Nestes días a Dirección Xeral de Educación e FP está a enviar aos centros educativos unha publicación sobre prevención de riscos laborais para ser distribuída entre o profesorado de Formación profesional, integramente redactada en español.  É absolutamente inadmisíbel que a Consellaría de Educación incumpra de xeito tan grave non só o seu deber de promover o noso idioma e garantir a existencia de material formativo en galego, senón mesmo as súas propias normas de equilibrio. Publicar integramente en español un manual que ten utilidade pedagóxica nos ciclos formativos é incumprir o artigo 9º do seu Decreto de Plurilingüismo no que se recolle: que “Na formación profesional específica, … se establecerá unha oferta equilibrada … que garanta que o alumnado acade a competencia lingüística propia do nivel nas dúas linguas oficiais. En todos os módulos garantirase que o alumnado coñeza o vocabulario específico nas dúas linguas oficiais.” Pois ben, dificilmente se pode dar cumprimento a este artigo se a propia Consellaría de Educación cando fornece materiais non o fai tamén en galego, de xeito que quede garantida a adquisición de vocabulario específico no noso idioma e sirva como ferramenta para acadar a competencia plena en galego. Esta actitude da Consellaría dános a entender que non só elaboraron un Decreto destinado a reducir a presenza do noso idioma no ensino, senón que mesmo están dispostos a incumprir o seu propio Decreto, para que esa redución sexa aínda maior.

Esta actitude da Consellaría é antipedagóxica e ilegal, e redunda unha vez máis no desamparo do profesorado. A CIG-Ensino vai esixirlle por escrito ao Conselleiro de Educación que rectifique urxentemente e publique o mesmo manual na nosa lingua, tal e como debería ter sido publicado desde o primeiro momento.

 

Por outro lado a CIG-Ensino denuncia outra medida adoptada pola Consellaría de Educación contra a nosa lingua e que, ademais, se traduce no malgasto de diñeiro público. A Consellaría acaba de anunciar na súa web que amplía a axuda para a adquisición de libros para cambiar os textos de matemáticas, física e química e tecnoloxía, cando neste momento os libros destas materias non esgotaron o seu período de vixencia, pois non transcorreron os catros anos estipulados par a súa renovación.

A Consellaría de Educación e a Xunta de Galiza que tanto falan de contención no gasto non teñen ningún reparo en dilapidar fondos públicos, o diñeiro de todas e de todos, en reducir a presenza do noso idioma. Porén non son igual de espléndidos á hora de atender as necesidades básicas do ensino cubrindo baixas, enviando aos centros o profesorado suficiente, etc., mentres tiran uns libros que aínda son útiles porque están en galego e para a Xunta iso é unha prioridade. Cambiar este ano os libros de texto que están vixente para o curso que vén, e en varios casos tamén para o seguinte, supón un gasto de entre cinco e oito millóns de euros, concretamente de entre 5.743.760 € e 8.203.610 € dependendo das materia sen que se cambie o libro.