A central desenvolveu unha concentración contra a proposta de modificación da Lei de Función Pública Galega, que ademais recupera o sistema de libre designación para as xefaturas de servizo. A CIG plantou esta mañá a xuntanza da Mesa Xeral na que se ía abordar a modificación da Lei de Función Pública Galega, ao entender que nin se respectaron os tempos nin existe vontade de negociación por parte da Xunta, xa que ten previsto aprobar os cambios na normativa a través da Lei de acompañamento dos Orzamentos de 2011. A proposta, achegada ás organizacións sindicais este mesmo luns, inclúe, entre outras, dúas mudanzas especialmente lesivas para a ordenación da Función Pública e cun forte carácter regresivo: a mobilidade forzosa do persoal funcionario da administración e o retorno ao sistema de libre designación para as xefaturas de servizo.

A CIG, ao igual que as organizacións sindicais presentes na Mesa Xeral, plantou a xuntanza convocada para a unha da tarde deste mércores ao considerar que non houbo tempo material para estudar a proposta (entregada o luns 11 de outubro) nin para o debate do documento, que a Xunta pretendía liquidar hoxe en tan só unha hora. Así, delegados e delegadas da área pública desenvolveron unha concentración diante da EGAP, onde ía ter lugar a xuntanza da Mesa Xeral, para manifestar o seu total rexeitamento á proposta de modificación presentada polo goberno galego, que unha vez máis, amosa a súa falta absoluta de vontade negociadora.

Mobilidade forzosa do persoal funcionario

Entre as modificacións que a Xunta pretende introducir destacan dous puntos polo seu carácter reaccionario e polo inmenso prexuízo que supoñen para a ordenación da Función Pública Galega: a mobilizade forzosa dos empregados/as da administración e á volta atrás no sistema de acceso ás Libres Designacións.

Na proposta trasladada ás organizacións sindicais, o goberno galego introduce unha modificación do Artigo 30 bis polo que se estabelece a mobilidade forzosa do persoal da administración, cuns criterios completamente arbitrarios, "por necesidades do servizo ou funcionais". Deste xeito, o persoal funcionario poderá ser trasladado forzosamente de localidade, Consellaría, unidades, organismos, axencias ou entidades distintas ás do destino definitivo como funcionario/a de carreira. No texto proposto, para estes traslados non se garanten nin a identidade de retribucións nin as condicións esenciais de traballo do persoal.

A proposta da administración consiste en dous sistemas de traslado forzoso: un ordinario, a través de comisión de servizos forzosa por un período de até nove meses, e un sistema extraordinario, a través da modificación na RPT da adscrición do posto de traballo. Esta mudanza podería afectar supletoriamente ao persoal de concellos e universidades públicas. Porén, nos corpos estatais (educación, sanidade, xustiza, etc.) prevalece sempre a normativa.

Regreso ao sistema de libre designación

En canto ás libres designacións, no artigo 30 realízase unha volta atrás, reintroducíndose o sistema de libre designación para os postos de nivel 28 (Xefaturas de Servizo), eliminando a forma de provisión por concurso que fora aprobada por unanimidade no parlamento galego na lexislatura anterior, e aínda pendente de efectivizarse. Deste xeito, péchase desde arriba a posibilidade de promoción profesional a través de méritos obxectivábeis e substitúese pola designación política dos responsábeis das unidades. Introdúcese ademais neste artigo 30 o concepto indeterminado de "dispoñibilidade horaria" para todos os postos de libre designación.

Unha vez máis constátase a nula vontade de transparencia e negociación deste goberno, no senso de que racha o acordo sindical acadado na anterior lexislatura relativo a promover polos sistemas ordinarios de provisións de postos de traballo os postos de libre designación. Cuestión esta que estaba pendente de desenvolver e efectivizar.

Dende a Área Pública da CIG quérese lembrar que nos sectores da saúde e do ensino existen marcos reguladores de obrigado cumprimento e que hai que respectar. De igual xeito, a central sindical rexeita calquera imposición por parte do goberno galego que non respecte as mesas sectoriais de negociación e que se pretenda implantar sen debater coa representación dos traballadores e traballadoras da administración pública.

A CIG vén reclamando unha reforma seria, profunda e negociada da Lei de Función Pública Galega dende hai anos, considerando que esta proposta de modificación queda fóra de todos os marcos de negociación e é unha mera imposición das decisións arbitrarias que adopta a Xunta de Galiza en materia de función pública.