Son moitas as cuestións e é abundante a problemática laboral que segue sen resolverse pola xerencia do Consorcio Galego de Igualdade e Benestar, malia as repetidas reclamacións tanto dos comités de empresa como da propia CIG, ao mesmo tempo que o conxunto das traballadoras e traballadores seguen sen gozar de Convenio Colectivo.

Son varias e diferentes as noticias que transcenden sobre a integración do Consorcio Galego de I+B na Axencia Galega de Servizos Sociais, sen que desde os representantes das traballadoras e traballadores teñamos unha información veraz sobre a última intención da Consellaría de Traballo e Benestar.

A CIG-Ensino solicitoulle ao Xerente unha entrevista, a maior brevidade posíbel, ao obxecto de tratar os seguintes temas:

• Criterios da integración do Consorcio na Axencia Galega de Servizos Sociais (integración dos Servizos Centrais, Oficinas I+B, Galescolas...)
• Aplicación do Convenio.
• Solución a problemática das listas de agarda.
• Que se axilice e non deneguen as reducións de xornada.
• Constitución dos Comités de Prevención e Saúde Laboral.
• Información sobre a apertura dos novos centros e as novas subrogacións.
• Efectivización, como no ano anterior, de que o 24 e 31 de decembro son compensados con 1,75 días por día traballado.

Así mesmo, os comités amosan o seu malestar debido á nula receptividade ás súas opinións, escritos e solicitudes por parte da Xerencia do Consorico de Igualdade e Benestar.

Desde a CIG continuaremos a traballar para lograr que as condicións de traballo melloren día a día.