O sindicato maioritario no ensino público denunciou na reunión de negociación da OPE e do reparto de especialidades que se furte do debate neste momento unha imaxe xeral e conxunta de todos os procesos que se terán que convocar neste ano, ao non abrir simultaneamente a negociación dos criterios para as prazas que deberán saír co sistema excepcional de concurso de méritos así como as prazas que se debe ofertar para o concurso oposición extraordinario. Ambas OPE deben estar aprobadas en xuño de 2022 e convocadas antes de final de ano. Pretender negociar tanto cifras globais como reparto por especialidades sen coñecer como vai ser a oferta do concurso excepcional é facer trampas.  A CIG-Ensino demandou un compromiso formal da Consellaría para abrir con carácter inmediato esa negociación. A Consellaría respondeu á nosa demanda anunciando que se compromete a negociar os criterios que darán lugar a determinar as prazas do concurso excepcional e do concurso-oposición extraordinario a finais do mes de febreiro ou comezos de marzo e que, seguindo o calendario previsto (sempre e cando o Ministerio publique antes o Real Decreto -RD-) as OPE estarán publicadas en xuño e as convocatorias antes de final de ano.

Non compartimos esa demora en comezar as negociacións e consideramos que a Consellaría pode estar en disposición de negociar xa eses criterios para despois fixar as prazas. A Consellaría alega que, a pesar da cifra ofrecida polo conselleiro na rolda de prensa, aínda non teñen o traballo avanzado. 

Tendo en conta a imposibilidade de poder avaliar con rigor os efectos desta OPE sobre o actual profesorado interino sen contar con todos os datos, a CIG-Ensino non deu o seu apoio á OPE e propúxolle á Consellaría que non pechase no día de hoxe o reparto final de prazas por especialidades e que non puxese en perigo o lexítimo dereito a que as prazas que cumpran cos requisitos de longa interinidade que aparecen na Lei se oferten pola vía do concurso. A Consellaría dá por pechadas as cifras de prazas e especialidades.

Procesos selectivos do 2022: unha situación extraordinaria require unha negociación seria e global.

Non se pode afrontar a negociación das ofertas de emprego deste ano como se fose un ano ordinario. Estamos diante dunha situación excepcional tras a publicación da Lei 20/2021 que introduce por primeira e única vez un sistema de concurso de méritos para a redución da temporalidade e un concurso oposición extraordinario. Por iso, tanto as propostas da Consellaría como a resposta sindical deben estar condicionadas por esta realidade. Nós como CIG-Ensino así o facemos. Xa o fixemos na negociación co Ministerio da modificación do RD e facémolo agora novamente. 

A CIG-Ensino xa deixou claro que non estaba disposta a asumir ningunha negociación sobre a OPE para este ano, con independencia do modelo de exames, se non se negociaban conxuntamente todas e cada unha das prazas que deben ser obxecto de oferta no presente ano 2022, tamén as do concurso excepcional e do concurso oposición extraordinario.

Tendo en conta a situación actual, coa obriga das administracións públicas de aprobaren antes de xuño unha OPE para acceder aos corpos docentes pola vía excepcional, e por unha soa vez , do concurso de méritos e cun borrador de Real Decreto que complica innecesariamente a xestión dos procesos selectivos, as ofertas de emprego deste ano 2022 non se poden analizar como as dun ano corrente porque non o son. 

A maiores, as últimas informacións do propio Ministerio levan a data de publicación da reforma do RD ao mes de abril. É obvio que o goberno español non podía facer unha xestión peor da que está a facer con este tema: non só no fondo do tema senón tamén nas formas e prazos. Á inseguridade legal sobre a decisión de sumar prazas de reposición e de estabilización súmaselle un retraso que, de por si, podería imposibilitar a aplicación neste ano.

Só haberá prazas de taxa de reposición na oferta ordinaria

A oferta de emprego do 2022 que se presenta na Mesa de hoxe limítase estritamente ás prazas de reposición, sen engadir un 20% de aumento que lle permitía a lei estatal. O argumento que emprega a Xunta é que o fai precisamente condicionada pola necesidade de convocar concurso de méritos. É dicir, a Xunta admite expresamente que a OPE do 2022 se ve afectada pola OPE excepcional. Isto é un paso adiante, mais totalmente insuficiente: falta o máis importante, poñer todas as cartas enriba da mesa. Incrementar as prazas nese 20% sería reducir enormemente a OPE de concurso.

