións propostas para os centros afectados (dos que 14 son unitarias que desaparecen) suman unha perda de 161 postos de traballo. Mais, como dicimos este vai ser o primeiro recorte, que se verá incrementada no mes de setembro ao comprobarmos a redución na dotación de provisionais.

A situación en Secundaria:

Nos vindeiros días, presumibelmente contra o mes de agosto, recibiremos tamén novas das reducións en Secundaria. A día de hoxe a información que nos achegan os centros falan dunha redución dun promedio dun 10% do persoal dos centros nos que se están notificando, a través da inspección, a eliminación dos desdobres e agrupamentos específicos, o que impedirá a atención necesaria do alumnado con necesidades. Moitos centros, malia incrementar a 20 as horas lectivas do seu profesorado e masificar as aulas que teñen como mínimo 30 alumnos/as, cifra que se superará cos repetidores, non teñen profesorado suficiente para impartir todas as horas das diferentes materias se a Consellaría non atende as peticións de profesorado realizadas, como non está facendo.

A CIG-Ensino denuncia que esta Consellaría de Educación actúa con criterios exclusivamente económicos, reducindo o profesorado e os recursos en xeral do ensino público, mentres mantén os recursos á privada e alardea de que non incumpre a lei por subvencionar cinco centros relacionados co Opus Dei que segregan o alumnado por razón de xénero. A CIG-Ensino esixe que se retire esta proposta de modificación dos catálogos dos centros, e a negociación dos mesmos nas Xuntas de Persoal Docentes.

Tal e como se anunciou no seu día, o mes de setembro iniciarase con diversas mobilizacións contra a imposición da modificación da xornada de traballo e as reducións de postos de traballo que isto significa, feitos, ambos os dous, que repercuten negativamente na calidade do ensino.

 

	Centros aos que se lles reduce o profesorado	Unitarias que se suprimen	Total	Profesorado Suprimido	%media de profes. Suprimido /centro	Unidades de Infantil Suprimidas	Unidades de Primaria suprimidas	Total unidades suprimidas	%media de unid. Suprimidas /centro
A Coruña	34	10	44	-64	12,9	-21	-28	-49	15,5
Lugo	23	1	24	-46	21,8	-3	-23	-26	19,7
Ourense	15	0	15	-32	15,9	-2	-16	-18	14,4
Pontevedra	9	3	12	-19	14,07	-6	-10	-16	15,4
Galiza	81	14	95	-161	15,43	-32	-77	-109	16,1