Así mesmo urxiu á Dirección Xeral de FP a rectificar parte das decisións tomadas de cará á reforma de FP que se comezará a implantar o vindeiro curso e a convocar unha Mesa Sectorial docente na que se aborde a futura Orde transitoria que a Consellaría anunciou que se aplicará no curso 24/25. Os representantes da CIG-Ensino foron moi críticos coa ampliación nun 45% da modalidade dual intensiva, que o ano pasado foi a única que quedou con prazas desertas e esgrimiu datos das altas taxas de abandono que tivo en Galiza o curso pasado. Así mesmo, reiterou as súas críticas á ausencia total de negociación tanto no que ten que ver coa planificación da oferta formativa pública como a falta de transparencia na oferta privada e concertada, que non para de medrar baixo a complicidade da Xunta de Galiza, e pediu explicacións sobre os anuncios electorais referidos ao plan de impulso da FP básica e dun novo centro integrado para estudos sanitarios en Compostela realizados por Rueda e polo conselleiro respectivamente. 

Os representantes da CIG-Ensino neste órgano meramente consultivo fixeron fincapé na necesidade de abordar de forma completa o reaxuste horario dos ciclos -e non por cursos como decidiu facer a Consellaría- tal e como pide o profesorado de FP, tanto o que formou parte dos grupos de traballo como o que non. Así mesmo volver poñer enriba da mesa a proposta de que o módulo de inglés profesional de segundo curso sexa un complemento formativo que non lle reste horario aos módulos profesionais e que se negocie, contando co profesorado, se se incrementa a carga horaria dalgúns ciclos, sobre todo dos medios e superiores, ao máximo que permite a normativa estatal: 2.200 horas na modalidade dual xeral e 2.800 na dual intensiva como unha fórmula para minimizar a perda de calidade que vai supoñer o incremento das horas de formación na empresa e a inclusión dos novos módulos de competencias básicas. Tamén foron moi críticos coa privatización galopante que se está a producir nas ensinanzas de formación profesional e da formación do profesorado, así como coa discriminación do galego tanto nesta formación e nos materiais dos novos módulos como na falta de promoción e axudas para a realización de recursos didácticos na nosa lingua.

Na súa intervención, a directora xeral de FP, Eugenia Pérez, defendeu a aposta do goberno da Xunta pola dual intensiva e anunciou que se levará á Mesa Sectorial un proxecto de Orde transitoria para a regulamentación da reforma da FP no curso 24/25 para posteriormente elaborar o Decreto de ordenación do sistema de formación profesional galego. Sen fixar a data insinuou que esta mesa non sería antes da aprobación da modificación do RD 659/2023, que está prevista para principios de xullo, así que con toda probabilidade quedará para inicios do vindeiro curso. A CIG-Ensino considera que debera iniciarse canto antes esta negociación e formulou cales son os puntos principais que deberan ser tratados na mesma.