Na OPE do 2022 inclúense 125 prazas de especialidades de FP que non se poden convocar neste ano porque está sen publicar a Lei Orgánica de FP (LOFP) que creará o novo corpo que substituirá ao de PTFP. Estas 125 prazas serán 98 das especialidades que hoxe son de PTFP e pasarán a PES, e 27 daquelas que se integrarán no novo corpo de profesorado especialista de sectores singulares da FP. A maiores haberá 19 prazas de promoción interna.  Por tanto, esas prazas convocaranse nas oposicións de 2023. Lamentamos que non se tome a mesma cautela no caso dalgunhas outras especialidades, que á vista dos datos do actual persoal interino e sen saber outros datos como as xubilacións previstas por especialidades, ben puideran ter agardado ao 2023.  

De feito, a Consellaría podería ter negociado coas organizacións sindicais a conveniencia de facer a convocatoria das oposicións da OPE que hoxe pasa pola Mesa (2022) acumuladas coas do ano 2023. En vez diso, trae xa a convocatoria á Mesa, negando toda posibilidade de buscar un consenso sobre como organizar os procesos selectivos deste ano e os próximos. 

Denunciamos falta de información e transparencia da Consellaría sobre o persoal interino afectado en todas e cada unha das especialidades convocadas. Non chega con saber canto persoal interino está a traballar agora senón a previsión de xubilacións por especialidades para poder valorar os efectos das ofertas de emprego no colectivo.

QUE VAI PASAR COS PROCESOS SELECTIVOS EN GALIZA NOS ANOS 2022, 2023 E 2024?

Para entender o que está a pasar exactamente coa lea montada coas oposicións, tanto pola proposta do Ministerio como pola da Xunta así como a resposta que damos desde a CIG-Ensino consideramos que é necesario ter en conta 3 cuestións diferentes. 

1. O modelo da CIG-Ensino fronte a un Real Decreto imposto unilateralmente polo Ministerio

A CIG-Ensino considera que as limitacións e condicións da Lei 20/2021, que non está pensada para o ingreso na docencia, dificultan unha acaída e correcta aplicación dun sistema de dobre vía (que agora se demostra perfectamente legal como sempre defendeu a CIG-Ensino) e que a proposta de Real Decreto aínda empeora máis. 

2. O sistema que presenta o proxecto de Real Decreto 

Fronte ás propostas da CIG-Ensino, o Ministerio impuxo o seguinte modelo (aínda en fase de proxecto e pendente de aprobar e publicar ): 

• Concurso excepcional: seguindo as limitacións da Lei 20/2021 só se terán en conta as prazas de carácter estrutural ocupadas de forma temporal desde antes de xaneiro de 2016. A OPE debe aprobarse antes de xuño e a convocatoria antes de final de ano.
• Concurso oposición con sistema extraordinario: tamén seguindo a Lei 20/2021 teranse en conta as prazas de carácter estrutural ocupadas de forma temporal desde antes de xaneiro de 2018. No caso de Galiza, e tras as convocatorias destes últimos anos nas que se incluíron prazas de “estabilización”, estas son un número moi reducido. Deste xeito, o Ministerio mestura nun único sistema de ingreso prazas de “estabilización” e de “reposición”, algo que en procesos anteriores non tiña problemas (2007, 2017) mais que nesta ocasión -polo carácter estrito da Lei 20/2021 á hora de definir as prazas que poden ir ao concurso oposición extraordinario- presenta serias dúbidas de carácter legal. A OPE destas prazas tamén debe aprobarse antes de finais de xuño e a convocatoria debe publicarse antes de finais de ano.

3. O que vai acontecer en Galiza.

• Ano 2022. Concurso oposición ordinario. A Consellaría opta por convocar polo sistema ordinario con prazas de reposición, ao igual que xa fixeron case todas as CC.AA., entre elas todas as gobernadas polo PSOE (o que xa é sintomático da nula capacidade do Ministerio para negociar e chegar a acordos, non só cos sindicatos senón mesmo coas administracións que xestionan realmente o persoal docente). No momento no que toman a decisión, este sistema é o único legal, xa que non se modificou o RD. A CIG-Ensino nunca compartiu este modelo e propuxo alternativas de mellora que non foron atendidas polo Ministerio.
• Ano 2022. Concurso de méritos excepcional. Debe estar aprobada a OPE antes de xuño e convocado antes de rematar o ano. A intención da Consellaría e publicar en setembro e resolver durante o curso escolar. Neste ano e nas mesmas datas debe publicarse a OPE e a convocatoria de concurso oposición extraordinario.
• Anos 2023 e 2024. Concurso oposición con sistema extraordinario segundo o novo RD. As prazas xa publicadas no 2022 serán convocadas conxuntamente coas prazas de reposición xa que unha vez que se publique o RD no BOE será o único sistema que se permita para todas as convocatorias. 

Ligazón á toda a información da mesa sectorial