Hoxe celebrouse mesa sectorial para negociar o calendario escolar para o curso 2012-1013. A CIG-Ensino conseguiu que a Administración aceptase dúas propostas importantes. Unha delas que o día 13 de febreiro, mércores de cinza, volva ser día non lectivo, reivindicación realizada e acadada xa o curso pasado. Por outro lado a CIG-Ensino propuxo que o curso escolar comece o 17 de setembro en Secundaria. A proposta da Consellaría era que o curso comezase o 14, sen ter en conta que os prazos establecidos para a realización das probas de setembro, as avaliacións das mesmas, a matrícula do alumnado e a posta en marcha do curso era insuficiente. De feito varios centros escolares sinalaran esta circunstancia. A proposta da CIG-Ensino a Consellaría aceptou que o curso comece o 17 de setembro.

Información da mesa Sectorial.

CIG Informa con toda a información sobre o Calendario Escolar

 

CIG Informa cos varios tratados na mesa sectorial

No relativo ás conmemoracións a CIG-Ensino propuxo que no calendario existente se recollesen o día 24 de febreiro, Día de Rosalía, o 25 de novembro, Día contra a violencia de xénero, e 10 de marzo, Día da clase obreira galega. Tras a nosa insistencia a Consellaría comprometeuse a estudar as datas do 25 de novembro e do 24 de febreiro.

A CIG fixo fincapé tamén na importancia de que se variasen as datas do período de descanso de Semana Santa, de xeito que se inicie o xoves santo, 28 de marzo, e se prolongue durante a semana seguinte até o día 5, tal e como xa sucede nalgunha localidade do país. Esta proposta da CIG-Ensino equilibraría a duración dos trimestres entre si, evitando que o terceiro trimesetre sexa especialmente curto en comparación cos anteriores.

A CIG-Ensino foi contundente á hora de reclamar que se restitúa en Primaria a xornada reducida de xuño e setembro. A CIG-Ensino valora que este é o momento para recuperar unha xornada que no seu día foi moi maioritariamente reivindicada, cunha folga histórica e un referendo. Ademais dos motivos pedagóxicois que aconsellan manter este tipo de xornada, que de feito foi restiuída en comunidades en que fora eliminada. A CIG-Ensino congratúlase de que todas as organizacións presentes na mesa reivindiquen agora a xornada reducida en xuño e setembro, despois de ter asinado coa Consellaría, no seu día, a eliminación deste tipo de xornada.

A CIG-Ensino tamén reclamou que se amplíe o período de adaptación para o alumnado de 3 anos até o 30 de setembro, pois se trata dunha etapa en que pode haber 25 alumnos/as por aula e entre eles nenos ou nenas que nunca tiveron atención educativa.

 Respecto das Ensinanzas especiais e FP a CIG-Ensino propuxo que o curso comece cando rematen as actividades previas ao inicio de curso, de tal xeito que non haxa alumnado que se estea matriculando co curso comezado e incorporándose ás aulas con materia xa impartida.

O calendario escolar queda como segue:

	Inicio de curso	Remate	Nadal	Semana Santa	Entroido
Primaria	12/09	21/06	24/12 – 7/01  ambos os dous inclusive	25/03 – 01/04 ambos os dous inclusive	11, 12 e 13/02
Secundaria	17/09

Propostas da CIG-Ensino á Orde de calendario:

• Artigo 5, Inicio das actividades lectivas: no caso de Secundaria a data proposta ten unha serie de problemas, o día 10 entréganse as notas e remata a matrícula e preténdese que o 16 comecen as clases. As aulas non poden comezar como mínimo até o 17, recibimos moitas queixas dos directores porque é inviábel.

• En relación coas ensinanzas especiais e a FP, desde o noso punto de vista as aulas non poden comezar até que remate o período de matrícula, porque iso provoca que haxa alumnado que comeza máis tarde e con materia dada. Antes do 25 de setembro é imposíbel, pedimos que esa data nestas ensinanzas quede aberta. Nas EEOOII hai as probas de avaliación e non dá tempo a iniciar de curso nesa data.

• Artigo 6: período de descanso de Semana Santa do 28 de marzo ao 7 de abril e mércores de cinza festivo.

• Artigo 8: recoller 24 de febreiro, día de Rosalía, e 10 de marzo, día da clase obreira galega e o 25 de novembro, día para a erradicación da violencia de xénero. 

