Na Mesa Sectorial de hoxe día 28 de febreiro tratouse a proposta de Orde para regular as actividades de formación do profesorado. A Administración presentou unha proposta claramente antidemocrática que eliminaba a comisión de homologación de actividades onde están presentes as organizacións sindicais en representación do profesorado, e onde temos o cometido de revisar e comprobar que actividades de formación se convocan e realizan e se esas actividades poden e deben ser homologadas. Ante esta proposta a CIG-Ensino esixiu que se retirase a orde e que se trouxese novamente á Mesa modificada recollendo que as organizacións sindicais terán coñecemento dos convenios que se asinan e do seu desenvolvemento, comprobando que se cumpren os acordos asinados e que, por tanto, a avaliación pode ser positiva.

Despois dun intenso debate a Dirección Xeral de Formación aceptou crear unha comisión en que estarán presentes as organizacións sindicais. A CIG-Ensino esixirá que esa comisión, ademais das funcións de control e seguimento das actividades, debe ter os coñecemento de con quen se subscriben convenios de formación e se se cumpren todos os requisitos para poder certificar a actividade, nun exercicio de total transparencia sobre a formación do profesorado

Formación en linguas estranxeiras:

Nesta Mesa tamén se tratou a orde para a mellora da competencia lingüística en linguas estranxeiras. A CIG-Ensino denunciou que esta orde segue sendo un instrumento para os obxectivos políticos do PP, exclusivamente interesado en formar o profesorado en lingua inglesa para potenciar os centros plurilingües e o trilingüismo mecanismos adoptados no Decreto de uso do galego, declarado ilegal polo TSXG, para reducir a presenza da nosa lingua nas aulas.

A CIG-Ensino reclamou unha maior aposta pola lingua portuguesa. No proxecto presentado pola Admón a oferta de formación en portugués non acada nin sequera o 10 % das prazas (10 sobre 140), cando a Consellaría debería facer unha aposta por unha lingua que, cunha pequena formación, ofrece unha grande competencia lingüística, habida conta da proximidade coa nosa lingua propia. O incremento da oferta de portugués non só sería moi rendíbel formativamente senón que abriría un amplo espazo de comunicación, pois o portugués é unha lingua falada por máis de 200 millóns de persoas e é lingua de 11 estados repartidos por todos os continentes. Por outro lado a aprendizaxe do portugués é un mecanismo de reforzo e prestixio da lingua propia.

A CIG-Ensino criticou a nova redución da oferta nesta formación, un 32% respecto do pasado ano 2012, ano que xa se reducira un 37% respecto de 2011 cando a oferta foi de 325 prazas, practicamente o dobre das 140 convocadas este ano.

	Prazas ofertadas	Incremento redución respecto do ano anterior	Valor porcentual da redución
2011	325
2012	205	-120	-37 %
2013	140	-65	-32 %

Nomeamento de Direccións:

Na Mesa tratouse a orde de nomeamento da Direccións. A CIG-Ensino manifestou novamente a súa oposición a este sistema de selección das Direccións, que se agrava na LOMCE, na que a Administración ten a maioría na comisión de selección. A CIG-Ensino reclamou que todo o profesorado poida acceder ao nomeamento de director ou directora, que se valoren os servizos prestados como cargo directivo substituto, que o voto do profesorado na comisión de selección sexa voto delegado da posición maioritaria do claustro do centro, que as persoas candidatas teñan que presentar o seu proxecto ante o claustro e o concello escolar e que os proxectos das persoas candidatas recollan os obxectivos de cumprimento da Lei de Normalización Lingüística e o Plan Xeral de Normalización.

A orde publica a relación de 211 centros en que se convoca a renovación da dirección.

OUTROS TEMAS VARIOS TRATADOS NA MESA SECTORIAL.

Podes acceder á infomación doutros temas tratados na Mesa Sectorial na seguinte ligazón