A CIG-Ensino exixeulle á Consellaría o mantemento do actual cadro de profesores do centro, imprescindíbel para que se poida continuar cun labor educativo, que a propia inspección educativa recoñece como necesario, para que o alumnado do Pino teña a calidade de ensino á que ten dereito e lle corresponde e o profesorado continúe nos seus postos de traballo, aos cales accedeu mediante concurso de traslados.

A CIG-Ensino ante a proposta da Consellaría de Educación de suprimir catro unidades, tres de Secundaria e unha Primaria, no CPI de Camiño de Santiago de Arca O Pino,  quere manifestar o seguinte:

Trátase dunha decisión máis da Consellaría de Educación no camiño emprendido no desmantelamento do ensino no ámbito do rural co recorte do  profesorado imprescindíbel para un funcionamento adecuado dos centros educativos e da  calidade do ensino.

A proposta da Consellaría supón superar as rateos establecidas legalmente en  unidades de primaria e a masificación do resto dos grupos, sen ter  en conta o alumnado con necesidades educativas específicas, inviabilizando  calquera tipo de atención educativa personalizada, imprescindíbel para conseguir  os obxectivos estabelecidos   

No que respecta a Secundaria a Consellaría pretende suprimir o 19% do profesorado, o que suporá tamén unha masificación das aulas e eliminar calquera tipo de  de reforzo educativo e de medidas á diversidade.

Estamos ante recortes  totalmente inxustificados que supoñen unha discriminación e unha aberración pedagóxica, tendo en conta o reforzo educativo, as medidas específicas e o apoio educativo  que se están realizando neste momento  a un número importante de alumnado do centro  que con estes recortes,quedarían eliminadas.

Ademais esta medida imposibilita realizar calquera tipo de desdobre e  levar a cabo diferentes programas e accións educativas, o que implica   eliminar o  principio de igualdade de oportunidades, xa que estes centros do ámbito rural teñen que asumir a función de desfacer a discriminación que desde distintas perspectivas sufre a educación no mundo rural. Mesmamente, a proposta da Consellaría levaría  a unhas rateos tan altas que as aulas, por falta de espazo, non garanten as mínimas condicións  de comodidade a todo o alumnado.

En consecuencia, a CIG-Ensino exixeulle á Consellaría o mantemento do actual cadro de profesores do centro, imprescindíbel para que se poida continuar cun labor educativo, que a propia inspección educativa recoñece como necesario, para que o alumnado do Pino teña a calidade de ensino á que ten dereito  e lle  corresponde e o profesorado continúe nos seus postos de traballo,  aos cales accedeu mediante concurso de traslados.