Valoración da CIG-Ensino da sinatura do XI convenio

O 17 de decembro de 2021, logo de 7 reunións da mesa de negociación, tivo lugar a sinatura do XI Convenio Colectivo de Centros de Ensinanza Privada Regulada sen ningún nivel concertado por parte das patronais ACADE e CECE e pola parte sindical USO, FSIE, CCOO e FeSP-UGT. Desde o punto de vista social, tratouse de 7 mesas estériles, dado que non se acadou nin unha soa mellora laboral, salarial, nin social significativas, das reivindicadas na plataforma de mínimos conxunta das OO.SS creada, dada a actitude das patronais dende a 1ª mesa, pois todas partíamos con maiores expectativas. Ao final, como xa é costume, asinouse o que quixo a patronal, pregándose todas as OO.SS os seus ditados e nun tempo record de 5 meses de “negociación”.

Os logros foron as adaptacións (obrigadas) á normativa actual, e algún mínimo avance social sobre o texto anterior do X convenio. Logo, certifícase un novo recorte salarial co aumento futuro da perda de poder adquisitivo durante o período de sinatura do convenio até decembro do 2023 (nin sequera aseguran o IPC real nun convenio do máis precario en salarios e tamén en condicións laborais no ensino regulado). Xa acumulabamos máis dun 5% de perda de IPC real, de convenios anteriores e só co asinado para este 2021, co IPC por enriba do 5%, a perda vai ser como mínimo o dobre. Estas novas táboas asinadas, por riba, corren o perigo de non ser cobradas por moitos dos traballadores/as aos que afecta este convenio (preto de 30.000), pois mantense unha “Cláusula de Descolgue”, totalmente abusiva e lesiva pola que as empresas con perdas de matrícula dun 5% ou máis, estarán exentas de aplicalas. Moitos traballadores/as poden quedar conxelados até o 2023.

Deste xeito, mantense igual a xornada laboral (sendo totalmente abusiva as 27 horas lectivas), as vacacións (dentro do ensino regulado é o sector con menos vacacións), os permisos e excedencias (básicos, apenas mellora o E.T), a incapacidade temporal... E non se recolle nada sobre un plus de dispoñibilidade, nocturnidade, festividade, desprazamento por traballo, horas extras, horas lectivas e non lectivas… e outras moitas reivindicacións, que cando comezaron as negociacións todas as OO.SS formulamos, pero que quedaron en papel mollado ante unha actitude de pactismo e entreguismo sindical que non representa aos traballadores. Desde a CIG-Ensino denunciamos, pois, esta actitude das outras organizacións sindicais que, lonxe de defender os intereses dos/as traballadores/as a quen din representar, acaban plegándose aos intereses das patronais, que se impoñen convenio tras convenio.

Isto podería evitarse se, tal e como vimos demandando dende hai tempo, fósemos capaces de negociar un Convenio Galego para o sector contando co persoal afectado e tendo en conta as súas demandas e características propias.

1. Permisos retribuídos:

• Creación dunha bolsa de 20 horas retribuídas ao ano para acudir a asistencia médica, xa sexa persoal ou de familiares de ata 2º Grao de consanguinidade ou afinidade, realización de probas con especialistas, titorías de fillos, etc...As visitas médicas á sanidade pública inamovibles (especialistas) e que coincidan coa xornada non entrarían nestas horas, sendo recoñecidas sen límites.
• Incluír no permiso por hospitalización a posibilidade de diferir o inicio do goce separando o mesmo do feito causante, así como a posibilidade de fraccionalo.
• Equiparación dos permisos (matrimonio e outros) ás parellas de feito legalmente constituídas.
• Se o feito causante se produce en día festivo, ou non laborable, o goce do permiso comezará a contar o primeiro día laborable. Se o feito causante que orixina o dereito ao permiso se produce cando o traballador/a completase o 70% da xornada, e solicita o permiso o mesmo día, este contará desde o día seguinte. Se iniciado o permiso se inclúe algún día da fin de semana considerado non laborable para o traballador, non se terá en conta no cómputo. 
• Todos os permisos se referirán a días laborais.

