O 10 de xullo de 2019, logo de 3 reunións da mesa de “negociación”, tivo lugar a sinatura das táboas salariais para 2018 e 2019 do Convenio Colectivo de Ensino e Formación non Regrado por parte das patronais CECAP, CECE e ANCED e pola parte sindical FECCOO e FeSP-UGT. Desde o punto de vista social, tratouse de 3 reunións estériles, dado que non se acadaron melloras salariais que reivindicabamos os 3 sindicatos no comezo das negociacións. Unha vez máis as patronais fixeron unha proposta á baixa que mantiveron até que os sindicatos estatais voltaron vender aos traballadores/as no que chaman “mesa de negociación”. Porén, certifícase unha nova perda salarial, coa non recuperación do IPC perdido e co aumento da perda de poder adquisitivo presente e futura (nen sequera aseguran o IPC-real nun convenio do máis precario en salarios, dentro de todos os que hai no sector do ensino).

Estas novas táboas asinadas, por desgraza, acabarán consolidando a perda de poder adquisitivo acumulada até as de 2017 (un 3,9% de perda) e incluso a incrementarán pois para 2018 aplicarase unha suba do 1% (o IPC quedou no 1,2%) e no 2019 un 2,75%. Esta suba salarial é retroactiva, tendo as empresas que aboar os atrasos en 3 meses dende a publicación en BOE das táboas salariais. As subas aplicaranse sobre o salario, complemento de dedicación e CPP, quedando conxeladas as cantidades dos postos funcionais (director, xefe de estudos,...). Nin se conseguiu que nos salarios por debaixo do SMI ( 900€/mes ou 12.600€/ano) se reflectisen nas táboas salariais estas cantidades. Así as empresas complementarán a cada traballador/a o salario até esas cantidades mínimas a cobrar, agás aqueles que teñan outros complementos e xa superen ditas cantidades, que só terán a ridícula suba porcentual asinada.

PROPOSTA DEFENDIDA POLA CIG-ENSINO NAS MESAS DE NEGOCIACIÓN 2018/2019

Dado que o sector leva anos de CONXELACIÓN SALARIAL e perda de poder adquisitivo coa excusa da crise económica, entendemos que esta debe ser recuperada, xa que se eleva ao 3,9%, polo que:

A nosa proposta para 2018 e 2019 será a suba en total do 3% por ano de todos os conceptos salariais sobre as táboas do 2017. Como todos os salarios son inferiores ao Salario Medio Galego (18.000€), aplicaráselle a suba lineal da cantidade que se incremente aos que teñan ese salario medio, é dicir, todas as categorías incrementarán 540€ anuais ( 3% dos 18.000€). Este 3% tamén se aplicará a todos os complementos do convenio.

Por suposto, todos os salarios por debaixo do SMI pasarían a cobrar os 12.600€, sendo esta a cantidade marcada nas táboas salariais e a cobrar por todos os traballadores/as desas categorías.

Unhas propostas moi parellas propuxeron as outras OO.SS ( 6% nos 2 anos a repartir), pero pronto se pregaron ás da patronal ante as ameazas de romper negociacións e denunciar o convenio.

Vós podedes cambiar esta actitude de pactismo e entreguismo sindical que non vos representa...

DIGNIFICA AS TÚAS CONDICIÓNS LABORAIS E SALARIAIS!!