A CIG-Ensino e profesorado CELGA fixeron entrega esta mañá, no rexistro da Xunta, dun total de 4.443 sinaturas en apoio ao profesorado que até o de agora viña impartindo estes cursos de galego. O secretario nacional da CIG-Ensino, Anxo Louzao, denunciou a situación “irregular, fraudulenta e ilegal” na que a consellaría e a secretaría xeral de Política Lingüística mantivo durante anos a este profesorado; exixiu o recoñecemento dos seus dereitos e reclamou a retirada da Orde pola que se pretende que sexa profesorado en activo quen imparta, en diante, estes cursos.

O profesorado CELGA pasou anos impartindo estes cursos de galego sen que desde a consellaría se estabelecera ningunha relación contractual con eles/elas. Por non ter, non tiña sequera alta na Seguridade Social. Ante esta precaria situación presentáronse denuncias diante das Inspeccións Laborais provinciais que resolveron que se trataba dunha fraude e mesmo impuxeron á consellaría unha sanción de máis de 200.000 euros.

Lonxe de legalizar a súa relación laboral con profesorado CELGA Educación optou, segundo denuncia o secretario nacional da CIG-Ensino, por responder de forma represiva despedindo a todo este profesorado e ofrecendo ao que está en activo os cursos para impartilos como horas extra.

Anxo Louzao asegura que esta situación “é inaceptábel” e aínda máis que unha administración pública “nin sequera garanta os mínimos dereitos laborais legalmente estabelecidos”.

Porén entende que “non é casual” que isto suceda. “Estamos ante unha consellaría  de Educación que se caracteriza pola persecución ao noso idioma. É un profesorado formado que amosou a súa solvencia para impartir estes cursos e a consellaría  non só despide a estes traballadores/as senón que está atacando á nosa lingua, seguramente coa perspectiva de que desapareza calquera tipo de alfabetización na sociedade galega no noso idioma”.

En conxunto hai máis de 400 profesores/as afectados/as por esta situación, aínda que non todos traballaban ao longo do ano. De feito Louzao especifica que tal era a súa precariedade laboral que tan só entre 120 e 150 impartían algún curso ao ano e o resto ningún.

Ante isto a CIG-Ensino exixe que se legalice a situación estabelecendo a relación contractual correspondente con este profesorado e a preceptiva alta na Seguridade Social.

Louzao lembra que, no seu día, a CIG-Ensino estaba disposta a negociar coa administración educativa o tipo de contrato. “O que é indiscutíbel é que teñen relación laboral, porque son traballadores por conta allea, así o dixo a Inspección Laboral e así o teñen que aceptar a consellaría de Educación e a secretaría xeral de Política Lingüística deixando de actuar de maneira represiva”.

A entrega de sinaturas que tivo lugar hoxe en apoio ao profesorado CELGA e en demanda de que, desde a consellaría de Educación e da secretaría xeral de Política Lingüística, se lles recoñezan os seus dereitos laborais vén precedida de innumerábeis mobilizacións.

A CIG-Ensino desenvolveu ademais unha campaña entre o profesorado en activo para que se negara –e así o fixo maioritariamente- a aceptar a proposta da consellaría de suplir ao profesorado CELGA impartindo os cursos como horas extra, e mesmo presentou unha queixa ante o Valedor do Pobo, por esta situación.

Con este panorama, o secretario nacional da CIG-Ensino entende que “se houbera un mínimo de dignidade, quen está á fronte da secretaría xeral de Política Lingüística tería que dimitir”.