2. Suspensións e excedencias.

• Introducir un aviso previo na excedencia voluntaria a cambio de reserva de posto de traballo durante 6 meses ( máx. 1 ano), mantendo a actual regulación no caso de que non haxa aviso previo (dereito preferente). Implementar dentro do apartado de excedencia a suspensión ou mutuo acordo das partes nos termos que as mesmas acorden.
• Nova causa de excedencia especial para victimas de violencia de xero cunha duración de entre 3 meses e 3 anos con reserva de posto de traballo durante os primeiros 18 meses.
• Ampliación da reserva de posto de traballo ás demais excedencias: coidado de fillos/ as e persoas maiores a cargo.
• Ampliación casos excedencias forzosas no seguinte suposto: Quen leve 6 anos na empresa poderán acollerse a unha excedencia con reserva de posto de traballo dun curso escolar.

3. Cesamentos voluntarios.

• Reducir o prazo de aviso previo por cesamento voluntario a 15 días para o persoal docente e 7 días para o resto dos traballadores/as (os docentes que accedan á pública de listas). Máximo sanción 1 día por día non preavisado. Limitar (eliminar) as liquidacións negativas en caso de falta de aviso previo/previo aviso.

4. Xornada.

• Reducir a xornada lectiva do persoal docente en beneficio da xornada non lectiva a partir dos 58 anos.
• A xornada lectiva do persoal docente reducila progresivamente a 25 horas lectivas ao finalizar convenio.
• Redución da xornada do PAS en 30 horas anuais. Máximo semanal 38,5 h.

5. Xubilación parcial. Posibilidade de acumulación de xubilación nun só ano.
6. Gratuidade ensino por fillos, para as xornadas parciais en proporcionalidade.
7. Bolsa total, no propio colexio ou noutros, para fillos/as de traballadores/as en situación de vítimas violencia xénero.
8. Acumulación de horas de lactación: 22 días laborables.
9. Establecer importe no seguro de responsabilidade civil: 50.000€
10. Art. Novo. Actividades fóra do horario escolar voluntarias e pagadas, con ou sen pernota (como en concertada).
11. Art. 12. Eliminar profesor Adxunto, Axudante ou Auxiliar; ou asimilar a Titular
12. Art.24. Persoal fixo aumentar % e en empresas de nova creación.
13. Art.40. Vacacións comúns. Cambiar por días laborais ao mes : 24 días.
14. Art.43. IT. Pasar de 3 a 7 meses o tempo do 100% da compensación. Enfermidade profesional ou accidente laboral sen límites.
15. Art.64. Complemento de desenvolvemento e perfeccionamento pasar de 5 a 3 anos para a súa cobranza. Trienios.
16. Eliminar art. 34 horas de mera presenza.
17. Trasladar á regulación común o establecido no art. 38 do ET e recuperación dos períodos de coincidencia no goce das vacacións coa acumulación do coidado do lactante. (Art. 40).
18. Extensión dos permisos por cuestións persoais a outras figuras civís legalmente recoñecidas (parellas de feito). (Art. 46).
19. Incluír dentro das horas formativas as dedicadas a reunións de seminario, departamento ou ciclos, a formación permanente derivada da adaptación á reforma do sistema educativo e a elaboración do PEC e outros documentos do propio centro. (Art. 49).
20. Taxa de comedor ao 50%, excepto os do art. 35, sen restricións. Eliminar a concesión ao xuízo da titularidade. (Art. 81)
21. Establecer unha cláusula ad personam de peche que permita respectar aquelas mellores condicións que viñesen gozando os traballadores/as con anterioridade á entrada en vigor deste Convenio. ( Adic. Nova).

Os grupos de traballo, caso de crealos, con garantías e limitados no tempo, podendo estar todas as partes negociantes.