Estes resultados supoñen unha emenda á totalidade ao comportamento antidemocratico e ao desmantelamento do ensino público da Consellaría de Educación. A CIG-Ensino exixirá a apertura de negociación para acadar a restitución dos dereitos laborais e salariais do profesorado, uns cadros de persoal amplos nos centros, a redución do alumnado por aula, a elaboración dun estatuto galego do profesorado que recolla as reivindicacións do profesorado e unha lei galega de educación.

Os resultados provisionais reafirman e fortalecen a CIG-Ensino como a organización sindical maioritaria e de referencia no ensino público, grazas ao apoio amplamente maioritario de profesorado. A CIG-Ensino, segundo os resultado provisionais, podería obter 62 delegados/as, os mesmos que hai catro anos, tendo en conta que se elixían 6 delegados ou delegadas menos que nas de hai catro anos. Esta redución é consecuencia da política agresiva de redución de profesorado da Consellaría de Educación, que fixo que o censo diminuíra en 2.044 profesores e profesoras menos en relación ao do ano 2010. 

A CIG acada a maioría absoluta na provincia de Pontevedra co 100% por cento dos votos escrutado e 21 delegados/as. A CIG, segundo os datos provisionais, sitúase tamén con maioría absoluta na Coruña con 23 delegados/as, en Lugo  con 10 e en Ourense con 8.

Número de delegados segundo os resultados provisionais

 

	CIG	ANPE	CCOO	UGT	CSIF	STEG
A CORUÑA (76%)	23	4	7	3	3	5
PONTEVEDRA (100%)	21	3	5	5	3	4
OURENSE (90%)	8	5	7	4	0	3
LUGO (99%)	10	5	2	4	4	2
TOTAIS	62	17	21	16	10	14

 

Agradecemos publicamente a confianza e apoio que o profesorado vén de amosar co seu voto maioritario á CIG-Ensino. Este apoio maioritario supón un aval e un recoñecemento ao traballo realizado pola CIG-Ensino durante estes catro anos, á nosa  oposición ás afrontas e abusos da Consellaría, ao noso combate permanente contra a LOMCE e á nosa loita contra os recortes dos nosos dereitos salariais e laborais e do ensino público e contra a desconsideración co noso idioma.  

Estes resultados afianzan o modelo sindical galego, de clase, plural, democrático e participativo, próximo ao profesorado e que aposta por un ensino público, galego, gratuíto, laico e coeducativo que representa a CIG-Ensino. 

O señor conselleiro ten que asumir estes resultados de apoio maioritario á CIG-Ensino e asimilar que supoñen a reprobación e a derrota da política educativa da Consellaría, asentada no autoritarismo, no menosprezo do profesorado, no deterioro do ensino público en beneficio do concertado e no desleixo co noso idioma.

Estes resultados supoñen unha emenda á totalidade ao comportamento antidemocratico e ao desmantelamento do ensino público da Consellaría de Educación. A CIG-Ensino exixirá a apertura de negociación para acadar a restitución dos dereitos laborais e salariais do profesorado, uns cadros de persoal amplos nos centros, a redución do alumnado por aula, a elaboración dun estatuto galego do profesorado que recolla as reivindicacións do profesorado e unha lei galega de educación. Unha lei galega de educación que leve consigo a derrogación da LOMCE, que se fundamente na defensa do ensino público e laico, na galeguización do ensino , na eliminación dos concertos educativos, nomeadamente os que segregan alumando por razón de xénero; e na consecución dun ensino totalmente gratuíto e equitativo para o cal é necesario dedicar o 7% do PIB.