Así mesmo, para o sindicato maioritario no ensino público galego os efectos retroactivos no cobro do mesmo salario para quen está a desempeñar o mesmo traballo deben ser desde a entrada en vigor da LOMLOE ou desde que unha persoa comezou a traballar, se foi con posterioridade. Aproveitou para insistirlle á Consellaría que destine os fondos que están a vir para a Formación Profesional para o verdadeiro artífice do seu éxito: o colectivo docente.

A CIG-Ensino volveu esixirlle á Consellaría de Educación que elimine as discriminacións entre o profesorado de FP na mesa de negociación na que se debateu a Orde que rexe o procedemento para que o colectivo de PTFP, a extinguir, formado por 665 persoas en Galiza, cobre un complemento equiparador de 146,93 euros ao mes, con respecto ao profesorado que pasa ao corpo de Secundaria. Na proposta que formulou a CIG-Ensino sobre o propio texto, e que se pode consultar nesta ligazón, hai varios eixos que inciden nesta demanda de igualdade: 

• En primeiro lugar non parece razoábel que a Consellaría só aplique este complemento compensador cunha foto fixa a día de hoxe a quen queda como funcionariado de carreira a extinguir no corpo de PTFP e se lle vete a mesma retribución a quen vai formar parte do novo corpo de PESSFP das 10 especialidades que o conforman. O 1 de setembro de 2023, que é a data na que segundo o borrador presentado pola Consellaría se vai facer efectivo este complemento, haberá 50 novos compañeiros e compañeiras que veñan de obter praza nos procedementos de estabilización e que quedarán á marxe deste complemento, ao igual que todo o persoal interino e substituto destas 10 especialidades que traballe o vindeiro curso. A CIG-Ensino propuxo unha modificación do texto da Orde neste sentido, insistindo en que o complemento equiparador debe ser de aplicación a todo o persoal que forme parte no futuro do corpo de PESSFP e incidindo en que a diferenciación entre persoal fixo e temporal vai en contra do ditaminado pola xurisprudencia europea e que rematará nun proceso de xudicialización de non haber vontade política para resolver esta discriminación.

A CIG-Ensino tamén fixo mención específica a que, ao igual que o resto de complementos salariais que abona a Consellaría de Educación ao seu persoal docente, se incorpore no texto desta Orde a súa revalorización anual nos Orzamentos Xerais da Xunta. Igualmente pediuse expresamente que tamén se iguale a percepción dos trienios.

• Efectos retroactivos para todo o persoal de FP coas mesmas condicións. Outra das cuestións que está nas mans da Consellaría resolver e que só rectificou timidamente é a data de efectividade económica tanto do complemento para quen non pode integrarse como de quen, tendo titulación universitaria, está a piques de facelo. Non parece tampouco de recibo que a administración decidira só pagarlle con retroactividade a quen cumpría os requisitos para pasar ao grupo A1 e se xubilou no período que vai desde a entrada en vigor da LOMLOE até a publicación da Orde de integración. Esta decisión, que a CIG-Ensino considera acertada, queda curta e, tal e como lembrou o secretario nacional da CIG-Ensino, Suso Bermello, na súa intervención na Mesa Sectorial, “o que ten que facer a Consellaría é recoñecer por igual a contribución do persoal de FP ao bo desenvolvemento destas ensinanzas, a quen estivo en activo até agora e a quen seguirá nos próximos anos”. Polo tanto, a central sindical propuxo directamente incluír no articulado da Orde que se lle paguen os atrasos desde o 19 de xaneiro de 2021 a quen traballaba como persoal interino nesa data, tanto se se vai integrar nas 19 especialidades que pasan ao corpo de PES como a quen queda no corpo de PTFP a extinguir como a quen pasará a formar parte a partir do 1 de setembro de 2023 do corpo de PESSFP. Neste sentido, a CIG-Ensino lembrou que xa está presentado recurso xudicial tanto individual como do propio sindicato para que quen aprobou as oposicións en 2021 e pasará agora ao corpo de PES vexa recoñecido o ano de prácticas a todos os efectos e os mesmos pasos se darán co persoal interino. 

  ---

• Profesorado especialista de especialidades de FP propias da Consellaría de Educación. Hai nestes intres 12 especialidades que a Consellaría de Educación foi creando nos últimos anos para dar saída ás necesidades que se producían na Formación Profesional de profesorado especialista que nunca tivo oposicións e que formaban parte do corpo de PTFP. A Consellaría vén de incluír estas especialidades na Orde que regula os destinos provisionais no corpo de Profesorado de Ensino Secundario, unha decisión que a CIG-Ensino comparte pero que debe vir acompañada dun recoñecemento igual que o resto de compañeiros e compañeiras que pasan ao grupo A1. A CIG-Ensino non se esquece destas 73 persoas, segundo un estudo realizado polo sindicato a partir dos datos proporcionados pola Consellaría, e reclama que cobren tamén de forma retroactiva o que lles correspondería desde que comezaron a traballar ou desde xaneiro de 2021.

  ---

Datos do colectivo de FP segundo a súa situación administrativa 

  _{*Nota: datos de interinidades a comezos deste curso.}

Ligazón a toda a información da mesa sectorial