• Artigo 10.2. unha das cuestións que vimos demandando que o transporte escolar en ningún caso debe condicionar a xornada escolar, que ten que ter en conta rendemento, cuestións pedagóxicas, etc. Mais non o transporte.

• Artigo 10.3. recoller a xornada reducida: “nos períodos comprendidos entre os días 12 de setembro e 1 de outubro de 2011 e entre os días 1 e 22 de xuño de 2013 estabelecerase a xornada lectiva de catro horas en horario matinal nos centros que impartan educación infantil ou educación primaria, ou infantil e primaria, ou primaria e secundaria obrigatoria, ou infantil, primaria e secundaria obrigatoria, ou educación especial. Garantindo os servizos de comedor e transporte neste período.”

• Artigo 11.1 sobre o desenvolvemento da xornada despois de finalizadas as aulas, que se recolla o mesmo que en Primaria nas demais etapas e ensinanzas. 

• Artigo 12: actividades de final de curso, sobre todo nas EEOOII, que se adaptará de xeito que se permita a realización das probas, como en 2º de Bacharelato.

• Artigo 12.4.2. horario do profesorado ao rematar sa FCT, parécenos máis axeitado que se recollese como hai catro anos. Mais nunca que o profesorado sexa usado para cubrir baixas doutros docentes, como se pretendeu este ano.

• Disposición adicional primeira: sobre modificación calendario polos comedores escolares, ten que se re por cuestións extraordinarias.

• Disposición adicional segunda: período de adaptación: vimos demandando a súa ampliación a todo o mes de setembro, hai que dar o tempo de adaptación necesario considerando que hai nenos que nunca estiveron escolarizados.

CIG Informa con toda a información sobre o Calendario Escolar

 

CIG Informa cos varios tratados na mesa sectorial

---

Información previa á mesa Sectorial.

A proposta é a que segue:

	Inicio de curso	Remate	Nadal	Semana Santa	Entroido
Primaria	12/09	21/06	22/12 – 8/01 ambos os dous inclusive	25/03 – 01/04 ambos os dous inclusive	11/02 – 12/02 ambos os dous inclusive
Secundaria	14/09

A Consellaría fixou como Día do Ensino, non lectivo, o  2 de novembro.

Podes consultar o borrador completo na seguinte ligazón e a orde do día aquí

 

Na Mesa Sectorial a CIG-Ensino defenderá, entre outras, as seguintes propostas:

• A modificación do período de descanso da Semana Santa, para que se inicie o xoves santo, 28 de marzo e se prolongue durante a semana seguinte até o día 5. Este calendario é o que xa existe nalgunha zona de Galiza, co que se unificarían as datas para todo o país e equilibraría os períodos de descanso de Nadal e Semana Santa na súa duración. O ano pasado, a Consellaría de Educación volveuse comprometer, por segunda vez, a estudar esta proposta de cara ao vindeiro curso, pero segue sen incluíla.
• O mantemento do Mércores de Cinza (13 de febreiro), como día non lectivo ao igual que os dous últimos cursos.
• A recuperación da xornada matinal reducida en xuño e setembro, unha demanda que conta co aval da maioría do profesorado que participou moi amplamente nas mobilizacións e na folga convocadas pola CIG-Ensino cando se eliminou esta xornada e que segue sendo unha cuestión fundamental desde un punto de vista pedagóxico e laboral, pois hai que considerar o cansazo do alumnado en xuño e a adaptación ao ritmo de aprendizaxe en setembro.
• A CIG-Ensino tamén defenderá que se institucionalice o 24 de febreiro como Día de Rosalía, tal e como  propón a Asociación de Escritoras e Escritores (AELG), e que  se inclúa no calendario escolar como unha conmemoración centrada no recoñecemento e difusión da autora que simboliza o Rexurdimento da nosa lingua e a nosa literatura. A data sumaríase á do Día de Europa, Día dos Dereitos do Consumidor, Día Mundial da Saúde, etc.
• A CIG-Ensino tamén defenderá que o calendario nas EEOOII non pode comezar até rematar o mes de setembro, por cuestións organizativas, xa que neste mes se realizan e avalían un alto número de exames.
• Canto á FP, a CIG-Ensino proporá que as actividades lectivas rematen de acordo cos requirimentos horarios establecidos para cada ciclo formativo.
• A CIG-Ensino volverá propor que se prolongue o período de adaptación do alumnado de 3 anos até o 30 de setembro.