O profesorado interino que vén de obter unha praza na adxudicación de destinos provisionais nos diferentes corpos de secundaria e toma posesión no día de hoxe vai ter unha data de cese diferente e previa á que viña sendo habitual. Se até este curso esa data era, con lixeiras variacións, a mediados de setembro e sempre coincidindo co inicio das actividades lectivas en secundaria, bacharelato e ensinanzas de réxime especial, neste curso 2021/22 a data de cese vai ser con efectos do 31 de agosto.

A Subdirección Xeral de Centros, en resposta a unha consulta da CIG-Ensino sobre este cambio, vén de confirmar que se debe á intención de mudar as datas de adxudicación de destinos para todos os corpos docentes dependentes do servizo de secundaria, igualando as datas ao corpo de mestres e fixando a toma de posesión para o curso 22/23 no día 1 de setembro.

Desde a CIG-Ensino trasladámoslle á Consellaría que ese cambio debe vir acompañado nunha mellora da xestión das vacantes para o CADP para que non se produza un incremento das xa habituais “incidencias” nas prazas que se adxudican, algo que desde a CIG-Ensino vimos denunciando recorrentemente. O cambio, por tanto, non pode implicar un aumento de interinidades que se teñen que ofertar a posteriori de ter feita a adxudicación informática, co conseguinte prexuízo para quen está en postos superiores nas listas de contratación.