A CIG denunciou esta mañá, na xuntanza celebrada para negociar os servizos mínimos para a folga de mulleres do vindeiro 8 de marzo, que a proposta presentada pola Xunta é, igual que a presentada o ano pasado, “abusiva”. A central sindical subliñou que só están chamadas á folga as mulleres  e exixiu que “aqueles servizos mínimos que teñan que ser decretados, sexan cubertos por homes sempre que sexa posíbel”.

Desde a CIG Ensino denunciamos que se negue o dereito á folga a todas as compañeiras que desempeñan o seu labor nas unitarias que non estean incluídas nun CRA, e seguimos sen entender por que non se traslada o que se permite para os equipos directivos dos centros de menos de seis unidades (Nos centros de menos de 6 unidades o/a director/a poderá ser substituído/a por un membro do equipo docente) a todos os centros do ensino, co cal se limita o dereito á folga das equipas directivas.

A secretaria de Organización da CIG, Susana Méndez, lembra que o decreto de servizos mínimos para a folga do 8M de 2018 foi anulado polos tribunais e afirma que “xa non é a primeira vez. Imos cansas de ver como decretos de servizos mínimos que desde a CIG consideramos abusivos tamén desde a xustiza se anulan por excesivos e por vulnerar o dereito de folga”.

Méndez agarda que desta volta non se decreten uns mínimos tan “sobredimensionados” e non se faga publicando o decreto “a menos de 20 horas antes do comezo da folga”, como ocorreu o ano pasado. Algo que na sentenza emitida se recolleu como “abuso da posición de autoridade da administración” por ter sido publicado con tan pouca antelación e unha semana despois de terse negociado “limitando o dereito a impugnalos e mesmo a acción do tribunal para ditar as medidas cautelares”.

A CIG denuncia ademais a pouca antelación coa que se remitiu a proposta da administración na que, en todo caso, reitera que se pretenden decretar uns servizos mínimos “fóra de lugar, excesivos e que parece que buscan impedir ás mulleres exercer o seu dereito de folga, cando menos nalgúns casos concretos”.

Máis servizos mínimos que en 2018

Susana Méndez incide no “curioso” que resulta que, con respecto aos mínimos decretados o ano pasado e anulados por abusivos pola xustiza, desta volta se recollan mesmo maiores efectivos en sectores e categorías que, ademais, son esencialmente desenvolvidas por mulleres. En concreto cita residencias de maiores ou centros de atención a dependentes, onde se aumentan efectivos de mínimos de cociña ou de camareiras/limpadoras, como no caso das Residencias de Maiores de Carballo, Oleiros ou Vimianzo, entre outros.