A CIG-Ensino DENUNCIA os recortes reiterados que a Consellaría de Educación practica no Ensino público, desta volta atrasando intencionadamente a cobertura das baixas do profesorado. No día de onte, chegaron ser 287 as baixas sen cubrir, un número que continuou en aumento con novas peticións de centros. 107 desas 287 baixas estaban comunicadas antes de finalizar o ano 2011 (20 delas xa estaban comunicadas no momento de iniciarse o período non lectivo de Nadal) e outras 31 foron comunicadas entre os días 2 e 4 de xaneiro, porén a Consellaría, no afán de recortar recursos ao ensino público, non tiña cubertas ningunha desas 138 prazas, malia coñecer a súa existencia, pois os centros comunicaron as baixas con antelación suficiente para que estivesen cubertas no momento de se reiniciar as aulas. Este procedemento pon de relevo que a Consellaría está a recortar continuamente no ensino público, sen importarlle que isto teña consecuencias directas na atención do alumnado, lembremos que 20 desas baixas estaban comunicadas antes do 22 de decembro.

A situación queda resumida no seguinte cadro:

	Baixas sen cubrir o día 9 de xaneiro	Baixas sen cubrir o día 10
Secundaria	86	59
FP	9	8
Escolas Oficiais de Idiomas	5	1
Conservatorios e Artes escénicas	9	3
Infantil e Primaria	178	192
Total de baixas sen cubrir	287	263

 

Das 263 baixas que hoxe seguen sen estar cubertas, 20 son de máis de tres meses e 71 teñen unha duración do que resta do curso escolar, das que 64 son os programas PROA maioritariamente a media xornada.

Especialmente grave é que aínda hoxe siga sen estar cuberta a baixa de percusión, reclamada polo CMUS Superior da Coruña desde o día 20 de outubro, cando na listaxe desta especialidade hai profesorado sen traballo. Tamén seguen sen cubrirse aínda unha praza de Primaria no CEIP de Domaio, Moaña, desde o 29 de novembro e outra de Canto no CMUS de Vigo comunicada o 30 de novembro. Excepción feita dos programas PROA, seguen sen cubrirse 13 baixas comunicadas en 2011 e 19 comunicadas entre os días 2 e 4 de xaneiro, para o que non hai ningún tipo de xustificación.

Para a CIG-Ensino estes datos que estamos denunciando poñen en evidencia a política de recortes no ensino público desta Consellaría e a súa despreocupación pola boa marcha do ensino público. Como sinalamos ao inicio, unha parte importante destas baixas podería estar cuberta xa onte, ao reinicio das aulas, pois foron comunicadas antes do día 4 de xaneiro, maioritariamente antes de finalizar decembro, mais a Consellaría atrasa a cobertura das vacantes, agardando que así desaparezan, ou facéndoas desaparecer, como xa ten acontecido, o que foi denunciado publicamente pola CIG-Ensino. A CIG-Ensino esixe a cobertura inmediata destas baixas.