A CIG demanda á Xunta a aplicación xeral do permiso de 22 semanas por nacemento para o outro proxenitor tras a sentenza gañada polo sindicato
O sindicato maioritario na Xunta vén de remitirlle un escrito á Dirección Xeral de Persoal da Consellaría e a Función Pública para que apliquen a sentenza xa a todas as empregadas e empregados públicos, incluído o profesorado
O pasado seis de xuño de 2023 a Sala do Social do Tribunal Superior de Xustiza de Galiza ditou unha sentenza, en resposta a un recurso promovido pola CIG, na que se se declara “o dereito do actor [un traballador do Consorcio Galego de Benestar e Servizos Sociais] a gozar dun permiso por nacemento de fillo de proxenitor non xestante de 22 semanas de duración, e non das 16 semanas recoñecidas na Lei de Emprego Público de Galiza, condenando a entidade demandada a estar e pasar por esta declaración e a que lle recoñeza o dereito a gozar das seis semanas non recoñecidas, con todos os efectos legal e regulamentariamente establecidos».
A fundamentación xurídica da sentenza ten como base os dereitos de conciliación e a corresponsabilidade e a garantía da igualdade de trato e de oportunidades entre mulleres e homes no emprego e a ocupación, estabelecendo idéntica duración para o permiso por nacemento da nai biolóxica que para o permiso derivado do nacemento para o proxenitor distinto da nai biolóxica, así como nas directivas europeas de aplicación.
A CIG leva anos defendendo a ampliación dos permisos por parto, tanto para a persoa xestante como para o outro proxenitor, co obxectivo de estender estes permisos até 52 semanas de duración, equiparándonos cos dereitos máis avanzados a nivel europeo nos coidados e conciliación da vida laboral e familiar.
Nesta liña a CIG xa propuxo en diferentes mesas de negociación, como primeiro paso, o aumento do permiso para outra persoa proxenitora até 22 semanas, co obxectivo de equiparar este co da nai biolóxica. Agora, a xustiza confirma que a nosa demanda sindical ten pleno amparo legal e constitúe claramente unha razón para que a administración galega, en virtude da citada sentenza, recoñeza este dereito a todos os empregados e empregadas públicas.
Por todo isto, desde a CIG demandamos á Consellaría de Educación presente na Mesa Sectorial unha proposta normativa para poder aplicar ao profesorado os cambios necesarios na orde de permisos para o persoal docente, recoñecendo a extensión a 22 semanas desde as 16 actuais para a persoa proxenitora diferente da nai biolóxica, evitando que persoas que terían dereito ás 22 semanas vexan limitado este dereito mentres non se faga efectivo o cambio do artigo 124 da Lei 2/2015 no sentido do que recolle a sentenza.
En paralelo, a Área Pública da CIG vén de demandar de Función Pública a aplicación xeral para todo o persoal da Xunta dese novo dereito recoñecido na sentenza, de acordo cos seguintes criterios:
- A modificación do artigo 124 da Lei 2/2015 no sentido do que recolle a sentenza, recoñecendo a extensión a 22 semanas desde as 16 actuais para a persoa proxenitora diferente da nai biolóxica en casos de nacemento, acollemento, garda con fins de adopción ou adopción dun fillo ou filla.
- A publicación, mentres non se faga efectivo ese cambio, das instrucións ou normas legais necesarias para que recoñeza ese dereito a todos os empregados e empregadas públicas da Xunta de Galiza.
- A negociación, no marco da Mesa Xeral, da extensión dos permisos para ambos proxenitores, dos permisos no camiño da proposta da CIG de ampliala, cando menos dun xeito progresivo, até as 52 semanas.
