A Consellaría de Educación convocounos a unha Mesa Sectorial Docente Non Universitaria este venres 12 de abril ás 13 da tarde para debater o novo decreto de comedores escolares. A CIG Ensino rexeitou participar no “pariré” no que a Consellaría pretende converter a mesa sectorial e decidiu abandonala. Tamén abandonaron a Mesa as outras organizacións sindicais, coa excepción de ANPE, que forman parte do organismo: CCOO e UGT. A Plataforma Galega en Defensa do Ensino Público convocou un concentración o 17 de abril ás 16:30 coincidindo co debate do decreto no Consello Escolar de Galiza.

“Para a CIG-Ensino resulta  inadmisible que se nos convoque  a unha reunión da Mesa Sectorial para negociar o decreto de comedores cando o decreto xa foi ditaminado pola Permanente do Consello Escolar de Galiza. Para máis, convocala á unha da tarde significa que se quere cumprir unicamente  cun mero trámite e non levar a cabo unha verdadeira negociación”, explicou Anxo Louzao, secretario nacional da CIG-Ensino.

Diante desta situación, as organizacións sindicais que formamos parte da Mesa Sectorial solicitámoslle por escrito á Consellaría de Educación, o pasado  9 de abril, o cambio na data da convocatoria e o compromiso de iniciar un novo trámite para ditaminar o proxecto de decreto de comedores no Consello Escolar de Galicia, previa negociación na Mesa Sectorial tal como recolle  o proxecto decreto. Na Mesa Sectorial de hoxe, a Administración comunicounos a súa intención de non reconsiderar a súa actuación e de seguir adiante coa xuntanza advertindo ademais que non se ían ter en conta achegas que supuxeran cambios substanciais do decreto.

No Pleno do Consello Escolar de Galiza, convocado para o próximo 17 de abril, a CIG-Ensino defenderá unha emenda a totalidade para solicitar a retirada de proposta de Decreto polo que se regulan os comedores escolares dos centros docentes públicos non universitarios, porque, entre outras razóns, pon en tea de xuízo a igualdade de oportunidades, vulnera o dereito á educación e o deber de estar escolarizado, elimina o dereito ao comedor escolar gratuíto para o alumnado transportado,  non cumpre a función compensatoria, nin moito menos social, e penaliza a poboación do  medio rural.

Cómpre a elaboración doutro novo proxecto de decreto que garanta:

-       O uso gratuíto do comedor escolar a todo o alumnado beneficiario do transporte escolar e daquel cuxa renda mensual familiar non exceda tres veces o salario mínimo interprofesional, no camiño de conseguir  a gratuidade total para todo o alumnado escolarizado en EI e ensino básico.    

-       A habilitación de espazos necesarios en todos os centros públicos para que estes se poidan dotar do servizo de comedor.

-       O dereito, para todo o persoal do centro e alumnado, de poder facer uso deste servizo, garantíndolles unha praza no comedor.

-       Persoal específico, coa cualificación necesaria e con relación laboral coa Consellaría de Educación, para atender o comedor.

-       A xestión e funcionamento de todos os comedores escolares, que dependerán directamente da Consellaría, por medio de persoal específico e cualificado, dependente da mesma.

-       Administrativos para todos os centros que teñan servizo de comedor.

-       Instalacións e espazos adecuados en todos os centros públicos de nova creación para garantir a oferta obrigatoria do servizo de comedor. Así mesmo, emprenderanse as reformas e as medidas necesarias para dotar do servizo de comedor a todos os centros  públicos, hoxe  en funcionamento, co obxecto de  garantir as prazas suficientes a todo o alumnado do ensino  infantil e obrigatorio.